Fun / info / HK Event --- PatPat又黎啦!!!!

為左避免大家遇到好似我上年咁既唔太開心既經歷, 今年"住OD"既PatPat有得係網上公開訂購啦!

今年多左4款, 有割禾青, 不求人, 卡窿同一筒!! 有興趣就去訂啦!! 網上訂購延期到9月7呀!!!


如果你買左, 記住話我知你抽中邊款PatPat wor, 我上年我就抽中 ... [答案在此]


Start from 2006 ...

TayThink / Travel / Fun--- 登松山記

團體遊去到中午既時候就解散, 大家自由活動！我同MyV就決定去澳門既一個名勝 --- 松山東望洋燈塔, 試撘下全世界最短既纜車！ 有幾短！？ 3分鐘車程！0___o"



首先梗係去醫左個肚先啦, 我地去左品嘗出名既蝦子竹昇麵[祥記]! 跟著我地撘巴士（單層）去位於二龍喉公園既纜車站, 因為唔熟路, 上車已經先問定司機, 係唔係去二龍喉公園, 佢話係我地先上車.

撘左一陣覺得差唔多到, 左望右望又唔似樣, 突然間, MyV話:「我見到"二龍喉公園"個牌喎！ 」...

咁就即係話我地已經過晒龍啦！=____="

架巴士仲已經上緊山, 去到澳門賽車既最出名既髮夾灣(原來叫做"馬交石砲台馬路")!!!

咁就走出位問下司機係咪過左龍啦！點知司機就好似緊張過我地話:「哎呀！ 係喎！真係過晒龍喎！ 點呢！？ ... 你地依家落車要行好遠喎！」我心諗我都知, 不過我都真係唔知點喎! 打定輸數諗著下個站落車再算！轉身諗著走返埋位既時候, 突然, 司機就話「唔...你地唔好落車, 等陣我兜番你地過去呀！」心諗咁都得, 澳門真係好有人情味啊! :)

返埋位坐低既時候, 坐後面既一位好心既哥哥仔就同我地講：「你地哩個站落車啦！跟著撘番對頭車, 撘兩個站, 係撘兩個站落車, 就到架啦！」又嘗到第二次澳門既人情味. 我地連番多謝後, 最後, 我地冇聽哩位好心既哥哥仔落車(佢都係哩個站落車)!

唔係我地唔領人地既人情, 而係, 我地諗下我地依家個身仲濕緊, D汗都未流完, 想享受多一陣哩個冷氣既車箱. 同埋, 因為我地慣左用"百達窿", 依家全身都冇一個銀仔, 望出車外面好似係工業區咁, 落左車都唔知可以去邊度唱散紙啦! 不如, 等司機車我地返轉頭好過!

我地繼續遊左差唔多10幾分鐘既車河, 架巴士已經駛到去一個唔知咩既地方, 原來已經到左總站啦! 個身乾番晒, 所有人都落晒車, 睇見司機冇表示, 都唔知佢係咪唔記得話會載返我地轉頭, 咁就諗著落車啦！唔通咁大個人仲要俾人話撘霸王車先落車咩！點知司機一見我地想起身就喝著我地:「你地兩個唔好落車呀！」

跟著司機匙都唔熄就抽頭開車, 有位阿姐走上前諗住截停佢!! 不過, 司機就對著阿姐耍晒手!? 我地見住阿姐個疑惑樣, 可能佢心諗明明埋左站, 又唔俾人上車, 但上面又有兩個人坐係度!? 以為自己係咪撞野! 哈哈! :p

跟著, 我地隱約(因為我地坐係最尾個幾行, 所以聽得唔係太清楚!)聽到司機同自己講左句話趕時間呀!!?!?

