2010日本關西[追加中部]春の旅 | Day 8 [TayThink / Travel / Toto]

標題： トミカ博.大阪.2010
日期：2010年4月29日 (四) | 昭和?日
天氣：晴

景點：「 トミカ博 大阪 - 2010」

美食： 阪神名物 – いか燒き

「 トミカ博 大阪 - 2010」

黎到今次旅程嘅最後大半日，我地終於會留喺大阪，不過唔係去shopping而係去睇展覽會！

呢個展覽會就係之前响便利店用 loppi 機買飛嘅「 トミカ博 大阪 - 2010」！

Tomica 其實係日本玩具王國 Tomy 旗下嘅玩具車品牌。而由細到大都對「車仔」玩具都冇乜興趣，不過幾年前，有次見到一架有趣嘅幼稚園貓巴士就開始左近年黎一個新興趣！

其實，响日本每年都會响唔同嘅地方搞「 Tomica 博」， 咁啱今次撞正响大阪搞，仲要係40週年，作為 「粉絲」一定要去啦！

o^____^o

トミカ40周年

今次嘅「 Tomica 博」响大阪一個叫「港區」嘅地方舉行，港區就係大阪灣，其實呢個亦係大阪傳統嘅親子地方，因為呢度有個大型嘅水族館，每逢假日日人都會一家大細呢度玩。


唔使半個鐘，我地就由梅田駅去到港區嘅トレードセンター前 (Trade Center)。 展覽仲有30分鐘先開門，但係世界排隊冠軍嘅日人，已經一家大細排晒隊入場。我地當然都入鄉隨俗，就係排埋一份，耐心等候。
入到會場，又再次發現左日人細心嘅準備，第一樣就係佢地有一排排枱，上面放左一疊疊橙色嘅圓形貼紙，有幾個空格可以填上資料，枱面就貼有日文解說：「迷子...」，照估都係驚啲小朋友蕩失路而設。

為蕩失路嘅小朋友而設嘅貼紙

另一樣野，就係所有接待人員都係雙滕脆低！！

我第一個反應係「幾百円入場唧！ 唔洗咁大禮呀！」:O

我地唔係迷子，只係喺度度高！:)

後來就知道點解佢地要咁，因為佢地好清楚邊個係今次展覽嘅 target audience — 小朋友啊！接待員咁做係因為要同入場嘅小朋友保持 eye-level，令佢地覺得更加親切，又突顯日人嘅細心文化。可能你會話佢地過份，因為，我都覺得唔慣，哈哈！！
:)

每張入場券都可以換一架今次展覽館特注版 Tomica TDM (Tomica Dream Motor) 嘅記念車，今年係一架二合一、穿梭古代未來嘅救護車！


而適逢今年係四十週年，展覽館介紹左由1970年第一部嘅車仔到今年成年會出嘅系列。

雖然，已經四十週年，Tomica 依法保持自己嘅傳統之餘，但又不停創新，每個月都會有2款新車發表，更會加入唔同嘅元素，好似佢地今年四十週年，就請左日本石川県輪島市嘅手繪藝術大師為兩款跑車用漆塗工藝（ “ 輪島塗  ”）繪上花嘅圖案，而且，佢地更展出白金同純金嘅 Tomica！！

「プラチナ トミカ」白金製 Tomica
全長約 7cm、重約 210g、價值 700０万円！

而我最欣賞係佢地有一個叫 TDM 嘅 Project，即係之前每個入場人士都攞到嘅果份記念品，每年都會畀唔同Tomica嘅愛好者自己設計夢想嘅 Tomica車仔，一經投票勝出，廠方就會為佢大量生，成為果年嘅 TDM，當中都有唔少好「爆」嘅設計，好似梳化車、大型觀光車、八爪魚工程車、太陽能帆船車…

