TayThink --- 2010年的展望。。。

以前年年既除夕都會回顧自己果年做過D乜, 今年要回顧既野太多啦！所以，只講一句展望: 不做發夢和談夢的男人，做個實現夢既男人！！

Start from 2006 ...

TayThink / Travel / Toto --- 東京蜜月の旅 | Day 2 --- Part 2

告別左爆笑既保安叔叔後，我地終於可以入黎迪士尼海洋啦!

估唔到日本人會同香港人一樣 --- "一開閘就跑入去迪士尼"!!

我地冇跑只係急步行! 因為被迪士尼海洋裡面既景吸引著而放慢步伐, 而且, 仲背著部相機同腳架, 想跑都跑唔郁. 適逢今期以Halloween做主題, 佢地就用上威尼斯既面具節來做裝飾同佈置! 真係好 ... 好 ...靚!! 加上全部建築物都好有中世紀feel, 真係Perfect Match!!


呢個樂園其實有七大主題既海港(我地最後都係行左4個!), 而我地既第一個目標就係神秘島! 因為，想玩地心探險記 (Journey to the Center of the Earth)同海底兩萬里(20,000 Leagues Under the Sea)!

可能因為我地黎既時間仲早, 冇人排海底兩萬里(坐潛水艇去深海探險), 我地當然玩左先啦~ 但係呢個遊戲太多日文既講解完全唔知佢嗡乜, distract左我地睇野, 所以唔覺得好好玩.

跟著, 我地去玩地心探險記, 未玩過唔知好唔好玩，淨係知呢個排隊既人就多好多！！
一路排隊入去, 旁邊都佈滿左好多好靚好精緻既裝飾, 我又發左癲咁係咁影相, 應該好多日本人以為我真係癲!! XD

唔理咁多! 一面行一面影, 突然發現排我地前面有兩個好斯文既日本女仔, 我地排左10幾20分鐘,佢地全程都冇傾過計! 到坐上左架探險車,我地同呢兩個日本妹妹坐喺同一架車度 (6個人一架, 佢地坐我地前面)...

遊戲開始! 佢地依然保持著呢份矝持!
o____O" [呆樣出現次數: 1]

無論架車轉圈定係擺尾, 路邊出現D乜, 佢地都係好高貴咁雙手只係搭著扶手!!!
o____O" [呆樣出現次數: 2]

突然間, 其中一個日本女仔拍下佢個friend既膊頭，跟著自己迅速舉高雙手,佢朋友又跟著舉手!!!!

呢個咁突然既舉動即刻Trigger到我! 雖然, 我唔知發生乜野事，但本能地發揮港人既本色---死跟！！XD
我即刻拍MyV既膊頭，叫佢舉高雙手同時自己又舉高，半秒都未過，架探險車原來己經到左呢個遊戲唯一睇到天空既部份(之前全部都係室內, 梗係啦! 人家叫地心探險記喎!)亦係呢個遊戲既最高點（大該３層樓高吧！），由呢度直衝落地面，大家尖叫一聲．．．己經到左地面。

定神一睇, 前面果兩位斯文既日本妹妹己經整理好剛才凌亂既頭髮，速度果真驚人，更厲害係佢地又係好斯文加好有儀態咁拎著個小包落車慢慢咁行左去~~　
o____O" [呆樣出現次數: 3]

冇野好講! 只有一個字: 勁！！！！

見識完呢兩位俾佢嚇襯幾次既日本妹妹後,我地繼續行程啦！
又玩多一個遊戲, 4D電影暴風騎士(Storm Rider), 不過, 佢就唔及美國既Soarin' Over California好玩啦~ (SOC真係好好玩, 自己真係好似飛緊一樣!! 有機會下次都一定會再玩!!!)


下一個節目就係排隊買海洋既小食名物---唐老鴨水泡型蝦肉包！！
呢條隊應該係全海洋小食要排最長既隊！@.@＂
你一路排都唔會悶因為有成班真既"唐老鴨"(真既水鴨)陪著你，因為佢地成班等緊你同佢＂分享＂呢個美味既蝦肉包！！果然係唐老鴨呀！咁鬼精！

品嚐完呢個要成400円既名物後, 可能食開左個胃, 我地去左喺日本大熱大賣既Duffy熊商店 --- Aunt Peg's Village Store旁既餐廳食我地既午餐! :D

我地見到第一個獵物(發出指令員: C) --- Duffy熊Halloween別注版既杯同碟!! :O

我地雙眼立即好似發左光咁行埋去Cashier度, 自自然然咁攞個銀包出黎! 點知再見到超靚Donald Duck Special Set既Meal Box! 即刻一手交錢一手拎貨, 完全奉獻~~

佢地名義上都係跟隨食物附送, 不過, 正確D就應該係附送食物!! XD

因為佢地既設計真係好有心思! 最慘係你會完全覺得值! 完全願意俾$$買!! XD

跟著我地就要去睇風景同表演~ 其實, 我認為去迪士尼最抵既唔係玩晒佢地既機動遊戲, 而係睇晒佢地D Show!!!

