Tay's Web Diary: 期待的驚喜 – 東京 Sky Tree (スカイツリー)！ [Travel @ Japan / Info]

談及國家：日本、新加坡、加拿大、香港

談及地區：東京 (Tokyo) / 瀬戸内海 / 直島 / 墨田區 + 台東區 / 聖淘沙 (Sentosa) / 多倫多 (Toronto)

/ 維多利亞港 (Victoria Harbor)

[亞洲, 北美]

談及季節：─

談及節日：─

談及話題：Sky Tree (スカイツリー) 、Lighting Design

就黎到12月，又係旅遊旺季嘅時候，身邊唔少朋友都已經開始籌備去邊度旅行！

自己面對唔同嘅不明朗因素，所以就冇諗過聖誕去旅行啦！不過，幫朋友諗去邊度旅行都覺得開心！

介紹左之前自己想去嘅地方畀佢，好似新加坡嘅 infinite pool、日本嘅瀬戸内海 & 直島錢湯 …討論過程自己都覺得好興奮！

o^______^o

其實，就算冇得去，自己對世界各地嘅旅遊資訊依然好熱衷，其中一個最感興趣嘅就係喺 2012年初會喺日本東京開幕嘅 Sky Tree (スカイツリー | Sukai Tsurī )！！

東京Sky Tree (スカイツリー)
img: denko.panasonic.biz

佢位於日本東京嘅較東嘅位置 – 墨田和台東地區，其實 Sky Tree係一個數碼電視廣播塔，高634米比只有 250米高嘅東京鐵塔，足足高左兩倍半有多！！

2011年7月，全日本電視廣播就會完全轉用數碼廣播，為左避免數碼廣播訊號會俾東京嘅高樓大廈阻擋，日人就決定起 Sky Tree，將會成為全球第一高嘅自立式電塔，高過喺多倫多有554米高嘅 CN TOWER！

日本A記啤酒，Sky Tree限定版

雖然，2012年先開幕但係日人已經好期待，好多唔同嘅產品已經推出！之前有朋友去日本旅行時，我叫佢幫我買罐 A記紀念版啤酒，可惜搵唔到！

不過，真係幾欣賞佢地當中嘅兩個心思。第一佢地揀左喺東京較東呢個老區都起呢個全日本嘅新地標，除左可能因為選址唔會影響到其他人，另一方面係佢地想 Sky Tree 可以振興呢個區嘅經濟發展！！

而且，另一個心思就係佢地為 Sky Tree做嘅燈光設計！

講之前，我真係好想問下大家有幾多港人會覺得我地維港嘅「幻彩詠香江」好睇同靚先！？

雖然，官網話佢有5個主題，而且仲列入左健力士世界紀錄，成為全球「最大型燈光音樂匯演」，不過，我自己就覺得唔創新之餘，又全冇主題同更加係佢亂閃一通。最重要係有幾多遊客鍾意睇呢？

首先，未有「幻彩詠香江」之前，我去過廣州珠江夜遊，人地兩岸嘅大厦已經玩緊用激光射黎射去！你話有咩新意呢？

咁明明有主題，我又點解會話冇主題呢！？因為，我覺得未必人人可以喺官方所講嘅最佳位置 – 星光大道度睇。如果，你係遊客又喺可以望到維港嘅餐廳度食飯，餐廳又未必會播「幻彩詠香江」嘅主題音樂。

雖然話表演時間會有唔同電台頻道會播緊主題音樂，不過我諗唔會有遊客會帶住個可以收到香港電台嘅收音機黎香港旅行，仲要記得同識得扭去播緊主題音樂嗰個台度！

如果，你唔係聽住首主題音樂，只係會見到唔同嘅大厦嘅燈同激光响度亂咁閃黎閃去、射黎射去！都唔知會有好多遊客會話「唔知佢做乜！？」。

我地又唔係睇煙花，如果係睇煙花我地先會追求澎湃同震撼感。但係由於個匯演有咁多橦大厦參與，唔夠集中就更加令匯演顯得唔澎湃！

而我覺得欣賞夜景嘅首要條件係「靜」！呢個「靜」係指不論係視覺、聽覺同感覺！因為「欣賞」呢個動詞已經有「慢」、「靜」同「細心」嘅意思。所以，我個人只係覺得「幻彩詠香江」只係破壞左香港或者世界一件「活嘅藝術品」。我地可以又諗諗世界其他嗰兩大夜景，邊個會好似香港咁閃黎閃去呢！？「幻彩詠香江」係咪旅客鍾意嘅表演呢！？

如果，連大部份港人都唔鍾意，外內地嘅朋友有點會鍾意呢！？

好啦！講番 SkyTree 嘅燈光設計先！

佢地嘅概念只有一個，就係「由古代江戶時代、今天與未來的日本，也不間斷地聯繫每人的心」！

心意気の「粋」、美意識の「雅」
img: tokyo-skytree

所以，佢地只係揀左兩種燈光嘅顏色，第一隻係「江戸紫」，代表日本傳統美學嘅「雅」，即優雅、精緻且懇摯。

另一隻係「水」，代表日本嘅「粋」( 音：いき Iki) 精神意志，亦係一個江戶時代流行至今嘅日文漢字！有好多唔同嘅意思現代係指瀟灑、時髦同高質，而古時就指日本獨特美、原創同純潔性。

「光の冠」
img: tokyo-skytree

而每節塔嘅頂部都會配上白光環，名為「光の冠」，其喻意為江戸時代富士山閃爍雪頂嘅原貌。

由揀燈光顏色選擇同配搭已經知道日人嘅心思，先揀左兩隻擁有強烈「原屬感」嘅顏色，再將自己國家族最具「代表性」嘅富士山嘅原素放入呢個設計裡面。

有好嘅設計亦都要好嘅硬件去配合，佢地全用上 LED燈以確保環保，而且，亦用最先進科技嘅 3D 色彩光源，由一個大型綜合控制室控制全塔嘅燈效，令整個設計都可以呈現喺觀賞人嘅眼前！

高透明度令到有興趣嘅人可以好容易去了解同明白，而再加上唔同嘅軟、硬嘅宣傳（連吉祥物都去左啦！佢叫 Sorakara Chan, 雖然係女仔，不過應該唔係陳小姐，哈哈！！），令全國嘅日人對 Sky Tree 更投入，更加期待！

香港係一個中西文化交錯嘅地方，相比世界各地唔同國家香港嘅歷史亦好短，搵具代表性嘅「原屬感」可能唔易，但係呢個就正正係俾作為香港設計師嘅一個很好嘅課題！

日人計劃以 SkyTree 黎振興呢個老區，又有為全面覆蓋數碼廣播之用，亦想佢成為世界焦點，帶動旅遊同經濟！佢地成唔成功未知，不過，對於一眾國內嘅日人已經好雀躍同熱切期待！

試問我地當時「幻彩匯香江」開始首演又有幾多港人會關心同期待，依家又有幾多港人停步黎睇「幻彩匯香江」！？

更多資料：

官方網上電視台對SkyTree 詳細介紹

http://www.rising-east.jp/webtv/news/cat22/post-11.html

官網對燈光設計介紹 (日文，含更詳盡資料)