TayThink / Toto / Travel --- 秋季日本郊遊 遊後感

日本係一個深受大自然煎熬既島國, 地震火山爆發經常都有, 以往既日本人生活在惶恐當中.

依家既日本人冇討厭自己既國土, 反而愛著這個國土供及他們既資源! (但願如是吧!)


佢地鍾意浸溫泉, 可以鍾意到每日早午晚三次咁浸！擁有遼闊既海岸線, 全民也極愛食各種魚類也是全世界都知既事！

行入佢地喜愛既地方時, 好似係白川鄉咁, 佢地會連地上既污水蓋都設計一個屬於呢度既卡通公仔放係上面!

野猿公苑或白絲瀑布山路旁有一條污水渠, 佢地會用一塊塊既石頭砌到好靚!

好似好變態咁, 我真係好鍾意條渠喎! :P

日本人更是一個四季行樂既民族. 春天愛賞櫻花, 夏天愛去沙灘, 秋天愛賞紅葉, 冬天又有雪祭!

還記得上年日本天文台誤報櫻花盛放既時間, 要出黎道歉, 就知佢地幾著緊!

好羨慕佢地有四季分明既天氣, 更羨慕佢地全民都有著愛自然, 愛季節變化, 不停追著季節玩樂既心意!就算係大都會既東京中, 也常見各種既樹木花草! 天然同綠化工程也做得非常好!

極愛大自然既日本人亦同時也尊重大自然(除左鯨魚), 可能係佢地有著咁既態度, 佢地懂得和諧既設計(Harmony Design)!

草津溫泉區裡面一個小小招牌, 令我欣賞到日本人佢地對環境和諧既堅持同肯為和諧設計而犧牲既精神!
香港人(不單指商人, 也指香港既普遍顧客, 顧客<-->市場<-->商人, 大家永遠都係互相影響既關係呢!) 能有這樣的勇氣嗎!? 有這樣的遠見嗎?

係草津溫泉區草津溫泉區一個以白色同啡色為主題色既設計既旅遊區.唔 ... 點解用啡色, 我諗因為草津溫泉既地標 --- 湯畑, 係由一個個木箱組成, 自然就用木既顏色 --- 啡色來做主題色.

兩旁既店舖同溫泉酒店都係以一貫日本既建築顏色--- 素色: 白,黑,灰, 啡為主色. 單係呢一點香港也難以造到了!

當我攞著部相機, 影下呢度既地標:湯畑既時候, 冇一個地方或店舖會distract到我, 我(其他遊人)也只集中注意這個湯畑!

影影下既時候, 我發現一間店舖既招牌(頭先提到), 一個係香港甚至世界各地都見到既"數字"便利店 --- "些粉"既招牌!

一向都以白, 紅, 橙, 綠為主色既招牌, 係呢度改上呢度草津溫泉區既主題色! (攝於 秋季日本郊遊團 |Day 3|Part 2)

以往係香港老遠就見到呢間便利店, 今日竟然隱藏係草津溫泉區裡~

不論係呢度區內既人士要求呢間便利店除去佢原有既色彩, 定係呢間特許經營店既老闆自己既意思, 又或者經過多少既游說或法律文件既程序 ...

呢一刻, 為呢間便利店除去佢原有既色彩既人已經贏左我既歡心, 我連續影低這間便利店既中, 遠, 近既相, 不停咁叫MyV: "你睇下呢間7仔!你睇下呢間7仔!"去欣賞呢個Harmony Design! 其他人應該以為我痴線, 係鄉下出黎, 未見過7仔! ^____^"

可能你都會覺得我神經病, 不過, 要贏人地就係呢少少既堅持同執著! 我地中國人"學"野真係好快, 不過, 捕捉神緒同呢一份細緻就欠奉啦!

我鍾意日本人對自己既土地同環境既喜愛, 欣賞佢地既和諧同細心既設計(一個簡單既價錢貼紙, 一個產品既說明書或一個污水蓋就知啦!), 就係呢"少少"就知道佢地如何細膩對待自己既生活, 人生.

曾經有朋友話去北海道, 見到一對日本既公公婆婆去影花, 佢地好慢好慢咁set好部相機, set好個腳架, 左度右度, 我個朋友影完一轉相番黎(已經過左成個鐘咁泄), 佢地都仲係影緊同一朵花!!! o______0"

我諗我依家未必可以咁, 不過, 我想學習日本人對生活既細膩, 對周圍環境既awareness. 咁樣就知道自己與自然環境既存在, 欣賞當下, 欣賞自己, 欣賞自然!

o^_____^o


Start from 2006 ...

TayThink / Toto / Travel --- 秋季日本郊遊團 | 立山黑部 (Tateyama Kurobe) | 野猿公苑 (Yaenkoen)|Day 5

今日係呢個旅程既最後一日, 我地住兩國駅 (近相撲既競技館同江戶搏物館), 我地今日有幾個鐘頭既時間就要上機, 有D團友好厲害, 竟然去到迪士尼!! O____0" 其實 11:30 要返到酒店!!
我地就擇左去多年前朋友M介紹既地方 --- 上野アメ横丁(阿美街)!

去阿美街, 有幾個原因:
1. 近酒店, 由呢度去上野御徒町, 只雖5分鐘, 撘都營大江戶線, 車都唔洗轉就去到啦!
2. 呢度賣乾濕貨街, 啱晒兩位阿媽行!
3. 仲有成橦既玩具店, 啱晒我地行！小饅頭版(小金)就係呢到買架啦! :D
如果新宿係銅鑼灣, 上野阿美街就好似香港既旺角, 女人街+花園街! 掃手信一流既地方!!

輕輕鬆鬆(只係指心情, 兩手都係蠻沉重的~)行完阿美街, 我地返酒店PACK箱!

臨上機前, 我地先食個午餐, 烤肉自助餐, 嘗埋A4既神戶牛, 又係好滿足咁上機~~


玩完呢個秋季日本郊遊團!!!

回港努力工作!!!

^______^" + >________<"

東京上野アメ横丁+兩國酒店の地図




Start from 2006 ...

TayThink / Movie --- 同小魔怪去睇 崖の上のポニョ

From 秋季日本郊遊團|Day 5

日本上年大熱, 大收既宮崎駿電影: 崖の上のポニョ, 香港終於會係呢個星期六(17號)上畫啦!

連阿媽都話要睇, 一於捉埋大小魔怪一齊睇先!
買左星期六早場, 實行先睹為快!

對宮崎駿既電影一向都好期待, 加上令次係佢宣佈退休後復去出既第一部作品, 而且花o左四年時間製作!
再加上宮崎駿同佢既製作團, 係第一次開製作會議時講既第一句說話:
"今次我想拍一部連5歲小朋友都識睇既電影!"
... 實在太... 太 ... 期待啦!!


之前11月, 去日本旅行見到"波兒"既書(1600 yen, 好貴呀!)就即刻買左, 不過, 遲遲都未睇, 就係要等到睇完戲, 先攞出黎回味一番~

真係好緊張, 又好期待啊! o^____^o

等我聽可愛既波兒主題曲黎舒緩一下我緊張o既心情先~

1. 波兒日語主題曲(日本小妹妹現場版)
2. 波兒粵語主題曲由(香港6歲小妹妹主唱)

崖の上のポニョ (Official Site)

Start from 2006 ...