XD

梳化車 TDM

而呢個嘅「トミカ博」，除左係展覽會，更加係玩具嘉年華，因為一大半嘅地方都係可以畀入場嘅小朋友玩！


亦都有一個小型工場，小朋友可以自己擇選唔同嘅車仔配件，工作人員即場幫佢地裝，成為自家設計嘅 Tomica！

自家製 Sabaru 360 (スバル 360)

場內仲有唔同嘅攤位，畀小朋友可以同爸爸媽媽一齊玩，親子度爆登！

場外亦照顧周到，有個美食店廣場，可以玩到餓都唔洗走到好遠去揾野食！
當然，場外最後嘅把關係トミカ販賣場！

順理成章，自動奉獻！

我地消費完一輪就離開左「トミカ博」，就返酒店準備 pack 野上機，不過酒店喺梅田，附近嘅阪神百貨B1美食街有一樣名物 ー【いか燒き】（烏賊焼），冇理由唔去試下，我地最後嘅午餐亦係呢度食，不過，我地唔知今日係日本假期 – 昭和の日( 即係 昭和天皇嘅生日)，更加估唔到日本人假期嘅威力，喺呢個咁出名嘅大阪 FoodCourt 會多人到咁誇張！！

唔好話冇位坐，立食(企喺度食)都要背貼背，而隔離嘅日人爸爸因為帶住仔仔，就決定索性踎喺度，畀仔仔可以坐起自己大脾度食飯，再加上呢度嘅裝修較舊，有一剎那以為自己返左大陸！


o_____O"

阪神百貨B1美食街名物 ー【いか燒き】

體驗完我地嘅「極逼立食午餐」後，我地就返香港…


次次日本自遊行啲行程都係編得密密麻麻，不過估唔到今次最嘥我地時間係每次返酒店嘅路程！！

>_____<#

因為，大阪駅正值大裝修，圍板重重，不論早晚嘅都係咁多人，比新宿駅嘅人流有過之而無不及，令我地次次返酒店都要搵一大輪。
=.=

大阪城水蓋，趣！

不過，今年大阪駅終於完成裝修，當中有更多嘅商場落成，好似 JR大阪三越伊勢丹、LUCUA …

講多件趣事畀大家聽，大阪鐵路電梯嘅企位同我地港鐵一樣都係靠右企，同東京就啱啱相反係靠左企！趣！


期待下一次再遊日嘅趣事！

是次遊記(終於)完，多謝支持！！
:P

「 トミカ博 大阪 - 2010」

Day 8 相簿投影播放

1. Tomica : http://www.takaratomy.co.jp/products/tomica/
2. LUCUA : http://www.lucua.jp/
3. JR大阪三越伊勢丹: http://osaka.wjr-isetan.co.jp/
4. 「漆塗り トミカ」石川県輪島市: http://www.takaratomy.co.jp/product_release/pdf/p100302.pdf
5. 其他是次遊記: http://taydiary.blogspot.com/search?q=2010+%E6%97%A5%E6%9C%AC%E9%97%9C%E8%A5%BF+%E6%98%A5%E3%81%AE%E6%97%85

2010日本關西[追加中部]春の旅 | Day 7 Part 3 [TayThink / Travel / Toto]

標題： 令人著迷的神戶 Part 3
副題：感見用心栽種更美の神戶
日期：2010年4月28日 (三)
天氣：晴


景點： 神戶、鉄人２８号、神戶港、神戶塔、北野異人館、咖啡店、ケーキ屋 (Mont Plus) 、神戸鐵板燒牛排店 (ステーキランド)美食： 神戸牛、草莓蛋榚 (ガトー･オac･フレーズ，Gatō. O. Furēzu ) 、法式劇院蛋榚 (オペラ，Opera) 、香橙蛋榚 (ヴァランシア，Valencia)、松屋牛丼、美利堅公園、神戶港震災紀念公園

街燈被弄東歪西倒

由蛋糕店推門出去，太陽已經落山啦~

我地向海邊行，經過由著名建築師，Frank Gehry - 設計嘅魚餐廳 Cafe Fish!， 我地就黎到今日最重要、亦係成個行程中最沉重嘅景點，位於美利堅公園側嘅阪神大地震遺址 — 神戶港震災紀念公園。

