日期：2010年4月27 (二)
天氣：陰天 + 雨
景點： 和歌山 貴志駅、たま (猫の駅長)
美食： 未有，捱麵包去探貓
我地今朝一早就起身，因為太心急要去探一隻老喵！
我地早餐都唔食，就走去搭火車啦！
因為，我地要去一個鄉下地方，路途遙遠！剩係車程都差唔多要搭成 2個幾鐘頭！！ 所以，我地都做足準備，琴晚專登買定麵包當早餐，亦帶夠水去呢個長征！
點解要探呢隻喵！？ 而呢個又係咩鄉下地方呢！？
 |
| たま(TAMA) 猫の駅長！！ |
雖然，佢個名發音叫 Tama，但係其實佢中文嘅意思就叫「小玉」，而且佢係女仔黎架！
我點解會話佢係老喵？ 因為，佢喺 1999年4月29日出世，今年已經 12歲啦！！以人嘅年齡計算，就即係 60歲啦！
所以，你可以叫佢做「小玉貓婆婆駅長」！
XD
好，先講講點解冇端端有搵 たま(TAMA) 做貴志站駅長嘅念頭先！
其實，2003年，呢條貴志川線 (由和歌山站至貴志站，而貴志站就係呢條線嘅尾站) ，因為嚴重虧損，原本營運嘅南海電鉄諗住執左呢條線！ 不過，另一間公司和歌山電鐵嘅子公司岡山電気軌道決定研究接手，不過，去到 2006年4月正式接手同開幕後，當時電鐵嘅社長小嶋光信先生仍然驚因為人數唔夠，而營運唔住，構思點樣可以節流。
其中一個想法就係將貴志站「無駅長化」，由當時貴志站小賣店 – 「小山商店」嘅店長 – 小山利子小姐做埋駅長！！
但係，原來小山小姐一直都有餵詞商店附近嘅一班街貓，而且仲收養左可愛又友善嘅 たま(TAMA) 呢隻三色貓同佢媽媽 ミーコ (Miko，虎紋貓) ！
小嶋光信社長靈機一觸，諗到日本人都鍾意「招財貓」(招き猫) 呢個觀念，同小山小姐商量不如就任命可愛又親切嘅 たま(TAMA) 做呢度嘅駅長啦！！
たま(TAMA) 駅長嘅工作就係要戴著站長帽子，去招呼乘客！
而俾 たま(TAMA) 嘅任期係「終身僱用」！而佢嘅年薪就係一年嘅貓糧！！
XD
不過，冇人會估到 2007年1月5日任命左 たま(TAMA) 做駅長，果個月嘅乘客量比上年同期升左17%！！
O_____o"
而 2007年，電鉄公司推出嘅「草莓列車」(いちご電車)同 たま駅長令公司成年嘅乘客量激增左 40%！而関西大学估計佢為和歌山県嘅旅遊業帶黎 11億円嘅經濟效益！
11億円！！
O____O"
2008年，將 たま(TAMA) 命為「 スーパー駅長 」(SUPER 站長)及「 和歌山電鐵 執行役員 」(行政總裁)，而且佢仲有自己嘅「辦公室」(由舊售票櫃位改裝而成，2月拆)！佢亦有兩位助手，分別係 たま(TAMA) 嘅媽媽 ミーコ (Miko，不過09年7月過左世 :... ) 同 ちび (Chibi) ！ たま(TAMA) 亦都有一個「 和歌山県勲功爵 」嘅稱號！！
 |
| 「たま電車」(電車編號：2275) |
而 2009年3月，電鉄公司亦將和歌山電鐵 2270系嘅電車改裝及製作左一架以 たま為主題嘅「たま電車」(電車編號：2275)
佢除左吸引到國內嘅朋友，亦都吸引到國外嘅朋友，遠至意大利嘅製作人都為佢拍左一套紀錄片(法語同德語)，响歐洲嘅電視台播放！！
O____O" x 1,000！！
真係超厲害！ すごいね(Sugoite ne)！！
電鉄公司亦為 たま興建新車站，以古老風格而建，外型十足十一隻貓，可為落足心思。
我地 4月去，2月就拆左舊車站，新車站又未成形，所以都預左去到都係地盤一個。不過，我地一心都只係為左探下呢位「超級婆婆貓駅長」！
好，交代完我地點解咁想去探 たま(TAMA) ，講下我地點搭車先。
我地會由大阪JR駅出發搭去和歌山JR駅，再由和歌山JR駅轉乘貴志川電鉄線去貴志駅！
 |
| JR [關空快速 / 紀州路快速] (Airport & Kishuji Rapid Service) |
答案係呢架火車又係關空快速 ，又係紀州路快速，因為佢係一架會「分體嘅火車」！！
 |
| 「分體嘅火車」 |
所以，唔好上錯卡，如果唔係會去左機場o架啦！！
XD
咁你又唔洗咁驚上錯卡，日人最出名就係 Information Design，簡、清又易明，唔識日文淨係睇圖都知發生乜事，你喺月台排隊嘅時候，每一卡排隊嘅位置都會有指示圖，題示你喺邊卡同有冇排錯卡。
不過，其實，原來「分體火車」喺繁忙嘅火車系統好普遍，所以，歐洲同日本會好常見，我諗好多朋友都知道同搭過，不過我呢個「大鄉里出省」，自然見到呢啲「奇景」就覺得超新奇同有趣啦！
喺火車分體嘅一刻，仲唔停咁影相，我諗同個卡嘅日人會當我係傻佬，哈哈！