TayThink / Toto / Travel --- 秋季日本郊遊團 | 立山黑部 (Tateyama Kurobe) | 野猿公苑 (Yaenkoen) | Day 3 | Part 2

睇完馬騮後,我地去今日第二個景點, 有日本三大溫泉之稱既草津溫泉, (其他係北海道既登別同兵庫縣既有馬溫泉).
去草津溫泉前, 我地會先去佢既溫泉既源頭, 草津白根山, 一個活火山, 日本百大名山之一.
導遊話登白根山一D都唔輕鬆, 上次整團人行到一半都要折返, 凍都跑番落山~
心諗行山去睇馬騮又行左, 上雪山又上左, 今日天氣又咁好, 上白根山點會有問題呀~

點知一落車, 就知這次真係會唔容易!
雖然陽光普照, 不過呢度山頂好大風, 風到人都郁, 好凍~
而且, 我地都算處於高原既地方(白根山高為2160米, 我地大約係2000米),
由暖笠笠既車廂出到呢個空氣稀薄又凍又大風既山頂, 做帶氧運動, 不停行斜路登山, 真係一D都唔容易!
一路上山, 路既兩旁有兩間"避難所"以防火山爆發時, 入去避溶岩! 好驚啪啫! O___o"

用左比平時慢一倍既速度, 我地終於上到山頂: 湯釜, 一個帶有高濃度鹽酸既火山口湖, 形成淺藍色既湖水, 親上山頂白色既新雪同淺灰色既火山灰, 一幅美麗既圖畫~ 但這幅美麗既圖畫, 不能久留欣賞, 因為個頭好似就黎俾D風吹甩~

我地行番落山, 到手信店旁既i記咖啡店, 買左兩杯熱朱古力同一杯巨峰提子軟雪榚!!
係! 我果時係好矛盾! 愈凍愈想食D凍野~ :P

凍完後, 我地就上車去草津溫泉進發. 由山頂落去溫泉, 我地一定要感受下以賽車出名(頭文字D)既群馬県, 佢地山路裡既急彎 --- 髮夾彎!
雖然, 這裡冇藤原拓海, 冇A86又唔晌榛名山(はるなさん, 頭文字D既故事發生地), 不過, 我地有好既旅遊巴士司機: 高野先生, 我地雖然感受唔到飄移, 但我地感受到髮夾彎同高野先生駕駛技術既厲害!
我地到草津溫泉落車時, 冇人嘔又冇人暈~~ HAHAHA

草津溫泉既地標就係湯畑同湯畑旁一個供遊人手湯(浸手)同足湯(浸腳)既小溫泉.
由於白根山流落黎既泉水實在太熱, 不能立即引到各溫泉酒店俾住客享用, 所以, 當地人就用一個又一個既木箱將D水隔著, 涼凍D水, 再引到各溫泉酒店俾住客享用.

而供遊人手湯(浸手)同足湯(浸腳)既小型溫泉, 我就唔知叫乜名, 但我就俾左個大冬瓜溫泉既名俾佢! 因為, 我就係呢度又跌親! 搞到自己成個大冬瓜咁!

點解會跌親呢? 其實足湯既地方好細, 只有三邊可以坐~ 每邊只可以坐4個大人, 人人一見到有位就坐落去, 兩位阿媽同MyV都坐低左, 岩岩有空位, 咁大家好心急叫我坐低, 我自己當然都好心急啦~ 又除鞋除襪, 顧著同佢地影相, 又驚自己部相機會掂到D泉水, 點知當自己隻腳掂到泉水時, 先發覺原來未摺起條褲腳tim! 咁就立即縮番起腳啦~ 但因為坐既位置好淺, 重心一向後移就出事, 成個人翻左向後面跌左落地~
咁就出見左一個大冬瓜啦! 條腰瘀左一大"撻", 所有浸緊既足湯既香港同日本人都嚇一跳, 不過, 大家見我起番身, 無事都笑起黎~ 我就只好苦笑啦~ heeeeheeeeee
-_______-"

浸完足湯, 我地就到旁邊既名物販賣店, 買呢度既名物 --- 溫泉饅頭! 用溫泉水做既饅頭D皮好煙韌, 仲有好香既豆沙, 好好味啊!


做完大冬瓜, 我地去今日行程既最後一站: 淺間山鬼押出し園! (淺間山也是日本百大名山之一)

1783年火山爆發後既遺址, 當年死傷嚴重, 爆發後既岩石形成不同既形狀, 好似我地桂林既石林一樣, 不過我地到既時候已經較太晏, 又知道呢祿度係遺址, 天色差唔多已經黑晒, 冇左太陽, 氣溫又低, 配上黑到睇唔到既黑色溶岩石, 特別陰森~~ 真係一個名符其實既鬼地方 ...

冇野做唯有影張無聊相: 等我吹走淺間山既火山煙先!
參觀完鬼押出し園, 我地番酒店~ 今次旅程最靚既酒店: 輕井沢既小木屋酒店!

我地今次可以兩個人住一間小木屋, 每間屋可能有千多呎!! 每間屋有兩間房一個大廳! 大廳中有一張四人既飯枱, 而每間房又有兩張床, 果晚都唔知擇右邊張床好, 椗左邊張床好~~ 真係日本好少見既酒店!!


我地為左好好享受呢間酒店, 我們聽朝會去浸個早晨溫泉, 今晚就黎係房度黎個由北海道宅急便既宵夜, 鱈場蟹同牧丹蝦!

我後悔食左牧丹蝦先, 因為佢地實在太 ...太...太...甜甜甜甜甜甜甜啦~~~~~

大劑!! 又食到咁飽去瞓tim! 哎 ... 番香港要地獄式減肥啦!! (已經報左今年既馬拉松啦! :P)

草津白根山及草津溫泉の地図

檢視較大的地圖


Start from 2006 ...

TayThink / Toto / Travel --- 秋季日本郊遊團 | 立山黑部 (Tateyama Kurobe) | 野猿公苑 (Yaenkoen) | Day 3 | Part 1

馬騮溫泉, 野猿公苑 (Yaenkoen)位於長野(Nagago),(古名信州, 日本の令制国の一つ、信濃国の別称。現在の長野県。From Wiki), 途中經過小布施休息站,我地買左信川既名物(特產) --- 蘋果, 不過唔係大果隻而係細既"天子嬌囡", 細細粒, 帶著淡淡既蘋果香, 兩啖就食晒, 是很好o既健康小食. :P~~

入野猿溫泉呢個連National Geographic都有介紹過既世界唯一馬騮專用溫泉, 任何人都要行2km長既山路入, 2km山路出!

禽日上立山只可以話係登山, 因為全程都係撘車, 只在水霸行左一小段! 今日就算係第一次係日本行山啦!
唔 ... 感覺好舒服, 因為氣溫7度左右, 少少陽光, 少少風, 少少雲, 好爽呀!! 心情舒暢, 我地一路行一路影下呢度既山景.