喺1995年1月17日，日本關西發生7.3級大地震！由於當時發生地震係零晨時份，好多人都係熟睡當中，所以，傷亡嘅人數相當驚人，亦係日本全國近代最沉痛嘅打擊！

當我埋手寫呢日遊記時 (諗住可以四月前寫起)，突然日本又發生311東日本大地震，悲劇又再發生，當堂難以執筆，回想當日遊歷遺址嘅情景，心情加倍沉重！

當日，我地到景點嘅時候天色已經昏暗，暗淡嘅燈光，遊人淍零，吹住一陣陣冷冷嘅海風，感覺更加淒冷！

全個公園最幽暗、靜寂嘅地方

昔日美麗嘅碼頭，路面裂開，街燈東歪西倒，畀船隻泊岸，遊人垂釣嘅碼頭，瞬間整個陷入海中，眼見自然界嘅巨大威力！當時一發的破壞力，令神戶市受到如此不能磨滅、深深嘅傷痕！

呢刻彷彿覺得呢度係全個公園最幽暗、靜寂嘅地方，除左自己嘅呼吸聲同相機嘅快門聲，其他聲都好似聽唔到，手雖然仍然按住快門影下遺址嘅景況，但膊頭感到一股無形嘅壓力，好似要同我講呢度係大家都唔願回望嘅地方。

人喺黑暗嘅地方都想搵到光明，離我地唔遠，有一棟會發出耀眼嘅光芒嘅建築物，亦係神戶市嘅傳統焦點，更加係我地今日最後景點 — 神戶塔！

神戶塔

神戶塔，高108米絕對係欣賞神戶市景嘅好地方。

旅客可以預先下載當地旅遊局嘅 coupon，用優惠票價登塔，去到離地 91米高嘅最高觀景層，你可以鳥瞰成個日神戶市嘅景色，唔同香港嘅維多利亞港，前方冇高樓大厦，只有漆黑一片嘅大阪灣，同對岸小小嘅燈光，當然，冇我地東方之珠果種眼花瞭亂嘅吸引，但係呢度仍然延續神戶嘅浪漫。

因為，觀景層天花裝上好多一顆顆嘅白光小燈，令你置身繁星滿佈嘅夜空咁，加上今日天色清朗，有大大嘅月亮陪住我地欣賞夜景，港口旁嘅更有一個閃爍嘅摩天輪，「真的浪漫極了」！

難怪見到大部分遊客都係一相一對手圈住手嘅甜蜜情侶！

o^______^o

浪漫神戶港

陶醉於浪漫氣氛之際，攞起相機，想影低呢個浪漫一刻，突然聽到「咇咇！咇咇！」兩聲！！

最後一舊電都用晒！！
:O

再睇下 MyV 果部機，都係冇晒電！！


:O + >___<"

竟然，四舊叉滿左嘅電都用晒！

影唔到我地最後嘅景點！？仲要攞左成日嘅腳架又冇得用！！？？

「玩野」相@神戶港

「唔得！！」

諗下先~ 諗下先~

又證明一次「人急智生」，同平時要學多啲常識／冷知識！！

今次要靠我條牛仔褲！！

將舊電不停响我條牛仔褲係咁擦！

用熱力將淨番喺電池果少少電都逼埋出黎！

影幾張又拎舊電出黎擦幾下，影幾張又拎舊電出黎擦幾下…
=.=


如是這，影埋呢張「玩野」相，四舊電耗盡，我地倆個嘅 "電" 都用晒！

而附近嘅餐廳都閂晒門，我地決定返大阪食廿四小時都開嘅牛丼飯！(唔係吉野家而係松屋！)