吓!! o____0" 我同MyV你眼望我眼, 我地都冇話趕時間, 而且, 我地真係唔趕架喎!?!? 以為司機淨係"飛"總站果個站o者, 點知, 佢繼續"飛"其他站, 半路遇到整路有D塞, 司機就不停嘴咁話:「 點會咁塞車呀! 點會咁塞車呀! 點會哩個時間黎塞車呀! ...」

我地都唔知點解司機咁忟憎!? 心諗慢慢揸, 唔洗快喎 我地都只係想去下燈塔同撘下松山纜車o者! 不過, 我地既念力冇乜效, 司機心情好似冇乜變, 繼續"飛"多幾個站, 我地心情就繼續忐忑, 過左一陣, 終於到左我地要落車既站, 司機埋站停車, 終於打開車門...我地既心情跟著打車門既速度慢慢放鬆 ... 呼 ...安全啦~安全啦~

司機擰轉頭, 我地仲以為佢會好忟憎叫我地落車 >__<, 不過, 佢反而好有禮貌咁同我地講:「你地到啦, 你地係前面行過去就係啦!」嘩!! 我覺得我好似係D日本漫畫既故事裡面咁, D主角一時好火爆, 一時又好溫柔咁!? =^____^=
我地落車後, 我向司機"沙冧", 司機仲好有形咁向住我戚下個頭 ... ^_____^||


嘩!! 哩程巴士心情變化得真係好大! 好啦! 唔理啦! 諗著今次撘纜車遊松山可以輕輕鬆鬆, 平平靜靜啦!! 正當, 我地搵緊邊度有得買飛之際, 見到一個牌:"逢星期一維修"!!!!! o_______0"

吓!!!! 冇野呀!!!! 依家咩年代呀!!?? 交通工具都會每個禮拜維修!?!? >__<
咁我地香港既山頂纜車同港鐵真係好厲害啦!!! 日日都開, 仲年中無休!!

好啦! 冇計啦!! 心諗全世界最短既纜車, 要行上山有幾難!? 雖然, 全程都要行梯級, 不過, 點都唔會難到我地既, 唓, 行咪行!! [<= 還以為自己今次可以裝帥!!]


開頭行上山既時候仲好有興致咁影o下相, 不過, 未行到一半就發現乾左既身又開始濕緊 ... 行到一半個身已經好似開緊水喉咁啦!

停低一陣唞o下, 諗住D汗會停啦, 點知都係一樣, 又發覺原來已經冇晒水! 咁就決定唔唞, 一口氣上到山頂!! 一上到山頂, 見到纜車站. 但係嘩!!! "萬里無人"!!?? 只係睇到一個報時同溫度既亭, 上面打住依家既氣溫係37℃!!!!
o_______0" + @____@||

試問點會有人肯行上黎呢!!??!!??

雖然, 我地已經登上俾我地"睇小"既松山, 但係, 我地其實仲未到我地既目的地 --- 松山東望洋燈塔

我地繼續行, 見到一個公園, 而且, 仲見到一個涼亭同小食亭, 嘩!!! 當堂好似係沙漠上見到綠洲咁!! 我地梗係即刻飛身過去, 買左一條雪條同一支大水黎降溫!! 係哩個涼亭度繼續唞, 一唞就半粒鐘, 期間我地只係見到一對日本既老夫婦同一對法國既情侶遊客黎到哩度"打水", 就冇其他人啦! =________=

唞完後, 我地去睇我地要睇既松山東望洋燈塔, 影左幾張相後我地就返落山...夏天既松山真係唔易登!!


不過, 今次都算真係一個幾有趣既經歷, o^_______^o
要多謝果位司機, 好心既哥哥同涼亭既auntie, 同神既安排啦!!


PS: 1. 記住唔好星期一去松山撘纜車
        2. 記住要儲定D散紙撘公車



檢視較大的地圖

Start from 2006 ...

TayThink --- 一開學, 先退步

之前係FB留左一個status:"寫左一篇好長既blog (應該係我寫blog生涯最長既一篇), 唔知有幾多人俾我悶親? 又或者一見到就怕左唔睇呢? :P"

今日知道答案啦!! 大跌22個%!!!! (好似國內股市咁!)

都好, 因為知道冇朋友俾我悶親!!!
不過, 其實我覺得都唔算好悶o者!! 真係一開學, 先退步!! 哈哈!!! :P




Start from 2006 ...

