大峽谷! 我感受著你的浩大
***重點景點: Grand Canyon West Skywalk + Las Vegas Night Tour***
準時起床, 準時到達候車處, 一路食住早餐, 一路等旅遊巴同這位"有趣又狂燥導遊" (係! 我會用有趣o黎形容佢, 因為佢好似繹演緊一個唔屬於自己o既位置, 好唔協調, 見到佢俾佢激死但又覺得好過癮!)!!
[Click "View Album"去睇細相(Thumbnail Mode)同相片註解]
無論如何, 我只希望佢今日冇咁燥, 我唔想一大清早隻耳仔就受罪~~
比原定時間遲o左15分鐘, 終於見到架巴士o黎啦!
上到架巴士, 見到"狂燥導遊"變o左"黑面狂燥導遊", 心知今日o既小小願望又要泡湯了~~ -_____-"
我想該是昨夜國內o既團友去夜遊再加睇show(如果香港團係咁o既安排, 一定俾人嘈爆!!), 再有些團友去玩兩手, 遲o左起床! 所以, 遲了15分鐘~ 我地港團冇乜唔好o既反應,
1. 大家認為去旅行遲少少可以接受
2. 雖然, 車程遠, 但集合時間真係早o左d~
我們上到車"黑面神"一直冇開咪講野, 不過, 只過了一陣, "黑面神"拿起咪, 我借定聾耳陳隻耳~
"黑面神"開始講: "我說過要準時o架啦! 依家你地遲o左, 我唔知你地入到大峽谷要等幾耐! 你地嘥緊自己時間唔係嘥我o既時間! 我可以話俾你地聽 [大家注意這時"黑面神"o既名句出現!! 他以不正但自覺有趣的普通話說]今天你們永遠在人後面{jīn tiān nǐ men yǒng yuǎn zài rén hòu miàn}!
"黑面神"係架車度不停講呢句名句冇10次都起碼有9次! 真係好煩呀~~~~ -______________-"
"黑面神"眼見3架旅遊巴係我地前面, "黑面神"又說"我預o左呀啦~~ 大峽谷上面今日一定兵荒馬亂, 我都唔知你地上到去會點呀, ...."
全團人都懶得理佢!!! Hey, Man! 我地o黎旅行啫~ 你洗唔洗訓示我地咁耐呀! 重要我地港客冇遲到o架喎!!
之後, 佢繼續用名句訓示我地唔知幾多次後及經過差不多3小時o既車程, 我地終於到達西峽谷(Grand Canyon West)山腳o既入口處, 呢度印第安人管轄o既地方, 我地所有人都要落車, 要轉搭佢地安排o既車輛去第一站 (Hualapai Ranch, 即搭直昇機, 買門票同gift shop o既地方)!大家心情極興奮, 一來可能好多人都係第一次o黎大峽谷, 二來咁唔洗聽"黑面神"o既名句, 甩難luuu~~ 就算大家只係車站也忍不著東走西走咁去影相~~
係這個印第安人管轄o既地方"黑面神"也只可同我地一齊等, 突然, 我聽到兩位國內uncle級o既團友笑笑口同佢傾計, 我以為佢地講緊第一個景點o既野, 咁咪八掛走去聽o下law, 哈!哈哈!!! 原來係兩位uncle頂佢唔順, 要訓示番佢轉頭~~
搞笑o既Uncle笑笑口就話: "... 我地o黎呢度就係o黎嘥時間o架啦! 你好想做第一咩? 咁你聽日兩點鐘morning call 我地, 我地三點鐘就係lobby等你, 你話3點就3點, 2點就2點, 我地咁就實第一個o黎呢到啦! ..."
"黑面神"俾人寸到唔知點回應, 佢只有苦笑,我呢? 我就笑到攣晒腰~~ 佢見到我咁, 佢就仲更加尷尬~~ 我真係唔想笑到咁樣, 不過自己個腦同身體好自然咁反應晒出o黎~ (也可能係咁, 被"黑面神"鎖定我地為報復為目標!)
點解我之前話今次團o既國內同胞素質高, 也是因為這兩位uncle, 唔洗嚕嚕嘈, 笑笑口咁就寸爆o左"黑面神"!! 勁! :p + XD
去到第一個站, 有d團友(3分1)就準備去o左搭直昇機+坐快艇遊科羅拉多河(Colorado River), (簡稱海陸空, US$178), 我地就決定行skywalk(US$32)!
等"黑面神"拿Skywalk門票(手帶來的)給我們就會去下一站Eagle Point行skywalk. 其實"黑面神"可能見咁多人行skywalk, 冇乜人玩海陸空(即係油水少o左), 係車上已經不停咁踏skywalk, 話佢名不副實, 太短, 又唔好玩! 話玩海陸空就唔同啦! 又刺激又好玩! (好鬼死hardsell -_____-")
一來媽媽同二家姐都玩過海陸空(也覺得都好玩同刺激), 二來四個人玩就好鬼貴, 我又真的沒多太興趣了~ 因為佢地只係載你到谷底再快艇, 如果架直昇機可以係峽谷中穿梭我就會覺得值得去玩.