搭住火車返大阪，竟然已經有啲唔捨得神戶，唔捨得佢  1:1 嘅鉄人２８号、神戶鐵板牛、蛋糕、咖啡、風景、甚至街邊嘅鬱金香…


諗番起，究竟係乜原因令我唔捨得神戶啦？

可能係我見證左一個本來被天然災害弄得滿目瘡痍嘅地方，經過日人多年充滿愛心嘅栽種，重建呢度，令佢再次發出佢自己「獨特東洋浪漫の美」嘅過程！

神戶，你令人都著迷了！

鉄人２８号 & Tay :「頑張れ日本！！」

我堅信，日人好快會振興 311各災區，亦好快令我地再次為佢地著迷！


「頑張れ日本！！」



…待續
(是次遊記淨番最後半日大阪！加油！)





PS: 當搜集神戶嘅旅遊資料時，其實神戶最吸引我，並唔係之前所講所有嘅景點或者美食，反而係佢地當地一個叫 神戶光の祭 — 「神戸ルミナリエ」，喺每年12月嘅聖誕節前舉行，都係為左災後重建籌款，但係，佢地請左世界唔同嘅設計師去設計唔同大型嘅璀璨燈飾，靚到令人感動，所以多年來振災都好成功！！我都好希望將來可以親身去體驗呢個光の祭！！




更多資料:

1. Frank Gehry - 設計嘅魚餐廳 Cafe Fish :  http://www.cafe-fish.com/
2. 神戶光の祭 — 「神戸ルミナリエ」: http://www.kobe-luminarie.jp
3. 神戶歡迎優惠券: http://www.feel-kobe.jp/_tw/profile/traffic_service/index.html#00
4. 其他是次遊記: http://taydiary.blogspot.com/search?q=2010+%E6%97%A5%E6%9C%AC%E9%97%9C%E8%A5%BF+%E6%98%A5%E3%81%AE%E6%97%85

Day 7  相簿投影播放

2010日本關西[追加中部]春の旅 | Day 7 Part 2 [TayThink / Travel / Toto]

標題： 令人著迷的神戶

Part 2 副標題：洋和浪漫的神戶！

日期：2010年4月28日 (三)

天氣：晴

景點： 神戶、鉄人２８号、神戶塔、北野異人館、咖啡店、ケーキ屋 (Mont Plus) 、神戸鐵板燒牛排店 (ステーキランド)

美食： 神戸牛、草莓蛋榚 (ガトー･オ･フレーズ，Gatō. O. Furēzu ) 、法式劇院蛋榚 (オペラ，Opera) 、香橙蛋榚 (ヴァランシア，Valencia)

樓上 cafe 花店

由好熱鬧嘅火車站，沿北野坡向北野區行上去，街頭嘅嘈吵聲就愈黎愈少，行左大該5分鐘，過埋條大馬路 (中山手通) ，突然覺得有啲唔同，唔單至係因為街頭嘅人少左，而且街道兩旁嘅鋪頭嘅類型都唔同左。

我地第一間見到嘅鋪頭好有趣，係又係樓上 cafe 又係花店。店外已經擺放左一大盤嘅 紅色康乃馨，响陽光下更令人注目。我地不奇然就行埋呢間咁特別嘅店鋪打量一番，再睇下周圍嘅鋪頭，原來大多都係咖啡店，每間都佈置獨特、精緻！

不過，係我周圍望嘅時候，突然發現有一樣野令我嘩然！

就係行人路喺兩旁維多利亞式街燈下嘅花圃，種左一支支筆直而盛開、有粉紅色同深紫色嘅鬱金香，每支鬱金香旁都有唔同顏色嘅小花襯托，彷彿好似响呢個街頭見到漾溢住一片片浪漫嘅戀人！

維多利亞式街燈下嘅花圃

日人就係咁，總係好肯用心思喺一啲唔起眼嘅地方，有次係佢地嘅郊外，就畀一條污水渠吸引，大家唔好覺得我變態，因為，北海道好出名嘅小樽運河依家變相都係一半用黎處理污水架啦！