TayThink / Travel / Info --- 澳門, 福音來華之地? 或是福音之硬地?

[Facebook 讀者, 可以按Facebook內下面既原文網址, 睇更多既相/slideshow]

今次黎澳門參加一個可以話係好與別不同既旅行 --- "福音來華尋根之旅"!

澳門與香港都係一個充滿傳奇既地方, 不單只因為大家都係有過一個殖民地既身份, 同時每每大時代既變遷, 兩地都會被捲入時代巨輪當中, 唔多唔少都直接受到不同大時代既影響!

不過, 有一個傳奇就只發生係澳門哩一度, 而當中哩位傳奇人物就係馬禮遜(Robert Morrison)牧師, 1807年1月一位英國土生土長基督教既傳教士, 擁著對主無比既信心決定來華傳福音, 獨自經過8個月既旅程, 係9月4日來到澳門哩片土地上.

我諗馬禮遜一到步就已經好想展開傳福音既工作, 不過, 卻立刻遇上第一個既難題, 唔係食住, 言語不通既問題, 而係, 當時擁有頗大勢力既天主教既阻攔, 阻攔佢留o係澳門哩度. 哩個難題係一個你未知發生咩事, 未開始做任何野就要你放棄入夢既打擊!! 來澳3日後(即9月7日)為左可以留o係中國, 馬禮遜轉戰廣州, 唯有以幫東印度公司做翻譯為名,以翻譯員既身份得以留係中國.

馬禮遜冇因為咁就放棄傳福音, 係1810年, 馬禮遜為左要將翻譯左中文既聖經章節<<使徒行傳>>印成書籍派發(共印刷1,000本, 其中3本寄回英國), 認識左中國第一位既基督徒 ---蔡高, 之後都係因為印刷既關係再認識到中國首位既宣教士 --- 梁發.

1811年, 馬禮遜在傳教既工作上開始取得些微既進展, 同年長子雅各(James)出世, 本來應該係高興既事, 但好可惜佢於同日夭折死亡, 係一個由天上趺入谷底既打擊. 但馬禮遜冇停低佢既工作, 同年完成翻譯及出版<<路加福音>>.

1813年, 米憐牧師黎到澳門希望可以幫助馬禮遜牧師, 不過, 米憐牧師黎澳門短短16日就已經敵不過當時在澳艱苦既傳教工作,而離開左澳門, 又一次打擊了馬禮遜牧師, 另一個得而復失既打擊.

1814年7月16日, 馬禮遜為中國第一位華人 --- 蔡高係澳門松山既山麓受洗, 成為第一位既中國基督徒. 其後, 馬禮遜為左支援東南亞地區既傳教工作決定要建立一個差會總部, 而且哩個總部要有具備培養傳教士的功能. 不過, 我相信係當時咁封閉既中國要設立一個外國人同華人交流既地方, 係文化上同政治上都可以話係冇可能! 咁最後佢決定係馬六甲開辦傳教士學校, 而哩個計劃就交俾之前提過既米憐牧師實行, 而哩個總部既訓練學校就係香港既英華書院既前身了.

1815年, 梁發因為要協助出版聖經同中文刊物隨米憐牧師黎到馬六甲, 1816年, 米憐牧師為粱發受洗, 其後, 粱發出版多本傳教刊物, 其中1832年發行既<<勸世良言>>, 據聞洪秀全都係因為睇左哩本書, 而創立左"太平大天國".

1818年11月, 米憐牧師開辦了英華書院教授來華既傳教士, 同時都打開中西文化交流既地方同通道.

1821年同1822年, 馬禮遜連續失去兩位生命中最重要既人, 1821年馬禮遜夫人病逝而多年既戰友米憐亦都係馬六甲病逝, 馬禮遜只好將年幼既兒女送回英國託哥哥照顧, 今次受到打擊更大!!! 但係痛失至愛同戰友既馬禮遜並冇意志消沉, 繼續待奉既工作.

12年後, 1834年8月1日, 馬禮遜o係廣州病逝, 終年52歲. 回顧馬禮遜一生可以話大志未成, 心願未了. 一心諗著來華傳福音, 但來華廿多年最終只有10位信徒(1833年)!