未到野猿公苑入口前，有一個溫泉眼叫地獄谷溫泉, 泉眼不停噴出一條兩三層樓高既泉水, 旁邊有一間民宿既露天混湯, 即係男女一齊浸溫泉既露天風呂!!! :O

D馬騮仔就無理你咁好氣, 係成間酒店度通處走, 你有你浸, 佢有佢搵食! 今次有幸見到四位妙齡少女浸溫泉!! Wow! :P

大家唔洗諗著係我D相搵到呢四位日本妹啦! 我冇影到相, 雖然, 我帶左支長炮, 但學導遊話齋要"尊重別人嘛"! :) + :P

越接近野猿溫泉, 就越黎越多馬騮. 一過左條橋, 就見到一隻剛浸完溫泉, 成身濕晒既馬騮仔坐係欄杆度捉緊蚤同晾緊乾自己, 行埋佢果度差不多只有兩步既距離, 佢都唔會理你, 繼續捉佢既蚤!
再行多幾步, 就係野猿溫泉, 溫泉唔算大, 好似我地香港公共泳池裡既BB池咁大, 已經有10幾廿隻男男女女同一家大細既馬騮浸緊溫泉或坐係泉邊.

遊人不停攞起相機同D馬騮影相, 佢地成班就"眼超超"咁望番我地, 都唔知邊果係"被觀賞"o既一群 ... -_____-"
有D馬騮就唔理咁多, 努力咁幫其他馬騮捉蚤(其實應該係取鹽), 馬騮BB就最百厭, 又爬繩又捉著其他BB玩~

突然, 發現有D馬騮不停牛咁眼望著D泉水, 莫非個溫泉有溫泉魚!? 佢地想捉魚食!? 但係又唔似喎!
呀! 終於醒起係旅遊講座度, 講師話因為11月既天氣(當日係7度)對於呢D雪馬騮黎講係完全唔凍!

管理人員唔想我地呢D遠道而黎既遊人失望, 就會灑D豆落去個溫泉度, 等班雪馬騮,落去執豆, 順便又浸番個溫泉!
開頭仲驚D馬騮唔會出現, 或者唔會落溫泉, 原來馬騮唔會走, 因為掛著執豆! o___O"

睇完呢班咁識嘆既雪馬騮, 我地行番2公里出黎, 係小食店買左五平餅, 其實唔可以話係餅, 而係燒飯團, 岐阜縣一帶的街頭小食, 好好味呀!

我試過一間香港日式燒物店, 試過佢地既燒飯團, 成個飯團外燒得好脆, 裡面可能有鰻魚或其他野, 食起上黎就可能比較乾身.
呢個五平餅就啱啱相反, 佢係一個較濕既長形淨飯團, 包著一支木棍, 塗上日式既燒烤醬黎燒! 食起上黎因為有燒脆左燒烤醬, 同樣香脆!
但因為夠水份, 咬落去後, 熱辣辣米香就由飯團湧出黎, 好濃既米香,真係好好味架! おいしい!!!
食著美味既五平餅, 賞著前方既一撮紅葉, 好好feel啊!

睇完馬騮, 我地繼續前往其他景點, 途經志賀高原既蓮花駅, 1976年冬季奧運既會埸, 望著冇雪既滑雪場, 食sabu sabu, ok喎!

野猿公苑 + 地獄谷の地図

放大地圖


Start from 2006 ...

TayThink / Toto / Travel --- 秋季日本郊遊團 | 立山黑部 (Tateyama Kurobe) | 野猿公苑 (Yaenkoen)|Day 1

以前去旅行會做好多功課，今次只知少少有關景點既地理資料, 就怱怱忙忙上机了！
從＂面書網＂中看見友人P自由行已經身處大風雪中既立山！ 自己就分外興奮！諗都諗唔到第二次黎日本會選擇去立山 (Tateyama)這個鄉下地方行山！！其實好彩睇到朋友P既相，如果唔係我地就唔識準備厚衫以抗風雪!

臨上机好好利用香港國際機場o既免費資源 --- 無線網路, 再上＂面書網＂check下朋友P果邊既情況, 佢地一家已經到達白川鄉，留埋個comment就上机。

飛機上看見我地既飛行航程會經過韓國既斧山（Busan），一個本來10月會去既地方，（朋友B幫手安排去參加斧山電影節），依家變左黎立山， 第一晚既酒店仲要住係日本既富山(Toyama)，過幾個鐘又可能會同朋友P一家係名古屋碰面，真係幾搞笑! :D

4個鐘多d既機程後我地到達名古屋這個較新既機場「中部空港」，（三年前為愛知世界博覽起既，朋友M三年前就去左， 仲買左個世博「孫仔」匙扣，依家掛左係我公司既芒上）。

黎到名古屋無機會撞到友人P， 因為只係短暫停留，黎個早既晚飯（曰本時間5點鐘）就要趕車入富山縣既酒店了, 車程都差不多四個鐘！是日晚餐是「 手桶定食」！！ 又幾好味喎！

食飽後就撘三個鐘頭車入富山縣，準備聽日去白川鄉同上立山！！

在飛驒高山(Hida Takayama)公路途中寫下

PS:多謝是次司機：高野先生(Takano San)同導遊：Paulo San

富山酒店の地図

檢視較大的地圖

Start from 2006 ...

TayThink / Toto / Travel --- 秋季日本郊遊團 | 立山黑部 (Tateyama Kurobe) | 野猿公苑 (Yaenkoen) | Day 4

我地一大清早就去左酒店內既溫泉, 有幾早? 又係6:30出發! 7:00正入去到浸溫泉! 都係男女分開, 也有室內同露天風呂~ 不過, 男女湯中間, 有一個要著泳衣既混湯, 也有一個足湯~ D小朋友就當係嬉水池~ -________-"
浸完溫泉, 我地行番我地住既小木屋, 影下路上既紅葉~ :D
呢度係我地今次旅程最多紅葉既地方! :( + :)

食完個日洋式既自助早餐, 我地就去今日既景點亦係我地伐呢次旅程最後一個自然景點, 白絲瀑布!
瀑布離酒店只係廿分鐘既車程，落車伙後行兩分鐘就到啦~
白絲瀑布既名就係個瀑布好似白頭髮一樣~ 你地話似唔似?

停車場旁有不少既小商店, 當中有鹽燒河魚叔叔, 好多人幫親啊! 我地剛食完早餐, 實在太飽就試唔到啦~

做完晨運後, 我地就進入"購物模式", 到酒店內既outlet逛街, 購物!
其實, 我地住既呢間輕井沢酒店, 係一間大型娛樂式酒店, 有得打golf, 滑雪, 浸溫泉外, 佢地有一個大型既outlet, outlet 更分為 East, WEST, NEW EAST, NEW WEST 同食街, 真係一條街, 裡面開滿十幾廿間不同既食店!
鋪頭就唔知有幾多間啦! 法國既an耶s bay, 美國既n_ke, add_as, L.L. 豆, ... 你地自己係相簿到數啦! 估中可能有獎! :P
當中法國既an耶s bay就最平, 有個香港賣緊1300蚊既袋, 佢地賣5000yen, 既係400蚊!! 嘩!! 平成2/3!!!! o____O"

我就買左兩個UB既環保袋, 我一年多前知道日本呢度UB好有心機設計既環保袋, 香港就見唔到有得賣! :D


行到咁上下我地就去左食街醫肚, 食义繞拉麵同餃子! 咸左D, 大過都幾好味!

