2010日本關西[追加中部]春の旅 | Day 7 Part 1 [TayThink / Travel / Toto]

標題： 令人著迷的神戶

Part 1 副標題：動漫化神戶的鉄人２８！

日期：2010年4月28日 (三)

天氣：晴

景點： 神戶、鉄人２８号、神戶塔、北野異人館、咖啡店、ケーキ屋 (Mont Plus) 、神戸鐵板燒牛排店 (ステーキランド)

美食： 神戸牛、草莓蛋榚 (ガトー･オ･フレーズ，Gatō. O. Furēzu ) 、法式劇院蛋榚 (オペラ，Opera) 、香橙蛋榚 (ヴァランシア，Valencia)

鉄人２８号 @神戶若松公園

喺 09年，想去東京同橫濱，原因係貴為動漫大國嘅日本會製造左一個 1 比 1 嘅動漫機械人 – 高達 (機動戦士ガンダム)，將漫畫世界帶到黎現實世界，短暫擺放响東京台場潮風公園！

而橫濱呢個日本最早對外開放嘅港口，同香港一樣係本土與西文化交滙嘅城市。為慶祝開港一百五十週年 (1859年正式對開放)，佢地搞左一連串嘅慶祝活動，當中包括開港博 + Y150展等等！

最後冇機會去東京睇高達，又冇去到橫濱參觀開港博…

不過，估唔到今日嚟神戶可以完全補返晒之前冇去東京、橫濱之旅！

因為，同年 (09年) 日人決定將另一個同樣燴炙人口嘅動漫機械人 – 鉄人２８号，同樣以 1：1嘅比例製作出黎，而且會永久擺放喺作者 横山光輝老師嘅故鄉 - 神戶市內！

而且，其實神戶只係遲過橫濱幾年對外開放（1868年），所以，同樣保留左好多當時西方嘅文化產物。

鉄人燈柱

雖然，神戶冇搞開港博，但係响呢個城市同樣可以感受一個日西交流嘅文化。

我地一早就出發，第一站先去睇鉄人２８，由大阪梅田JR站撘 嘅神戶快速唔洗一個鐘就到啦！

一落車沿住指示牌就先到左鉄人ストリート (Street)，全條街嘅燈柱就用左鉄人２８嗰頭造燈罩，日人叫佢做鉄人燈柱。
XD

一過左鉄人街，轉右入去，你就會見到有成18 米高、1 : 1 、喺半五個月前 (2009年11月25日) 先完成嘅鉄人２８号機械人所在地 – 若松公園鉄人廣場！

第一眼見到一個幾層樓高嘅 鉄人２８！真係要講句：「 "嘩！嘩！！嘩！！！真係好大個啊！！！！」

:O

鉄人２８被小朋友圍住了! :D

立即舉起「老戰友」對準鉄人２８「狂唰」！

見到鉄人２８嘅製作認真同細緻，更加感到佢雄偉嘅氣勢！

影左冇耐有一班幼稚園嘅小朋友黎參觀，佢地一見到鉄人２８就跑去攬實佢隻腳！個個都好似好鐘意佢咁！

跟住又有一位男士推住一位坐輪番嘅老婦人响鉄人２８前影相！

鉄人２８ Fighting!!

以為鉄人２８只係一個旅遊景點，不過眼見只有我地係遊客，其地到黎都係當地嘅日人，足見鉄人２８為當地人帶黎唔少嘅歡樂！

我繼續影相，不停咁擺唔同嘅 post 去襯托鉄人２８！XD

突然，聽到「咇咇…咇咇…」，「老戰友」第一舊電叫救命！！
>___<"

明明叉足電o架啦，仲有成日行程喎！點算呀！？

我地決定收手，同鉄人２８講再見，去下一站，醫肚先~
(喺 Part 2 嘅 Album 會有更多 鉄人２８嘅相，請耐心等候)

去旅行時，想了解當地文化，我諗最直接嘅方法，就係去品嚐當地美食同參觀當地嘅名勝古蹟！

廚師「手起刀落」

o黎到神戶，呢個深受西方文化影響百幾年嘅城市，當然要去試下食日西文化交流產業、舉名聞名嘅東洋美食 – 「神戸牛」啦！

撘JR唔洗10分鐘，就黎左呢間喺三宮駅 「神戸牛ステーキ専門店」，我地就試左一個「神戸牛ステーキランチ」 (神戸牛排午餐) 同 一個「ステーキLランチ」(牛排大午餐, L: 150g, S: 100g)。

如果唔係點分到神戸牛 (兵庫縣出產嘅牛，包括但馬 (日本三大和牛始袓)、佐賀牛、松板牛同近江牛)同普通牛嘅分別呢！？

o^______^o

好少食啲咩頂級牛排，更加唔識分咩國家、咩牛好味啲。

但係，喺呢度食神戶牛就一定會加分！

因為，佢地用鐵板燒嘅烹調方法，每張枱均六位客人，而一位廚師會喺客人面前泡製佢地預先點選嘅牛排，未食前見廚師「手起刀落」嘅刀法，先落牛油炒香蒜片，再炒雜菜，喺視覺同味覺上滿足之餘，更加令口水分泌激增，胃液更加儲到滿瀉，準備「一吞即化」！！