如果你係馬禮遜離世o果日黎計, 從數字o黎講大家可能話佢係失敗, 亦都可以話係一生堪可, 波折重重. 雖然, 最終遺體可以運返澳門基督教墓場(1821年, 因當時馬禮遜太太去世時, 由東印度公司向葡商購地作墓場, 內有馬禮遜小教堂)同夫人一同安葬, 不過安葬既地方絕對並唔係一個華麗既地方, 但係人o既一生係咪真係用我地俗語所講既"蓋棺定論"呢?


我相信唔係完全啱晒, 世上稱得上偉人好多係佢地臨死果刻, 通常都係好可悲既, 好似名畫家梵高(Van Gogh)或者名雕塑家米高安哲奴(Michelangelo)又或者名建築家安東尼·高迪(Antoni Gaudi)? 當時大家都認為一個係痴線佬, 一個係滿身臭味既鑿石佬, 而高迪係街上遇上車禍, 被車撞倒後死去, 但因為佢衣衫襤褸更俾人當左流浪漢, 車禍死左3日, 大家先知佢係大名鼎鼎既建築家,
真係諷刺!!!!

但哩班既偉人之所以叫偉人就係佢地對後世既影響有幾深, 佢地既影響力到依家都係未有減退, 好似高迪咁佢既名建築---聖家堂 (Temple Expiatori de la Sagrada Família), 到依家都仲起緊!!!
仲要起多2,30年!!!!! O___0".

而我覺得馬禮遜牧師可以同哩幾位偉人齊名, 而對華人或者華人既基督徒黎講, 佢更係有過之而冇不及, 佢既影響力到依家我地都感受到, 佢令到中國哩個古國既人民得到福音, 好似1823年咁, 馬禮遜牧師出版中文新舊約全書並以<<神聖天書>>為名, 之前既建立既英華書院教授出好多既傳教士來華作不同既工作, 又由哩班既傳教士既帶領下分別成立志道會堂(1905年)及澳門浸信會(1904年, 俗稱白馬巷浸信會, 因為位於白馬巷哩條街). 而我地國父孫中山先生既元配夫人 --- 盧慕貞更係澳門浸信會既第一位會佐(香港稱為執事), 對孫中山先生係信仰同信念上有一定既影響.


1939-1945年, 二次大戰, 葡國係中立國, 不少中國同香港人為左逃避戰亂, 都黎晒澳門, 人口激增至50萬!! 到戰後和平之後, 人們紛紛返番原居地, 好多現今既香港教會都係由以前居住過澳門既基督教幫手參與建立!


我相信馬禮遜牧師靠著對神有堅定不移既信心, 行哩條滿佈荆棘既福音來華之路, 對於佢最後能葬係澳門哩一片佢第一次來華踏觸既土地上, 係神一個微妙既安排!

對比起我今次參加教會哩個澳門之旅, 可以話係更加羞愧. 因為弟兄們安排得太周詳了, 縱然有30幾人, 都可以妥善安排膳食同交通, 可知我地唔係參加旅行團, 唔係靠旅行社安排. 唔單只事事順利, 除左参觀左唔少既名勝同博物館, 亦都有幸得到澳門聖經學院院長---游偉業博士既講解.

游博士由唔同既角度係政治,軍事,經濟同宗教歷史黎講解澳門哩個"福音初至之地"(係志道會堂3樓有一個寫上哩六個字既牌坊), 晚上又可以係白鴿巢浸信會同會友相聚分享,在悅耳既詩歌及有趣既話劇及遊戲中彼此了解.

參觀澳門馬禮遜紀念中心(2007年成立, 馬禮遜來華二百週年時成立)與陳牧師分享在澳營運中心同傳福音既經歷, 係澳門其中一間最耐歷史既會堂參加主日崇拜, 得到廖卓堅牧師既講道同佢慷慨既贈送佢自己編寫既澳門宣教歷史筆記, 令我更加了解哩個"福音初至之地".