點知食完後, 見到一間好正既麵包鋪, 香港都成日見到既法國"抵你發"麵包鋪, 兩位阿媽話D包好靚, 又買左幾個 ... 不過, 真係靚過香港既~

行下有見到一間呢度出名日製新鮮果醬店, 咁又不停試食! 食左廿幾款醬!! 飽上加飽!! @_____@"

行完呢個OUTLET, 我地會搭子彈火車落東京，行新宿！第一次, 搭子彈火車, 感覺!? 冇, 因為, 差唔多全程都瞓著左! :P

到左新宿, 各團友就全力出擊逛公司, 我地都係逛公司, 不過, 我地就去行高_屋既超級市場, 睇下佢地賣既貴價生果, 一入公司大門已經普通話大使同我地介紹, 非常親切, 不過, 唔似去左日本~ 如此同時, 也察覺到我國同胞消費力之高是多厲害!

我地買左好靚既富有柿! 再去歌舞技町附近既百果園買世界一蘋果, 巨峰提子同梨!! 又足足平香港2/3!!
同份量同包裝既巨峰提子香港賣198, 呢度賣1000yen, 即80蚊! 仲要係新鮮好多! >___<
Hand carry 都要帶晒佢地番香港!!

左去買(幫人買)化妝品同藥品, 又一大袋一大袋咁返酒店!

輕井沢酒店同白絲瀑布の地図

檢視較大的地圖

Start from 2006 ...

TayThink / Travel / Info / Fun --- 秋季日本郊遊 遊後感二

資料一: (導遊の解說)
大吟嚷, 最高級既日本米酒，咁次一級既又叫乜名呢? 就係冇左個"大"字 --- 吟嚷.
最注重水質同米質! 靚水加靚米就咁就釀, 唔會好似中國製既落藥材, 又蒸幾多次.

吟嚷既製作只用米心, 將米既表面不要, 打磨至原本大細既70%先攞去釀!
如要稱得上大吟嚷, 首先每粒米一定只會用手洗, 再將米打磨至淨番4%先攞去釀.
知道佢既製作過程, 咁千零二千円就有一支大吟嚷, 又真係一D都唔貴喎！


資料二:
立山黒部アルペンルート オフィシャルガイド (Tateyama Kurobe Alpine Route)
http://www.alpen-route.com/tw/index.html

資料三:
合掌村 [Live camera]
http://shirakawa-go.org/live-user/e-monitor.asp

資料四:
馬騮溫泉, 野猿公苑 (Yaenkoen) [Live camera]
http://www.jigokudani-yaenkoen.co.jp/livecam/monkey/index.htm

資料五:
岐阜県白川村 --- 白川郷の紅葉
http://www.rurubu.com/season/autumn/koyo/detail.asp?SozaiNo=210010

資料六:
富山県立山町 --- 黒部平の紅葉
http://www.rurubu.com/season/autumn/koyo/detail.asp?SozaiNo=160012

資料七:
草津の湯でも (草津溫泉區)
http://www.kusatsu-onsen.ne.jp/meitou/index.html

資料八:
輕井澤太子shopping Plaza
http://www.princehotels.co.jp/shopping/karuizawa/info/pdf.html

多謝MyV既資料搜集!! :D

Start from 2006 ...

TayThink / Toto / Travel --- 秋季日本郊遊團 | 立山黑部 (Tateyama Kurobe) | 野猿公苑 (Yaenkoen) | Day 2 | Part 2

參觀過合掌村後，我地就向這個旅程既第一重點立山黑部(Tateyama Kurobe)進發。
(圖片由official website轉載)
立山（Tateyama）跨越兩個不同既縣: 富山同長野縣(古名信州)，要乘坐六種不同既交通工具登山，未上機前看見朋友P既相，早已唔奢望會見到紅葉滿佈既立山，今年因為提早凍左，11月10號已經要封山(我們是離封山日前的第8天!)! 不過, 在公路上遠遠看見積得滿滿雪既山頂，心情就仍然非常興奮但同時又好擔心會好凍！好在今日天氣好好，雖然有D雲但無風同有太陽!!

興奮既原因係我第一次見到真雪，我地係立山駅(下午1：30)吃過中午飯就撘尾二班立山電纜車[交通工具一]上山到美女坪(下午已經無人上山，因為5點半已經黑晒天) 再撘高原環保巴士[交通工具二]去山頂. 我地終於到左我地今個行程最高既景點，2450米既立山室堂,我地走出室堂既觀光台，雪已經落得滿滿同厚厚的了！由於係新雪又有太陽，D雪就好似好滑又好似好白咁。
我地急不及待就衝出去，懶理出面只係零下1.3度！一面衝出去，一面不停叫兩位阿媽小心跌倒，但又好心急咁拿起D雪製造人生第一個雪球！
再向前踏出一步，成隻小腿已經陷入軟綿綿的白雪中了。

回頭一看，兩位阿媽仲行得快過我地, 又話要整雪球又話要去影冰湧泉水，又話要去影立山石牌，又話要行下果邊又話要行下另外一邊, 仲要坐係雪上面影相, MyV隻鞋又跣下跣下，我相信我係全山最嘈既男人，唔係，應該係全山最嘈既人(第一次可以嘈過D女仔啦!),不停叫著: "慢慢行！唔洗急！小心D!"

非常好既係佢地個個都無跌倒! 不過, 最嘈果位 --- 即係我，就跣低左啦!! 躂到個PatPat都幾痛呀!

跟著我地就搭無軌電車[交通工具三]去位於2316米高既大觀峰(Daikanbo), 再搭立山空中索道(吊車)[交通工具四]到達1828米高既黑部平(Kurobe Daira), 和黑部峽谷。這程如果係紅葉處處就係最靚既景點, 佢地著名既名信片(紅葉+黄紅色吊車)就係呢度影架啦！可惜今年提早凍，無計啦！ 之後再乘坐地下索道[交通工具五]到黑部湖(Korobeko), 和黑部水霸(Kurobe Dam), 到達時已經係4:30，天色已經開始黑啦! 全個水霸只剩我地一團香港團同一團日本公公婆婆團，天色已經好黑而且月亮都出埋黎，可知這個水霸是用嚟水力發電，規模不少，但人流這樣稀少，又沒有陽光下，整個水霸也份外心寒!! :S

我地徒步行10分鐘經過黑部水霸, 搭埋最後既無軌電車[交通工具六]後，我地到達立山既另一邊也是長野縣／信州，我地都係最一班離開這裡既旅客，Sayonana, Tateyama！

跟著我地就去信州大町溫泉區，浸溫泉舒緩一下今日既辛勞，準備聽日另一個艱辛既旅途！

浸了個湯, 有室內和露天風呂，不過，唔係混浴，只是男女分開吧~不過我都第一次無遮無掩咁係人面前沖涼，都係一個很好既經驗啊！

立山黑部(Tateyama Kurobe)の地図

檢視較大的地圖


Start from 2006 ...

TayThink / Travel / Toto --- 東京蜜月の旅 | Day 4

[Facebook朋支, 請click Here 或 "查看原文" 睇其他相或slideshow啦!]


終於由位於東京灣充滿童話feel既迪迪尼黎到東京最繁榮既市中心區---新宿!