不過，接觸新事物先係旅行嘅其中一樣樂趣，right！？
:D
列車分體後，由日根野駅再坐多大該廿分鐘度就會到和歌山駅，行去最外面嘅月台就係乘搭貴志川電鉄線，去貴志駅！！
由於有唔同主題嘅電車行走貴志川線，所以，你可以夾下時間 (和歌山電鐵株式会社 時刻表 ) 搭邊款電車，除左「たま電車」，佢地仲有兩款分別以士多啤利梨同玩具做主題嘅電鉄，分別係「草莓列車」(いちご電車) 同玩具電車 (おもちゃ電車)！！
因為我地想搭「たま電車」，所以，就要等下一班車，「轟轟轟~~ 咇咇~~」，終於，等到「たま電車」埋站啦！ 大約停喺度10分鐘先會開出，我地當然唔會嘥呢10分鐘，不停影佢個車身！
全個白色嘅車身貼滿「たま」嘅卡通造型，而佢嘅造型都係喵喵嘅生活形態，如果，你係貓痴，一定會瘋狂起黎！
車頭或車尾都有「たま」嘅徽章，係徽章兩邊都加左「三劃」扮貓鬚，徽章即刻變左貓鼻，成架車更加可愛！！
而門同窗嘅玻璃佢都有「たま」嘅卡通 Look，真係「夠晒心思」，「好有誠意」同「超級可愛」！！
 |
| 「たま電車」 |
電車就黎開車啦！我地「轉戰」車廂內。突然間，有一個疑似東南亞嘅後生仔拖著一個大喼走上車，跟住好心急猛咁向車外「YAP」手，原來係佢阿爸同阿媽跟住係後面！ 佢地呢三位黎至東南亞嘅粉絲上車後，都唔甘心，要跳返出車，影幾張車身相先！
「たま」嘅威力真利害！
開始廣播電車將要開車嘅訊息，我地都開始準備「地毯式」參觀車廂內。車門正要閂嘅時候，突然，又有人衝入車！應該用跳入車貼切啲！
因為，真係「嘭」一聲，正當我地打量緊佢係咪我地港人嘅時間 (因為我地港人都慣左飛入車廂)，發現佢應該係一個日人大姐，手上攞住旅遊書，坐左喺位度仲喘緊氣！！ 又一個「たま」粉絲！！
其實，今日係星期二又唔係繁忙時間，响和歌山駅上車嘅乘客唔算多，成車唔過廿個，不過，你都數到最少有 6個人係黎探「たま」，佔左 20-30%！！
可想而知呢位「 スーパー婆婆猫の駅長 」(SUPER 婆婆貓站長) 吸客威力，果然「名不虛傳」！！
好！爭取時間開始「地毯式」參觀車廂！
講真電車公司真係用心用力用錢打造呢架車，「たま電車」真係唔係得個外表，車廂內同樣有花盡心思嘅佈置！
 |
| 「たま」嘅貓腳印 |
車廂內有小型圖書館又有飾櫃，當然個飾櫃係擺左「たま」嘅精品，明賣廣告，而每卡都掛滿「たま」嘅暖簾 (のれん)。
最有趣係車廂內有「たま駅長」同佢手下嘅辦公室！ 當然，「たま」唔會日日都响度辦公，但係，有特別盛會佢就會登上列車「巡視業務」！
如果，你再細心觀察下，你會見到地下印有「たま」嘅貓腳印，真窩心！！
有時我都會佩服日人嘅細緻心思同膽識，試問香港嘅大公司又點會肯為一條「蝕本」嘅線路去花心思，又點會接受用一隻貓做駅長嘅概念！？你試下提議俾你上司 (唔洗去到波士度)，佢嘅答覆可能會係「你唔好搞咁多野啦！…笠左佢算啦！…你咪癲啦！」之類嘅說話。
呢樣亦都係我地港人值得思考下嘅地方，唔改變傳統嘅思想，真係唔好學人講咩創意工業啦！！
 |
| 貴志駅 |
Boo Boo，電車埋站啦，經過30分鐘嘅車程終於到左貴志站！
一落車真係見到地盤一個，而且個車站都係木搭成嘅，我地真係冇預計到會差咁遠！
o_____O"
不過，遠望都見到「小山商店」，雖然都係臨時搭建，不過，佢一日有開門，即係話我地都有機會可以見到「たま」！
2分鐘唔洗就可以由車站去到臨時嘅「小山商店」，「たま」冇好似平常咁响門外招待我地呢啲客人，而係喺佢嘅辦公室 (貓籠)裡面瞓覺豬！
>____<
 |
| 「たま」瞓到好似隻死豬咁 |
:{
最後，我地唔忍心嘈醒佢，咁就喺「小山商店」買左少少紀念品同短暫停留就搭車返大阪難波lu~~
唔知可唔可以喺佢「貓」生之年可以見到、摸到佢一下同佢講句：「たま駅長，こんにちは (Kon'nichiwa)。」
-____________-
所以，我地決定要 …
所有 Day 6 照片及相簿投影播放會喺 Day 6 Part 2 出現！
…待續
PS: 想去又未去嘅朋友，你地唔洗驚啦！因為貴志駅已經响今年 8月4日重建完成啦！而且，叫做「たま駅舎」，而且外貌又係好花心思嘅設計！
o^______^o
 |
| 和歌山電鉄貴志川線貴志駅の「たま駅舎」 img: .nikkeibp.co.jp |
更多資料
1 .たま駅長の現在の勤務時間表
2. 和歌山電車時刻表
3.「市民列車でいこう！！”貴志川線応援ブログ”」の記事 [含たま最新資訊]
4. 其他是次遊記
たま駅長に会いにいく
沒有留言:
發佈留言