XD

估唔到响呢個街頭，會欣賞到一幅令人心醉嘅圖畫 – 「街燈下的鬱金香」！

正當欣賞緊嘅時候 (當然，又已經不停咁襟快門啦！)，腦海突然閃出一幅好爛嘅畫，就係我地香港旺角嘅有蓋行人天橋，為左美化通道兩旁而擺放嘅花圃，長期都係「寸草不生」，美化唔到之餘，更加係醜化！！

我地冇理由差咁遠o架！！

>___<" + =.=

「街燈下的鬱金香」

唔諗咩畫啦！

我地繼續行去北野區，有街上鬱金香陪住，感覺分外舒服！

o^_____^o

行左一陣我地又發現到一間好古典嘅建築物，原來係港人都好熟悉嘅星巴克咖啡店 – 《北野物語館》！

雖然，呢度並唔係我地要去嘅異人館，我亦唔知日本星巴克賣嘅咖啡同香港有咩唔同。

但係，呢間《北野物語館》星巴克咖啡店，佢地嘅粉絲或咖啡迷就應該入去一試，因為呢間並唔係仿製復古大屋，而係一間有兩層樓高、真真正正法定古蹟嘅古老木大屋。

佢建於明治 40年 (1907年)，屋內仲保留左好多當時用過嘅古董傢俬，買杯咖啡就可以响古老大屋度享受一段咖啡時光，應該會係一個超值又特別嘅咖啡經歷！

《北野物語館》星巴克咖啡店

難怪好多網友都激讚呢間星巴克咖啡店！

好可惜我地就唔可以付出呢個時間，因為有太多嘅景點要去 …

:{

行多陣，我地就到達左「北野異人館」，我地第一時間就去食佢地好出名嘅牧場雪糕 – 六甲牧場雪糕！

啱晒行到有啲熱嘅我地黎降下溫！

:D

《風見雞の館》

由一條石樓梯望上去，就見到我地今日嘅重點景點  –《風見雞の館》，館外有一個小廣場 – 北野町廣場，除左延續鬱金香 の浪漫，响各有趣嘅銅像旁種左大大朵嘅橙色鬱金香，再加上遊人嘅笑聲，加添唔少歡樂嘅氣氛！

ラインの館

買左飛，我地就入去參觀《風見雞の館》，入面見到當時屋主 – G．托馬斯先生嘅居住環境。除左極豐歐洲嘅風味，最欣賞係佢多窗嘅設計，每層樓、每間房也會有大量嘅天然光照入黎，寧靜而好舒服嘅感覺。

其實，成個「北野異人館」，除左《風見雞の館》外，當中吸引我嘅仲有魚鱗之家 (うろこの家 ・うろこ美術館)、英国館、山手八番館…等等，一共廿幾間不同外國人曾經居住過嘅住宅 (異人館) 或領事館，都真係各有特色！！

我地係行程內只預留幾個鐘喺度，而且，為左慳返啲入場費，我地去左其中一個免費入場嘅 ラインの館，由法國 J.R.Drewell 夫人喺 1920年 (大正 9年) 興建的，屋內同樣佈置細緻，而且一共有三個不同展館，有唔同嘅畫展，突然覺得好似去歐洲睇博物館咁！

ラインの館

其實，成個北野區都俾我有一種漾溢住濃厚歐洲嘅浪漫情懷，唯一唔同就係呢度全區禁煙，條街空氣清新又寫意！(又突然諗起人"煙"稠密嘅香港街道)