不過，第四日既行程一大清早我地並冇留喺新宿，而係去左位於三鷹駅附近井の頭恩賜公園內既三鷹の森 ジブリ美術館，港稱宮崎駿博物館! 由細到大都係睇宮崎駿動畫大既我，由《高立的未來世界》(電視動畫)、《天空之城》、《飛天紅豬俠》...到《崖上之波兒》都可以話冇邊一套錯過過! 唔算大粉絲都可以叫做細粉絲! 哈! 由01年知道佢開左幕就好想黎，不過，一直都冇機會，今次一定要黎朝聖一番!!

我地今日既行程其實都幾緊密!! 上午會參觀宮崎駿博物館，之後會行下附近既小社區吉祥寺，然後會去原宿完成我地今個trip既多個任務，跟著先會返新宿食晚飯!

撘JR東日本中央線用半個鐘就可以由新宿駅到達三鷹駅~ 再搭收費既穿梭巴士就可以到達美術館。巴士來回收費為300円(喺巴士站旁既售票機買飛)，但單程就收200円(上巴士入落錢箱就得架啦!)。不過，我地今次淨係會搭單程因為我地參觀完會去附近既吉祥寺行街街! 呵呵! :)

因為今日係星期六，參觀既人會較多，所以，我地都早少少去到，寧願等開門!

喺美術館室內既地方係唔俾影相，室外就OK! 雖然美術館唔太大，但係，裡面既展品都好豐富! 你可以知道動畫製作既基本概念、宮崎駿既製作靈感喺邊度黎同埋製作室(吉卜力工作室)點樣製作動畫! 可知宮崎駿一直都堅持製作2D動畫，呢幾十年所有既動畫全部都係畫出黎! 今期特別展館裡展出同介紹如何製作《崖上之波兒》既過程，當中擺放左一個大型既玻璃展櫃裡面全部都係製作《波兒》既手繪圖，一共有20幾萬張!!! 疊到成個小山一樣，真係歎為觀止! 可以知道佢地為呢套動畫用左多少時間同心血啦!! (據知宮崎駿同Pixar一樣通常都要花上2,3年時間製作一套動畫)

成個美術館既設計都充滿心思，售賣紀念品既就設計成由《飛天紅豬俠》既空賊團---曼馬由特經營(紙袋都係印住大大個曼馬由特嗰嘜頭，哈哈! 不過，呢度亦係我最失望既地方，因為想搵既精品搵唔到，而有啲靚既精品好似《紅豬》架紅色飛機成5,000蚊港紙!?!?!好貴啊!!!) 當然，美術館唔可以冇《龍貓》既貓巴士(不過，只可以俾小朋友玩! >____<")，連去廁所你都可以望住一幅好靚既油畫! 而每張入場卷都係抽左宮崎駿其中一套動畫既其中3格菲林做既(我地果兩張就係《龍貓》既兩姊妹同《波兒》既宗介)，你仲可以憑入場卷去到位於館內地庫，可以容納80人既映像展示室(土星座)觀賞一套宮崎駿既實驗或展示電影!

至於美術館嘅天台，就裝飾成《天空之城》既場景，滿佈著攀籐。最興奮就係見到1:1既《天空之城》機械人! 而地下就有一個以《千與千尋》為主題既小花園(有好多火屎仔，哈哈!!)、旁邊有咖啡室「草帽」同埋另一個入口有《龍貓》既售票亭(當然是假的唷! 現場沒有售票處， 詳細購票方法請按此)!!

真係可以話係一個花盡心思同設計周到既美術館，令大人細路都沉迷喺呢度! 正正就好似宮崎駿設計美術館既概念一樣『迷子になろうよ、いっしょに。』(讓我們一起做個迷路的孩子吧！)!
o^_____^o

參觀完美術館，我地就向下一站吉祥寺進發!! 其實，三鷹の森ジブリ美術館係喺三鷹駅同吉祥寺駅中間，喺地圖3點就成一個V型! 而我地今次就用行既方式去，路程唔係好遠，只要廿分鐘度! 天氣清清涼涼咁，一邊行一邊可以睇下呢個同新宿大大不同既城市面貌，一邊又可以感受下當地人既生活! 都幾舒服啊!!!


檢視較大的地圖

吉祥寺都可以話係我地今次既小驚喜，而我地主要逛既係中通道(Nakamichi)，完全同新宿高樓大廈兩個世界! 呢度全部都係兩三層樓高既小平房，不論地鋪或者樓上鋪都別具特色，由賣手工藝、舊玩具、餐具、嬰兒用品(買左一件日本製既金太郎BB口水肩 XD)、本地到歐美雜貨甚至古董珠仔店(好似巴黎聖母院既近a.B果間珠仔店不過細5倍到)都有，行呢度既時候完全可以幻想自己係日人! 而且，每間鋪都好似有新發現咁，好似行三鷹美術館咁充滿探險感!完全樂於繼續當個迷路小孩!! 哈哈!! 不過，我地第一時間唔係去行街街! 而係又去醫肚先!!

我地今次選擇左一間已經有成三十幾年歷史既咖哩店---まめ蔵[網址]!

因為地方不大要等位，但係都只係等了十零分鐘就有位啦，我地點左一個beef set(其實係牛腩)同一個special set(其實係牛腩再加雞蛋同配菜)，加埋餐飲(各100円)都要2千幾円呀! 雖然個賣相可能就一般，但就真係好好食!!! o^______^o

因為啲咖哩好香好濃郁，完全入晒去啲牛腩度!! 而且，MyV仲話食到有淡淡既草藥味! o_____O"
不過，咖哩就係源於印度既香料，而且咖哩確有醫頭痛既功效呢!!

無論點，由食物既水準、店舖內用心簡約既佈置同揀選既音樂就知道佢地點解可以迄立喺呢度咁多年!

食完美味既咖哩飯! 我地就係呢度做返個零鐘頭既"日人"先，不過，可能輕鬆得滯，完全唔記得影呢度既特色鋪頭添!! >___<#

我地再行埋近火車站7層樓高既無印後又係時間去補充體力! 去到吉祥寺裡面既商店街來一個下午茶小吃 --- 松板牛肉球 [Steak House Satou | サトウ 日本飲食網介紹]!!!

估唔到真係好似旅遊書咁講要大排長龍!!! 一排就40分鐘(旅遊書話有時要排一、兩個鐘!)!! 由冇落雨排到落住雨，由唔倦等到倦，更加由唔餓等到餓!! >_____<"

突然之間牛肉店姐姐派張單張俾排緊隊嘅人 -- 應該係講解如何購買，全部日文完全唔識睇(原來係寫平日每人限買20粒，週末每人限買10粒)! 只係見到1? 180円 5???? 140円!!?!?!

嗯...斷估都應該係買5粒以上每粒140円啦! 先頭見到隊頭擺左啲一盒盒pack好左既牛肉球，好似日式鱆魚丸咁大粒!又見到啲日本人幾袋幾袋咁買走!! 車 ... 又倦又餓又忟既我諗都唔諗梗係買5粒啦!!

終於到我地啦!! 埋到檔口用手語+錢同哥哥仔話要5粒，但見到廚房裡一盆盆未醃醬既牛肉球就知大鑊!!! 廚師一收order就醃醬即炸!! 想改單都太遲啦!!!

點解!? 唔洗20秒哥哥仔就將炸好左既牛肉球交俾我手...