秒殺神戶牛！

廚師將牛排煎好嘅時間係 12點 27分！ 而我將成個定食食到「洗碟」咁係12點43分，只係用左17分鐘！！

真係秒殺神戶牛！！XD

食後感係神戸牛更加軟綿，但唔夠普通牛有牛味 (羶味)！！

用完口同胃去體會呢個神戶日西文化交嘅第一產業後，我地再用眼去繼續用我地雙腳同對眼去體會呢度獨特嘅歷史 – 北野異人館！！

北野異人館，其實係明治時代外國人喺北野區嘅住宅，依家變成左20幢有百年風情嘅古老大宅。

由三宮駅去北野異人館其實好簡單，只要你向北行、上一個微微嘅斜坡 – 北野坡，大該15分鐘就會到啦！

你話身上點會 "無啦啦" 有指南針！？點知邊度向北呀！？

神戶市《風見雞》

好！咁教你一個更加簡單嘅方法，就係搵下行人路上面嘅《雞標誌》，你跟住佢就會行到去異人館嘅啦！

而其實呢個《雞標誌》對神戶市係極具代表性！佢日文名叫做《風見雞》 (かざみどり | Kazami Dori)，佢唔係神戶另一種東洋美食 (所以，唔係叫神戶雞！哈哈！！)，更加唔係咩新品種嘅雞！

日文風見 (かざみ) 則係指風向計 / 風向儀。

喺 1909年，一個德國貿易商人G．托馬斯就喺北野區呢度起左一座有紅磚外牆，屋頂尖塔有一個用鐵皮打造嘅風向儀嘅大宅。

而呢位德國人就用左雞圖案做風向儀嘅點綴，成為左大宅嘅《風見雞》 ！

而因為大宅用獨特嘅紅磚做外牆，室內裝飾設計協調之餘又夠氣派，又擺放左好有價值嘅家具，日人就將命名為《風見雞の館》，成為左依家日本國家指定重要文物！！

前住「北野異人館」必走的 北野坡

亦係「北野異人館」嘅代表建築物！

由於咁重要，呢隻《風見雞》就漸漸成為左神戶嘅象徵！！差唔多凡係關於神戶嘅野都會見到呢隻雞！

o____O"

頭先講未去到異人館之前，要先走過一條微斜嘅行人路 – 北野坡，估唔到呢條咁普通嘅行人路係令我愛上神戶嘅開始，更估唔到埋下令我地兩部相機、四舊電完全用晒嘅伏線 …

…待續

更多資料
是次其他遊記

為日人再打氣！ [TayThink]

《火影忍者》嘅鳴人去救災

《One Piece》嘅路飛帶頭

雖然，311「東日本大地震」已經發生左成個月，但係民間組織對災區籌募工作竟然積極，對災民嘅支持同關懷人仍不間斷！

好似之前，一班資深漫畫家，好似井上雄彦、鳥山明老師帶頭去創作為災民打氣！其他年輕漫畫家亦都跟隨呢班老前輩，好似近年最受歡迎嘅兩本漫畫 – 《火影忍者》同《One Piece》嘅作者：岸本 斉史同 尾田 栄一郎老師都為災民設計左 wallpaper，而連載呢兩本漫畫嘅「週刊少年 ジャンプ」(少年週刊 JUMP) ，今期都免費喺網上公開畀讀者欣賞，斷續為全國日人打氣！！

《KIZUNA-Japan》「絆日本」

各設計師嘅作品

除左漫畫界，日本平面設計師協會都為振災出力，佢地搞左一個叫《KIZUNA-Japan》嘅project。

其實，KIZUNA係日文 – 「絆」嘅讀音，而意思即係”羁绊”，一種根深蒂固、不能切斷的關係。

呢個《KIZUNA-Japan》嘅 Project 以「絆日本」為主題，網站首頁嘅反白「絆」字就由書法家及設計帥嘅 平松聖悟先生為項目而題。而日本各地嘅平面設計師，則以呢個主題創作出唔同嘅作品表逹對災民呢種不離不棄嘅關係同支持！


而日本嘅音樂界亦出一份力，一於同設計界一齊 JAM Project ，將所有嘅平面設計作品配上佢地創作嘅「KI・ZU・NA」嘅主題曲，製作成【絆】KIZUNA-JAPAN 嘅MV，喺網上播放，全方位為自己國家打氣！





雖然，日人都對日政府有埋怨，但同時亦都見到佢地珍重為國家賣力嘅人，好似佢地創左一個新詞 – 「枝野寝ろ」(音 Edanoru )，意思係叫之前不眠不休工作嘅枝野幸男去睡睡，從而又諷刺菅直人要醒醒，石原慎太郎請收口，全句為「枝野寝ろ、石原黙れ、菅起きろ」。



佢地埋怨當中，冇失去方向，反而各界繼續為前路努力，將自己嘅能力貢獻出黎，作為各人嘅支持！

讓我地再次向日人講句：「頑張れ日本！」(Ganbare-Nippon! 日本加油！)


Start from 2006 ...