咁有歐洲嘅浪漫情懷，當地人亦好識做生意，所以，開左好多有關結婚嘅鋪頭，不論婚紗店、證婚場地、同攝影公司。

參觀完之後，我地去左位於較遠嘅《北野工房》，前身係神戶市立北野小學(校)，依家呢度就變成販賣唔同嘅手工藝品，當中有110年歷史嘅米糠番挸，火柴專門店，…

講左咁耐，大家應該好感受到呢個充滿洋風嘅神戶，我地用腳同眼去感受完有富西方建築文化嘅異人館後，我地再次用我地嘅口同胃去感受洋風嘅神戶！

除左神戶牛呢個食嘅文化產業，其實神戶嘅咖啡同西式蛋糕亦同樣極具影響力！

御影ダンケ 元町店

之前提到，只得15分鐘路程嘅北野坡已經有好多唔同特色嘅咖啡店，如果要品嚐晒全神戶嘅咖啡店，就算一日飲足五餐，一年都唔知可唔可以試得晒！？

當中有喺 1948年開業、歷史最悠久嘅神戶咖啡店 にしむら珈琲 (NISHIMURA Coffee) 中山手本店，一棟3層樓高嘅咖啡店，而喺地下廚窗內就擺左佢地每日自己煎焙咖啡豆嘅煎焙機！

我地最想試係一間用牛油去煎焙咖啡豆嘅咖啡店 – 御影ダンケ 元町店，不過，今日係定休日，冇緣品嘗了！

:{

不過，又好彩，咁啱經過NHK (日本放送協会)神戶大樓，咁又入去參觀下~ 

:)

NHK (日本放送協会)神戶大樓

其實，神戶亦係洋式甜品天堂，佢地嘅西餅都係全國聞名！

我地今次想試嘅係一間西餅店 – ケーキ屋 (Mont Plus)，對旅行人士可以話係隱世嘅蛋糕店，因為佢位於商業區中嘅一間小店。對神戶人講就非常出名，每逢節日期間都大排長龍，訂單一個月前都爆滿，創辦人亦非常出名，店之寶就係香橙蛋糕(ヴァランシア，Valencia)！

話明隱世，真係花左我地唔少時間揾，去到嘅時候已經6點，晚飯時間都黎緊，鋪都就收！

@___@

ケーキ屋 (Mont Plus)

我地無望試佢地最出名嘅香橙蛋糕，但係點都要試下佢地其他蛋糕！

鋪頭嘅設計好有心思，推開木製嘅玻璃門，天花吊住幾盞嘅水晶燈，右邊係蛋糕櫃同收銀處，左邊一排排嘅擺放唔同製作蛋糕嘅素材同工具，供喜愛製作蛋糕嘅朋友選購，因為佢地嘅師父不定時都會開蛋糕製作班。而蛋糕店嘅盡頭就係一塊大玻璃，可以見到各師父製餅嘅手藝！

而中間位置，就係小型咖啡店，擺左大大小小嘅木櫈，木枱，畀大家嘆蛋糕、咖啡、傾計。

喺蛋糕櫃得番3款蛋糕畀我地擇，最後擇左草莓蛋榚 (ガトー･オ･フレーズ，Gatō. O. Furēzu ) 同法式劇院蛋榚 (オペラ，Opera)！

店中小型咖啡店

諗下試邊件先好呢？ 心諗法式劇院蛋榚會滿濃味啲，而且草莓蛋榚咁普通，一於試左草莓蛋榚先！！

 慘！！ 真係好慘！！

因為，估唔呢件草莓蛋榚會係我地今次旅程另一樣畢生難忘嘅美食（另一件當然係一蘭拉麵）！

清甜嘅草莓、清香嘅忌廉 配上軟綿綿嘅蛋糕，完美嘅味道、甜度、香度同質感嘅配合，真係蛋榚中嘅藝術品！！

而咁件 Opera 就比下去，而變得普通，到依家都仲好掛住呢件草莓蛋榚！！

草莓蛋榚
(ガトー･オ･フレーズ，Gatō. O. Furēzu )

享受住咖啡香、蛋糕甜嘅呢一刻，回想剛參觀過北野異人館各洋式大宅，神戶再次畀我一個特別洋和浪漫嘅感覺！

夜幕低垂，嘆完杯咖啡，稍稍提神，我地離開蛋糕店，去感受夜空中的神戶港！

待續…

更多資料

是次其他遊記

2010日本關西[追加中部]春の旅 | Day 7 Part 1 [TayThink / Travel / Toto]