嘩 ... 嘩! 嘩! 嘩!! 每一粒牛肉球都好似成個拳頭咁大!!!

o________O" 5粒!! 係5粒同拳頭咁大既牛肉球!! 就好似5個BigMac!! 兩個人點 ... 點食得晒呀!!?!?!?

@.@

講真又真係好好食，裡面除左松板牛肉仲撈左頗多既洋蔥，由於係大火炸既關係，啲肉汁完全鎖住喺個牛肉球裡面!!
認真係超juicy啊!!! :D

其實以一個男士既食量1粒已經好滋味，2粒超滿足，不過，要食到3粒就真係要好有"食力"!!
我地最後用左差唔多30分鐘食晒呢5粒牛肉球!!! @.@ 只可以讚一句"好味! 果然，真材實料!!!"，飽到上心口!! :\

縱使啲雨越落越大(所以跟住就冇乜影相啦!)，同食到"大肚臨登"!!不過，我地都冇唞! 行埋吉祥寺駅旁9層高既ユザワヤ(全部賣DIY手工藝野! 勁似執左既SPOTLIGHT，不過，呢度係9層樓高o羅! 後來先知係全日本最大既手工藝用品店!! :o)，就立即要去我地下一站原宿(Harajuku)! 完成我地今次東京之旅既任務:
任務一: 為我地新裝修既屋企買番個"靚仔"掛牆鐘
任務二: 為同我地同一日結婚既朋支買結婚禮物，鮮果醬! :O

而要完成呢兩個任務其實好簡單，就係去原宿既形格地標GYRE裡面3/F既MoMA Store 同B/F既Cerfeuil!

講下呢兩間店先!

原宿呢間MoMA store係由世界知名喺紐約既MoMA(The Museum of Modern Art, 1928)成立既，佢亦係美國以外唯一既一間分店! 佢地既經營模式都幾得意! 佢地會搜羅同售賣好多有型既產品，由精品以至傢俬都有! 可能佢地知名度大，所以經常可以搵到唔同既Designer同佢地Cross-Over推出不同既產品! 你可以想像你入左一間更型格同更有Designer味既"city濕爬"!! 我地今次就揀左由日本設計師白須 慎之(Noriyuki Shirasu)設計既Peep Clock(MoMA ピープクロック，ホワイト | Noriyuki Shirasu ，2008)! 又係"一見鍾情"果隻，完全襯晒我地以黑白為主色既屋企!! XD


而Cerfeuil呢間果醬店就係由盛產水果既長野県黎，佢地有唔同口味既日產手作鮮果醬!!! 其實我地喺上次既秋季日本郊遊已經去過佢地喺輕井澤既outlet店。佢地有各式各樣既果醬! 最出名除左佢地既布丁味果醬，佢地仲會不時推出時令水果既果醬! 好似青森県蘋果當造，佢地就會推出青森蘋果果醬!! 除左果醬，佢地仲有其他既酸奶醬、茶、味噌...，完全符合到佢地公司既宗旨:"A Gallery of Preserves."

去完GYRE，我地就去左隔離既Kiddyland，嘗試完成我地第三個任務: 買玩具! 本來今朝喺三鷹の森美術館想買Tomica喺2007年為宮崎駿出既3架精心設計既限量版車仔，不過，已經失望而回! 咁就為有靠呢間既玩具旗艦店啦!

共有6層高既Kiddyland其實都算世界知名，我開頭都唔知，後黎返左香港同朋友A.L.講番，佢話連畢彼特（Brad Pitt）同安祖蓮娜祖莉（Angelina Jolie）都係帶佢地啲細路黎呢度買玩具!!?? 勁!!! o_______O"

唔怪得我地果晚見到咁多老外同啲小朋友黎啦!! o^______^o

果然呢度真係一間好勁既玩具鋪，我除左可以買到已絕版果3架宮崎駿既限量版車仔，仲要俾我搵到一架喺香港已經賣斷市既車仔!! 超滿足咁返新宿!! :D (個肚都係! 因為，啲牛肉球仲未消化完!! :P + @.@)

返到新宿酒店擺低戰利品後，我地又去食過!! 今次要去食一間幾本旅遊書都介紹既Asahi TV選為Best10's No.1既迴轉壽司店---北澤俱樂部! 不過，諗都諗唔到我既"搵乜店冇乜店"既厄運又返黎啦!! =_________="

由朝頭早行到依家宵夜時段已經筋疲力盡仲要擔緊遮既我，望住漆黑一片既北澤俱樂部，估都估唔到咁出名都會執左!?唯一可以肯定係佢地唔係閂門! 因為間鋪既招牌已經換左叫乜乜東京壽司店! (後來幾個唔同既網站都證實左佢地九月尾真係執左笠:日本網站一，日本網站二同香港網站) 如果，以前既我可能都發左老脾!! 不過，可能今次唔算最差果次，試過有次去旅行一日竟然可以中兩次呢種厄運!!

望住呢間漆黑一片既北澤俱樂部，我同MyV苦笑左幾下，就打開本旅遊書搵附近另一間迴轉壽司店 --- 沼津港。

不過，食過呢間之後只可以話總算食過日本既迴轉壽司，原來香港有啲貴價既迴轉壽司店都好ok喎!! = ="

雖然，唔係完美既一日，但今日卻係一個超充實，勁有趣同好滿足既一日!! 超讚呀!!!

o^_________^o





Start from 2006 ...

TayThink / Toto / Travel --- 秋季日本郊遊團 | 立山黑部 (Tateyama Kurobe) | 野猿公苑 (Yaenkoen) | Day 2 | Part 1

今次既旅程除左立山黑部同野猿公苑這兩大重點, 要數第三重點一定是這裡 --- 白川鄉 (Shirakawa-go Gassho-zukuri Village)


白川鄉又名合掌村處於岐阜県大野郡白川村鳩谷, 種植大米為主既鄉村, 因為擁有108間既古日式建築合掌屋, 列入世界文化遺產, 人們取材於日常生活，用左大量既茅草建成厚厚既合掌型(成60度角)屋頂, 以抗嚴寒既冬天同厚厚既積雪, 每年屋頂上既積雪會有高達三尺以上!! 小屋形成一個小鎮。我們經過一道索橋名為相會橋, 進入這個遊人穿梭不斷既合掌村！雖然，人來人往但竟然感到她的寧靜和脫俗！而且, 再次證明古人的智慧!

白川鄉 (Shirakawa-go Gassho-zukuri Village)の地図

檢視較大的地圖

Start from 2006 ...