又坐另一架shuttle bus去Eagle Point. (跟著架shuttle會去, 另一個景點Guano Point, 再返去gift shop)
到了Eagle Point, 落車已經好興奮, 第一次係咁高o既懸崖影相, 我自己都唔敢行咁邊, 因為我肯定跌落去應該冇人同你執你d ... law, 但有d鬼妹就好大膽係條邊邊度行來行去. 好了終於可以行Skywalk, 我地要把所有行李同相機放低 , 行之前要穿上鞋套, 嚇你行花佢塊o既玻璃, 跟著我地後面o既意大利伯伯, 就不停鬧美國佬痴線, 景點都唔俾人拿相機影想 ... 伯伯你又冇錯o既, 不過, 你咁嚕嘈都冇用o架~
成條Skywalk建係4000尺的谷底上, 咁4000尺有幾高呢? 台灣o既101係1671尺! Skywalk就係佢o既兩倍半幾! 而澳門旅遊塔高1100尺, Skywalk差唔多係佢o既四倍!!!
兩條U形o既鐵從崖邊伸出來, U形鐵旁邊裝上約一尺o既白色膠(我認為)作為承托強化玻璃之用.
我諗係由於U形o既形狀同避免冷縮熱脹o既關係, 玻璃與玻璃之間隔著半吋的空隙, 有趣的是這個idea唔係當地原居民印第安人諗, 反而係一個名為David Jin o既華人發起, 華人真係厲害!!
踏上第一步也心驚驚~~ 畏高o既媽媽, 更全程拿著欄杆同靠著白色膠邊行, 風正面咁吹埋黎, 又見到玻璃隔o既空隙, 佢話都幾驚!
我企o左一陣就唔驚啦! 因為, 第一, 如果你跌落去一定死硬, 唔洗驚半生不死! 第二, 你正面咁從玻璃橋望到落谷底, 其實你好難知道你依家係幾高, 因為你所望到o既全部都係石頭, 大Do既石頭, 再大Do既石頭, 細Do既石頭, 或再細Do既石頭... 你好難感受到有幾高, 所以, 我覺得澳門旅遊塔俾我o既感覺仲驚d, 因為你係地面搭lift到頂層, 你已感受到它的高度一次, 你再企係玻璃上, 你又會見下面路上o既車來車往, 它們的細小反而令你更感到自己身處o既高度!!我諗成條skywalk長幾十米, 快o既話兩, 三分鐘就行完! 不過, 佢地又唔會俾你咁單調行完就走, 係skywalk上會有3個影相點, "幫"你影相!
<--- 我就影o左呢張相!
^______^
可能有人會問點解唔叫skywalk point, 而叫做Eagle point呢?原因係因為從這裡可以看見一個山崖, 山崖像呈現一隻展開翅膀o既鷹從空中飛下來, 想睇清楚d就可以去我個Album度 ...
之後, 咁我地就去第二站 Guano point, 大家可以爬上去拍影一個個細小o既石山幽, 食店供應西式buffet (Eagle Point 係供應中式套餐), 大家可以在懸崖邊用餐, 又真係幾好feel ...回程到另一個景點Hoover Dam (胡佛水壩), 係成個trip最...熱o既地方!! 一個碗形o既地方, 經過一個烈日當空的中午, 氣溫該有40度以上!!!
@______@"
這樣熱o既天氣, 令伴我作戰多年的"老戰友"(我部DC)就在這裡陣亡了~~ 餘下個trip只能用傻瓜機, ... 好慘呀!!! :'(<--- 這就是"老戰友"幫我留住的最後畫面! (回到酒店certify死亡的照片)
回程時我地去o左LVo既China Town逛一逛, 見到有豆漿賣, 就一人買o左一杯, 返回旅遊巴上~
"黑面神"終於找到機會作出小報復, 開車後, 當時二家姐坐係較前排, 可能佢個樣生得細個, "黑面神"走去佢度同佢講"我唔係第一日就同你地講, 除o左水你地唔好帶任何食物上車o既咩?" (我落o左車先知"黑面神"同二家姐講乜) 大家上車時已估到"黑面神"會搞搞震, 所以, 二家姐也只答佢一句"得啦!"
我可以講"黑面神", 你真係Axx Hole!! 我夠膽就同我講, 睇我會唔會剷你上天棚!!!!!!!
我地係反o左你o既"天規", 岩唔岩我地都係你o既客呀! 大家都係成年人, 杯豆漿係用蓋封好, 要用飲管飲個隻, 車程只係五分鐘, 整污穢你架車o既機會大家心理有數啦! 你男人老狗仲要去"烚"個睇落細個o既女仔黎嘈!! 你唔係Axx Hole!? 係乜!?
其實全團人都忍緊"黑面神"(包括領隊), 我真係未遇過咁o既導遊!!
連同團中最常笑臉迎人o既auntie都話"我跟團咁耐, 都未試過好次今次咁, 咁想鬧個導遊!"
我落車個陣都想陣番"黑面神"一句, 不過, 我最後收番, 我唔想教精佢, 等佢呢種生物自然死亡算, 唔值得嘥我d氣~~
我地定唔會俾你o黎D Axx Hole影響我地o既trip!
回到酒店結束同"黑面神"在LV之旅, 我地稍作休息就去LV夜遊, 新舊城各有特色, 舊城區有長長o既天幕show比旺角朗xx的大只少10倍! 新城o既酒店就以華麗見稱, 如威尼斯人中的威尼斯式裝修, Bellagio就有巨大o既音樂噴水池show, 再有用上2千美元一塊o既玻璃荷花砌成o既天花裝飾同數個月就換上全場"花"妝的四季花園 ...大峽谷的浩大, 美國人的瘋狂, 打造出這個不可能且每一分鐘也用錢打造出來的城市 --- Las Vegas, 拉斯韋加斯!!
Start from 2006 ...
沒有留言:
發佈留言