標題： 令人著迷的神戶

Part 1 副標題：動漫化神戶的鉄人２８！

日期：2010年4月28日 (三)

天氣：晴

景點： 神戶、鉄人２８号、神戶塔、北野異人館、咖啡店、ケーキ屋 (Mont Plus) 、神戸鐵板燒牛排店 (ステーキランド)

美食： 神戸牛、草莓蛋榚 (ガトー･オ･フレーズ，Gatō. O. Furēzu ) 、法式劇院蛋榚 (オペラ，Opera) 、香橙蛋榚 (ヴァランシア，Valencia)

鉄人２８号 @神戶若松公園

喺 09年，想去東京同橫濱，原因係貴為動漫大國嘅日本會製造左一個 1 比 1 嘅動漫機械人 – 高達 (機動戦士ガンダム)，將漫畫世界帶到黎現實世界，短暫擺放响東京台場潮風公園！

而橫濱呢個日本最早對外開放嘅港口，同香港一樣係本土與西文化交滙嘅城市。為慶祝開港一百五十週年 (1859年正式對開放)，佢地搞左一連串嘅慶祝活動，當中包括開港博 + Y150展等等！

最後冇機會去東京睇高達，又冇去到橫濱參觀開港博…

不過，估唔到今日嚟神戶可以完全補返晒之前冇去東京、橫濱之旅！

因為，同年 (09年) 日人決定將另一個同樣燴炙人口嘅動漫機械人 – 鉄人２８号，同樣以 1：1嘅比例製作出黎，而且會永久擺放喺作者 横山光輝老師嘅故鄉 - 神戶市內！

而且，其實神戶只係遲過橫濱幾年對外開放（1868年），所以，同樣保留左好多當時西方嘅文化產物。

鉄人燈柱

雖然，神戶冇搞開港博，但係响呢個城市同樣可以感受一個日西交流嘅文化。

我地一早就出發，第一站先去睇鉄人２８，由大阪梅田JR站撘 嘅神戶快速唔洗一個鐘就到啦！

一落車沿住指示牌就先到左鉄人ストリート (Street)，全條街嘅燈柱就用左鉄人２８嗰頭造燈罩，日人叫佢做鉄人燈柱。
XD

一過左鉄人街，轉右入去，你就會見到有成18 米高、1 : 1 、喺半五個月前 (2009年11月25日) 先完成嘅鉄人２８号機械人所在地 – 若松公園鉄人廣場！

第一眼見到一個幾層樓高嘅 鉄人２８！真係要講句：「 "嘩！嘩！！嘩！！！真係好大個啊！！！！」

:O

鉄人２８被小朋友圍住了! :D

立即舉起「老戰友」對準鉄人２８「狂唰」！

見到鉄人２８嘅製作認真同細緻，更加感到佢雄偉嘅氣勢！

影左冇耐有一班幼稚園嘅小朋友黎參觀，佢地一見到鉄人２８就跑去攬實佢隻腳！個個都好似好鐘意佢咁！

跟住又有一位男士推住一位坐輪番嘅老婦人响鉄人２８前影相！

鉄人２８ Fighting!!

以為鉄人２８只係一個旅遊景點，不過眼見只有我地係遊客，其地到黎都係當地嘅日人，足見鉄人２８為當地人帶黎唔少嘅歡樂！

我繼續影相，不停咁擺唔同嘅 post 去襯托鉄人２８！XD

突然，聽到「咇咇…咇咇…」，「老戰友」第一舊電叫救命！！
>___<"

明明叉足電o架啦，仲有成日行程喎！點算呀！？

我地決定收手，同鉄人２８講再見，去下一站，醫肚先~
(喺 Part 2 嘅 Album 會有更多 鉄人２８嘅相，請耐心等候)