TayThink / Travel / Toto --- 2010日本關西[追加中部]春の旅 | Day 3. Part 2

前遊記 Day 3. Part 1

日期：2010年4月24
天氣：晴 & 陰 & 有雪

由於立山嘅雪の大谷有住咁超然嘅吸引力，而要睇呢條巨型雪長廊就一定要同時間競賽，每年大約四月中旬直到下旬都會係睇呢個雪の大谷嘅最佳時間！

而呢兩年都係17號先「開山」，所以，過左復活節嘅四月，先至會係立山地區一帶嘅旅遊旺季。而帶旺呢度並唔係我地呢班國外客，而係指立山呢度嘅主要客源 ── 日人自己！

而我地個團就係因為週圍嘅酒店都 Full 晒, 今晚要焗住住一間較偏遠 (石川県) 同好有"傳統風味"嘅溫泉酒店，點之真係幾"賴野"！ >____<

唔好講間酒店住，我地返番正題先~

立山其實橫跨富山同長野呢兩個縣嘅一個大雪山。雖然，佢咁浩瀚，但係如果你有睇過我兩年前嘅立山遊記，就會知道遊立山基本上到你90歲，都仲可以黎呢度玩！

立山登山圖
(圖片由official website: alpen-route.com 轉載)

因為，你遊立山就要撘佢地六種零污嘅染交通工具，先可以遊勻呢度。其實，要行嘅路真係極少，只係得黑部水霸嗰一段，仲要全部都係平路，而路程都只係10幾20分鐘，超輕鬆！！

但係，如果你想細遊立山，我諗行你兩、三個月，甚至幾年都得！！?? XD

而今次我地要行嘅雪の大谷，其實係喺立山最高景點 (2,450米) ── 室堂嘅人車兩用嘅馬路。你可以選擇逗留行呢個 roundtrip 小徑，又或者直接坐巴士落山。

當然，我地都未到90歲！ 唔行就笨啦！！！ :P 


因為，呢兩日嘅天氣都係麻麻，所以，我地其實都做足準備工夫，摭同雨褸梗係唔少得！ 我地仲將响喼度嘅所有可以保暖嘅衫褲都著晒喺身！

琴日行上高地爛左對鞋，為左唔影響大家嘅心情，我都廢事搏！ 响酒店見到一對貴香港3倍、超老土、同 "Made In China" 嘅M記波鞋都照買 (其實，有啲肉痛)！
務求以最好嘅裝備登山！！

酒店的歐陸早餐

食過酒店好有歐陸風情嘅早餐後，我地就出發去立山！！

大該個零鐘頭嘅車程，旅遊巴就到左我地今日嘅第一站 ── 扇沢駅！


今次，我地登山嘅方向就會同上次啱啱相反，我地會由位於長野縣嘅扇沢駅登山，而喺富山縣嘅立山駅走。


旅遊巴未停低，大家已經"嘩嘩"聲，唔係扇沢駅有幾靚，而係因為大家估都估唔到今日係我地黎日本最好天氣嘅一日，扇沢駅"陽光普照"，令大家好興奮，同更有活力！ 個個都跳住咁落車！ XD


真係好感恩啊！ 

人頭湧湧的扇沢駅

上次黎呢度係秋天都算係旺季，不過，今次當我地入到車站就真係知道咩係呢度真正嘅旺季啦！

除左成個站都係逼滿人外，跟住每個唔同嘅站都係大排長籠，而且站站嘅商店都係擠到人頭湧湧，多人度好似行緊年宵咁！！！
@______@"

唯一較好嘅係我地今次會用成日嘅時間黎遊立山，唔會好似上次咁只得半日咁趕！ >___<"


我地由扇沢坐關電無軌電車 [交通工具一]，大該16分鐘就由扇沢駅去到黑部水霸(黑部ダム | Kurobe Dam)，再次感受到佢嘅宏偉！！

唔知點解，我今次仲係覺得佢比美國大峽谷嘅胡佛水壩 (Hoover Dam) 更有氣勢！ 我地一面行呢條只需用10零分鐘就行晒嘅水霸，一面猛咁"禁"相機嘅快門，希望可以捕捉佢嘅神采~

睇到嘛！？落在MyV 手上嘅飄雪

大該行到喺水霸嘅中間附近，突然有啲一粒粒白色嘅野飄到落我部“老戰友“(我部DC)身上，望真啲。


原來係雪黎架！！:O

估唔到今日會見到落雪，而且仲係我人生第一次見到落雪！！！
太感動啦！！ 
o^____^o


我人生5個同雪有關嘅"第一次"，估唔到有4個都發生喺立山呢度！

喺一個貴為日本三大靈山嘅雪山，有趣同特別之餘，又覺得幾榮幸喎！！啊啊~

咁係邊5個"第一次"? 第一個同第二個就係上次黎呢度見到真雪同玩真雪 (掟雪球)！ :D

第三樣就係今次睇到落雪，同一陣間上到去室堂嘅雪の大谷度滑雪，當然，唔係人地成套Gear嗰隻啦！ 我只係坐喺塊滑板度滑咋，哈哈！！

大片雪地的黑部平

咁第五樣係乜? 之唔係就係「食雪榚」囉！！

哈哈！！ XD


我都唔知用左幾耐行完個黑部水霸，跟住我地搭黑部隧道電纜車 [地下索道， 交通工具二]，去到高1,828米既黑部平 (Kurobe Daira)。一出車站就見到一大片雪地，大家已經忍唔住衝出去執起雪，開始雪球大戰 ── 掟雪球！！ :D

掟完雪球之後，我地坐立山空中纜車 (即係吊車) [空中索道，交通工具三]，上到去高2,316米高既大觀峰 (Daikanbo)！！

立山之秋
img from jnto.go.jp

呢度就係立山兩個最舉世聞名靚景嘅其中一個！

你由呢度望番落去黑部湖，你會見到一幅擁有紅、橙、黃、綠、啡、 白 、藍嘅美景！！

不過，要睇到呢個絕美嘅靚景你要配合到幾樣野，第一要撞正一個滿山紅葉嘅季節，再加上你上山前要啱啱落過一場雪，令山頂鋪上一層薄薄而閃耀嘅 銀白色新雪 ，而且天氣要係陽光充沛，令到湖面可以倒影住同時有青翠樹木同紅葉嘅山景，再配合一架呢架咁醒目嘅立山橙色吊車經過！

如果你配合到以上幾樣野，你就會睇到一個靚到暈嘅絕美風景。

室堂駅的天氣佈告板

上次，我地就諗住可以睇到呢個靚景，不過，醒一下啦！！

要配合咁多野嘅靚景，只可以係可遇不可求，除非你長住喺呢度又或者喺度做野啦！ 我地呢啲遊人，都只係可以响張Poster先睇到Lu。 >_____<"


不過，慶幸我地今次就肯定可以見到立山第二個最靚景 ──
雪の大谷！


由於，車站嘅人太多，我地喺大觀峰短暫停留後，就去搭立山隧道無軌電車 [交通工具四]，只需10分鐘嘅車程就到左我地今日嘅主菜駅 ── 室堂，亦係雪の大谷嘅所在地！眼見嗰天氣板寫住大觀峰 (-6.0度) 仲凍過同大風過室堂呢度 (-4.9度)，嗰心就定一定，諗住一陣行雪の大谷都會幾好行，不過…

好滑嘅雪の大谷

我地就搵到去雪の大谷嘅指示牌，跟住就飛跑出去室外！ 第一眼見到室外嘅景色，就即刻覺得奇怪！ 點解呢度會擺左兩個巨型嘅天使蛋糕呢！好似好「滑」咁喎！？ XD


估唔到第一個字去形容雪の大谷係一個「滑」字！ 而製造呢個咁 creamy 雪谷嘅，就係全靠一部叫「熊太郎」嘅大型鏟雪車。佢更擁有一排紅色巨型輪狀開山刀！

擁有一排紅色巨型輪狀開山刀嘅大型鏟雪車 -- 「熊太郎」

真係超型呀！！！

未欣賞完咁雄赳赳嘅「熊太郎」，突然右邊傳黎一陣陣嘅歡笑聲，睇一睇見到個牌，而牌上就只見到唯一識嘅5個英文字，"Snow Play Zone" 同 "Play Free"！