又同教友一齊夜遊睹場內既華麗建設(M記既天幕廣場)同表演(W記吉祥樹同新X天地既水幕, 天幕電影派晒飛!! >_<)!!! 當然, 更享受不少地道美食, 好似中葡式既牛尾, 血鴨, 葡式汽水(推介熱情果味)同蝦子竹昇麵 :p~~, 係一個各方面都好滿足既旅行!!

但當我望著W記吉祥樹最後一幕, 黃金樹升上地面時, 人們叫囂同時拋上錢幣, 叮叮噹噹既錢幣擊打聲, 令我立刻諗o下大多數人群黎澳門都係為金錢, 財富而來, 而且來得瘋狂, 來到哩棵"拜金樹"!! 反思我地係咪咁需求地上的財富呢? 係反思緊既時侯, 突然, 醒覺神既安排實在太美妙啦!!


200年前既澳門根本就係一個福音之硬地, 但神卻偏偏安排馬禮遜牧師係哩個細小既地方為西方來華傳福音做起點, 好似就係要係哩度放上一個"福音初至之地"標記! 來華廿幾年既馬禮遜付出無比既信心都只係收得10個信徒... 再睇下今日既澳門, 賭場臨立, 我係澳門(半島果邊)每次望上天都會睇到果枝"巨大既黃金三叉戟"!!! >__< 現時澳門既青年人大多做荷官為生, 而全澳門只有唔夠1個%既基督教, 好多澳門既基督教教會依家都係靠香港既教會支持, 澳門既同工面對重重既挑戰, 在這個福音硬上加硬之地, 哩個黑暗重重既澳門, 如何可以開闢一條光明既路呢?


神安排放上一個"福音初至之地"標記既奇妙之處, 就係彷彿要大家都永遠記著澳門哩台度永遠都係福音來華既地方, 可能神就係知道哩度會係全世界華人地方上, 心靈上最需要支授既地方! 讓我地記念哩個地方, 同時為這片土地繼續祈禱吧! 我相信澳門永遠係"福音初至之地", 但一定唔會永遠係"福音之硬地"

相片幻燈片 / Photo Slideshow

Click哩度睇晒d相同備註, 仲有相片位置地圖tim!! o^______^o

Start from 2006 ...

Fun/ TayThink --- 我都好想香港"種"多D呢種"花", 不過, 最起碼D花瓣要識轉喎 !

[image from thedesignblog]

上幾個星期既週末都係落雨, 啱啱果個星期六日就唔同, 好猛太陽, D人就好似放監咁出晒黎行街, 不過, 係香港要夏天做戶外活動就真係一D都唔簡單, 係條街行5分鐘, 包你成身濕晒!!! >__<

香港夏天最衰就係濕, 唔落雨都可以有成90幾%既濕度!!!!!

有D外國既設計, 係香港就未必一定行得通, 好似哩種"花"咁~

哩種"花"係由日本既豐記設計, 係美國既波士頓"種"左好多哩種"花", 佢地跟著就會再係美國其他各主要城市繼續"種"!!

哩種"花"可以同時提供10個人同時無線上網, 更可以提供手機同手提電腦充電, 而佢既"養份"就完全來自大自然 --- 太陽能!!

而呢種"太陽花"既設計主題係"人、自然與機械之和諧".

香港政府話推WIFI已經成兩年, 不過, 問題係係戶外冇乜地方可以舒舒服服咁上網又同時提供足夠電源, 不過, 就算香港真係"種"哩種"花", 係30幾度既高温再加上90幾%既濕度, 點可以同哩個自然和諧呀!?

要哩D"太陽花"識噴冷風就太苛求啦, 不過, 最起碼D花瓣要識轉, 可以當風扇!!! 哈哈!!

More info click here.
Start from 2006 ...

TayThink --- 是日自我檢閱日!

今年目標: 我要為鹽為光! 不輕易發怒!!

Start from 2006 ...