去旅行時，想了解當地文化，我諗最直接嘅方法，就係去品嚐當地美食同參觀當地嘅名勝古蹟！

廚師「手起刀落」

o黎到神戶，呢個深受西方文化影響百幾年嘅城市，當然要去試下食日西文化交流產業、舉名聞名嘅東洋美食 – 「神戸牛」啦！

撘JR唔洗10分鐘，就黎左呢間喺三宮駅 「神戸牛ステーキ専門店」，我地就試左一個「神戸牛ステーキランチ」 (神戸牛排午餐) 同 一個「ステーキLランチ」(牛排大午餐, L: 150g, S: 100g)。

如果唔係點分到神戸牛 (兵庫縣出產嘅牛，包括但馬 (日本三大和牛始袓)、佐賀牛、松板牛同近江牛)同普通牛嘅分別呢！？

o^______^o

好少食啲咩頂級牛排，更加唔識分咩國家、咩牛好味啲。

但係，喺呢度食神戶牛就一定會加分！

因為，佢地用鐵板燒嘅烹調方法，每張枱均六位客人，而一位廚師會喺客人面前泡製佢地預先點選嘅牛排，未食前見廚師「手起刀落」嘅刀法，先落牛油炒香蒜片，再炒雜菜，喺視覺同味覺上滿足之餘，更加令口水分泌激增，胃液更加儲到滿瀉，準備「一吞即化」！！

秒殺神戶牛！

廚師將牛排煎好嘅時間係 12點 27分！ 而我將成個定食食到「洗碟」咁係12點43分，只係用左17分鐘！！

真係秒殺神戶牛！！XD

食後感係神戸牛更加軟綿，但唔夠普通牛有牛味 (羶味)！！

用完口同胃去體會呢個神戶日西文化交嘅第一產業後，我地再用眼去繼續用我地雙腳同對眼去體會呢度獨特嘅歷史 – 北野異人館！！

北野異人館，其實係明治時代外國人喺北野區嘅住宅，依家變成左20幢有百年風情嘅古老大宅。

由三宮駅去北野異人館其實好簡單，只要你向北行、上一個微微嘅斜坡 – 北野坡，大該15分鐘就會到啦！

你話身上點會 "無啦啦" 有指南針！？點知邊度向北呀！？

神戶市《風見雞》

好！咁教你一個更加簡單嘅方法，就係搵下行人路上面嘅《雞標誌》，你跟住佢就會行到去異人館嘅啦！

而其實呢個《雞標誌》對神戶市係極具代表性！佢日文名叫做《風見雞》 (かざみどり | Kazami Dori)，佢唔係神戶另一種東洋美食 (所以，唔係叫神戶雞！哈哈！！)，更加唔係咩新品種嘅雞！

日文風見 (かざみ) 則係指風向計 / 風向儀。

喺 1909年，一個德國貿易商人G．托馬斯就喺北野區呢度起左一座有紅磚外牆，屋頂尖塔有一個用鐵皮打造嘅風向儀嘅大宅。

而呢位德國人就用左雞圖案做風向儀嘅點綴，成為左大宅嘅《風見雞》 ！

而因為大宅用獨特嘅紅磚做外牆，室內裝飾設計協調之餘又夠氣派，又擺放左好有價值嘅家具，日人就將命名為《風見雞の館》，成為左依家日本國家指定重要文物！！

前住「北野異人館」必走的 北野坡

亦係「北野異人館」嘅代表建築物！

由於咁重要，呢隻《風見雞》就漸漸成為左神戶嘅象徵！！差唔多凡係關於神戶嘅野都會見到呢隻雞！

o____O"

頭先講未去到異人館之前，要先走過一條微斜嘅行人路 – 北野坡，估唔到呢條咁普通嘅行人路係令我愛上神戶嘅開始，更估唔到埋下令我地兩部相機、四舊電完全用晒嘅伏線 …

…待續

更多資料
是次其他遊記