見到個 FREE字，再加上對於我呢啲未玩過滑雪嘅人，當然又係唔理咁多就去拎佢地任人玩嘅膠雪橇，直衝上去雪堆最高位置就瀡落黎！


嘩！一個字 ── "爽"！ XD

雖然有啲低能，不過又幾好玩喎！

雖然，真係好"爽"，但我地每人都係"爽"左一次。因為，大家都好心急要去行我地期待左好耐、人車兩用既雪の長廊 ── 雪の大谷 ！


我地終於行入呢條好似由兩個特大天使蛋糕包圍住嘅雪の大谷。全部人都要靠右行，而左邊就會俾搭上落山嘅高原環保巴士 [交通工具五]行走。




雪の大谷開頭堆起嘅雪唔係好高，大該只有3米度，但係喺呢個雪壁長廊行左冇耐已經感覺到寒意。因為，厚厚嘅雲已經將整個太陽完全遮左，冇左陽光再加上吹起陣陣凜烈嘅雪谷之風，冇帶手套嘅雙手都開始覺得冰冷。


雖然，嗰身覺得有啲凍，遊人亦唔少，但係仲未冇影響到我欣賞呢個白雪壁嘅心情，繼續喪"禁"快門。

雪の大谷初段

我地越行入雪の大谷，路就越黎越向下斜，相對之下，兩旁嘅雪牆就越黎越高！

唔知幾時仲開始落起雪黎，啲雪比之前喺水霸嘅大得多，而且，啲雲又愈黎愈厚所有嘅陽光都遮住左，個身就覺得愈黎愈凍！

好似要我地體驗一下，每年日人點樣响呢個咁艱鉅嘅環境，只係用左10日嘅時間將呢個橫跨兩個縣咁大；同俾有成廿米咁厚嘅雪，完全冰封嘅道路開通，佢地稱之為「開山」。

呢個每年「開山」工程係唔單只係對科技嘅挑戰 (用大型鏟雪車，用GPS trace 番條路出黎 )，更加表現左日人嗰份傳統對險峻大自然嘅冒險精神、毅力同勇氣！

當我地一直行，所有人都好興奮咁不停影呢幅雪牆，而呢度有個 Message Area，你可以响度留低你嘅 message。

打住啲好多唔同色彩嘅結？

開頭我真係想用手指喺度寫低「到此一遊」，不過，當我用隻手指篤落去時，我就知道自己好蠢同好痛，哈哈！

因為，幅雪牆其實硬到不得了！！ 如果，真係俾我用手指都篤得入，咁就大件事啦！即係話呢幅雪牆好軟，除時都會塌落黎！？ XD

再行多陣，我地又發現左呢個雪の長廊上面掛住左一條繩，上面打住啲好多唔同色彩嘅結？ 好奇嘅我(即係八掛囉！)又停落黎睇下係乜東東！原來係呢度工作人員紀錄呢度降雪嘅情況。發現呢度降雪嘅速度果真驚人！12月中短短半個月內就可以落左成5米咁高嘅雪！


咁大個仔都係第一次見到咁多雪，而且，仲要係今個旅程最重要嘅景點！！ 我就冇停過手係咁影相，諗住可以捕捉喺下呢度遊人同响我地左邊車路不停上上落落嘅巴士。

2010年 立山・雪の大谷 ── 最高地点

行多一陣，我地終於黎到立山・雪の大谷 ── 最高地点！！

今年呢幅雪牆最高有成15米！！真係好高同幾震撼呀！

聽講以前平均嘅高度都有成廿米咁高，可能今年暖得快左所以比以前矮，不過，對於我呢個第一次見到落雪同見到咁多雪嘅人黎講，同樣震撼，都可以話畢生難忘！！

同呢個最高地点嘅牌黎個合照後，我地都要趕返去集合地點啦！而且，我果雙冇任何保護同保暖嘅手已經凍到開始有啲痛，不得不放低呢個陪我到過最熱(沙漠地區)同最凍地方嘅老戰友去休息一下啦！

高原環保巴士穿梭雪の大谷

我可以話俾你聽冇太陽、大風同大雪嘅室堂呢度肯定比氣溫低過呢度但係陽光普照嘅大觀峰，凍10倍以上！！ 諗起都凍呀！！ 
 >__<" 

集合後，我地搭高原環保巴士落山去美女坪，得意嘅係落山嘅時候又開始陽光普照啦！
@____@"

不過，如果唔係咁好天氣，我地又唔可以同見到咁「白滑」嘅雪景，同埋「雪降肥牛」雪山！ XD

可能大家行雪の大谷用左唔少嘅體力，而且今次車程又要成50分鐘，所以，車上差唔多大半嘅人都瞓左，錯過左呢個咁靚嘅景~

巴士到左美女坪後，我地參觀左一個細細有關立山嘅展覽館，就排隊搭最後一種交通工具 立山電纜車 [交通工具六] 落山！

由於雪の大谷每日嘅3點15分 (唔知係咪要食下午茶呢！？ :P)就會閂門，所以，依家正正係呢個尾站落山嘅高峰期！！

我地等左幾班車先輪到我地，但係由於我"太禮讓"，所有排今班車嘅人都上晒車，竟然得我一個逼唔到上車！！！
O______O"

"白滑天使蛋糕" 同 "雪降牛肉"嘅雪山 XD

一位老駅長見到咁，就立即帶我去另一度門試下，我只可以擺到半隻腳板入去！

當我都打定輸數，要踏返隻腳出黎，又諗住要等下一班車同埋又驚會擔晤大家團友時間之際，突然，老駅長使出一招《雙龍出海》將我成個人打左入車箱！！！
:O

當我識反應，車門已經閂左，我個身亦都已經被逼到郁都郁唔到，只可以擰轉條頸向呢位老駅長點頭表示謝意…

用短短7分鐘嘅時間，我地就落到黎山腳；位於富山縣嘅立山駅，登上我地旅遊巴，同時亦再一次向呢個咁偉大嘅立山講再見！
「さよなら！ 立山・黑部！」
(Sayonara！ Tateyama Kurobe！ )



本來以為今日唔會再有"驚喜"啦！ 點知有一個"驚喜"原來一早已經等緊我地…

係乜！？ 咪就係我開頭講今晚會住果間酒店…



待續 …





更多資料：
1. 立山黑部官網 (日文)：
    http://www.alpen-route.com/
2. アルペンルートナビ　(日文 | 立山導航 | Alpine Route Navigation)：
    http://www.alpen-route.com/plan/navi/index.html
3. 立山登山交通工具： 
    http://www.alpen-route.com/tw/Access/index3.html
4. Tay の 2008年秋季日本郊遊 (立山黑部 + 馬騮浸温泉 [野猿公苑])：
    2008年秋季日本郊遊 遊記全集

美女坪立山嘅展覽館內的模型 #1

美女坪立山嘅展覽館內的模型 #2

美女坪立山嘅展覽館內的模型 #3

在較大的地圖上查看2008 Nov. Japan Trip