Fun / TayThink --- 明和電機の新作

三年前, 明和電機應一個法國品牌邀請黎香港做展覽同開音樂會(音樂會好似之前硬膠星Plastic Planet既型式差不多), 展覽就有去左不過音樂會就買唔到飛去唔到啦~

係新聞既報導裡, 知道果場音樂會反應好好, 可惜冇得睇~ >__<

明和電機既創辦人以自己爸爸既一間執左笠鋪頭名命名, 我覺得有趣既地方係佢地成功在於現任會長 - 土佐信道同公司獨特既市場定位同business model.

土佐先生可以話係一個集機械(及樂器)發明家, 音樂表演家, 藝術家於一身既會長, 由設計同製造機械音樂樂器既原型(prototype)到自己親身上台用原型樂器黎表演, 再把原型轉化為大人細佬都鐘意既心靈玩具, 好似幾年前推出既熱賣之作Knock-man family 盡顯佢地既獨特性, 我都想買晒佢地番屋企, 不過, 香港既LongOn同CitySupper賣貴晒, 到依家都未買!!!


佢地既business model, 就係由原型到示範/表演再到生產大眾產品, 佢地既策略係所有"公司"製作既任何野都可以賣, 記得連佢地既超搶眼既招牌"粉藍"色夾毑衣 (工人服)都有得賣, 諗諗下如果著出街都幾爆笑!

[Img from MayWaDenki]

除左non-sense,有趣同可愛既產品, 有時佢又會設計D變態野, 好似GMウケ-テル(Uke-TEL)咁, 不失日本人既瘋狂.

下面個盤係養魚既, 呢部野連接左個電話, 當有人打黎, 上面既針就會隨意插落去, 睇下插中邊條"Unluck 既魚"!! O___o





[Img from jp.engadget]


今次佢地既新作 --- OTAMATONE(オタマトーン）, 係由魚器而衍生出黎, 我覺得好似手偶同二胡既合體!!
繼續non-sense但有趣既風格! o^_______^o







土佐會長今次係高達新朝聖地前, 示範オタマトーン, 勁呀!!!



More info. about 明和電機

明和電機 - 明和電機社歌




明和電機 - イカリをあげよう(Live)


Start from 2006 ...

Movie / TayThink --- Three Touching Movie

Shared By GulGul in FB, 3 simple but wonderful & touching story

Funeral - w/ Chinese subtitle


"Most" (Czech for "The Bridge" ) a man sacrifices his son


Extraordinary Pantene Commercial


Do you feel good today, my dearest friend?


Start from 2006 ...

Travel / Fun / News --- [日本, 神戸市] 鉄人２８号 新の朝聖地

[image from sankei.jp.msn.com ]

繼7月11日1:1既高達(機動戦士ガンダム) 係東京既台場潮風公園正式係開幕之後, 日本另一漫畫機械人--- 鐵人28號又會有一個新の朝聖地了!!


今次, 選擇係作者既出生地神戸市, 7月27日正式動工!!


1:1既鉄人２８号會係神戸市長田区の若松公園內擺出招牌動作! 淨係個頭都重0.9噸, 總重量為50噸!! 預計高18米, 寬16.5米!!
預計9月底完工, 10月4日正式開幕!!!


香港既鐵人28號迷或愛遊日本迷又多有一個新景點了!! :D




実物大！鉄人２８号製造中 (Vol. 1)
Vol 2, 3 & 4

那裡是神戸市長田区若松公園?

View 若松公園 in a larger map

PS: 由香港既製作既T28電影快將推出, 睇預告按此!!
Start from 2006 ...

Info / News / Fun --- 天狗食日, 俾佢玩左半日!! 哈哈!!! :P

今朝好似黃昏咁, 原因係係香港上空出現既日偏食 (Solar Eclipse)!

大家都好雀躍咁去睇同影呢個天文現象, 我望左一眼就返埋位, 因為, 我對眼都唔係咁好, 費事傷眼或整盲埋添啦! :p~

同事S, N+R就去左影tim, 我最後問左同事S既permit, composite左佢堆相, 作為記錄今天既趣事.

成朝就圍繞著黎次既天狗食日 ...

不得不用句對聯打圓場, 天狗食日, 俾佢玩左半日!!
哈哈!!! :P


Start from 2006 ...