佢地既製作認真同高水準, 但係最緊要佢地既氣氛好好! 我可以話東京迪迪尼既氣氛係全球最好o既(除左佛羅里達州, 因為冇去過, 上海果個未起, unknown! :p)!! 唔係因為佢搞Show搞得特別超水準, 而係入得迪迪尼既日本人都係好瘋狂! 好投入!!! (除左之前果兩位日本妹妹!!)

香港果個應該贏到巴黎果個, 美國加州果個就當然贏香港呢, 但都真係唔及東京!!!
從我既觀察巴黎有10%人睇show時會有手舞足動, 香港30-40%(你已經好彩啦!!) 加州就應該有50-60%!!

而東京 ... 我地睇第一個show --- Big Band Beat (動感大樂團), 就真係氣氛超正!! 全場跟著個beat一齊拍手掌!! 全場掌聲雷動!!!

不過, 香港有度好, 就係可以邊睇show邊影相! 喺呢度就係嚴禁!!! 激死!!! >____<
但係因為我地遲入場唔知, 所以影左呢一張! :p

勁歌熱舞一輪後, 我地繼續周圍去睇景, 去左攞驚魂古塔 (Tower of Terror)既FastPass, 雖然啱啱過左中午, 但原來已經要排到晚上１０點幾, 差唔多最後一場!! o____O" [呆樣出現次數: 4] 唔理, 照拎著先, 睇理今晚個show先玩!

跟著, 我地去左地中海港灣(其中一個主題海港)去睇呢度既Top 2 既show, 密西哥傳奇(The Legend of Mythica)!! 個Show有海上既大型花艇, 快艇, 舞蹈同煙火! 真係又幾好睇架喎! 而呢度有間酒店叫做Mira Costa Hotel, 佢正正坐落喺地中海港灣前亦係成個樂園既正中間地點. 如果你住喺呢度, 早晚show可以喺間房度睇晒!! 正爆!!!! 朋友M Highly Recommend, 我地都想book, 不過, book 唔到!! 因為, 原來呢度好少房向著個港灣(陽臺客房), 應該一百間都唔夠, 我諗可能要一年前訂先有機會訂到!! >____<

訂唔到房既我地, 當然要喺樂園度睇啦! 頭先話日本人既投入同瘋狂係由大人細路都一樣! 我地見到有幾個叔叔, 一人抬著一部十幾磅重既大机黎拍呢個show! 因為係日頭而且又曬到死, 人又多, 我冇拎支腳架出黎, 我以為佢地冇帶腳架, 當然呢一刻我覺得自己好醒!! (不過, 之後就知道癩野 ... =.=)

我對呢班阿叔好有興趣, 第一, 成個show要成25分鐘, 咁重既机佢地唔用腳架點拎呢!? 唔會手震架咩!?
o____O" [呆樣出現次數: 5]

第二個問題, 佢地點解可以咁癲架!!! 呢個問題, 我怕羞, 哈哈! 同唔識日文冇問佢地~

而第一個問題, 佢地搞左一輪, 終於俾左答案我地!!! 三個阿叔每個人攞左一卷白色既野出黎, 睇真D, 好似布既野, 再睇真D, 原來係繃帶!!!! o____O" [呆樣出現次數: 6]


佢地一齊將隻抬著部機既手同部機紮埋一齊!!! o____O" [呆樣出現次數: 7]

果然, 厲害!!!!

佢地就係咁錄低晒全個show!!
經過咁驚嚇既一個場面, 密西哥傳奇正式開始 ...

雖然, 唔夠UV既Water World好睇, 不過, 係迪迪尼少有極富動感既水上show!!

睇完呢個密西哥傳, 我地做左一個應該唔會好多人做既事 --- 出走迪迪尼海洋!!

我地唔係返酒店休息, 而係去左離迪迪尼最近既OUTLET --- 海濱幕張車站旁既MITSUI OUTLET PARK 幕張(舊稱:GARDEN WALK OUTLET PARK)!
因為我地今次既旅程唔會有時間特登去行outlet, 不過, 有D品牌喺outlet買可以係香港既3折價錢!! 唔去又唔捨得, 咁最後就去左呢個只需要車程15分鐘既outlet~

雖然, 唔多野買到, 但係我地當然冇空手回!! 戰利品 --- 兩個法國AB牌既袋, 哈哈!!! :D

臨返迪迪尼前, 我地覺得凍凍地, 又唔想返入迪迪尼同人逼食晚餐, 於是就決定喺呢個火車站細細既Food Court度食埋晚飯! 叫左一個湯烏冬同一個北海道黑咖哩吉列豬扒飯, 個烏冬就一般, 但係個黑咖哩就出奇既得!!!

件豬扒見廚師姐姐即炸, 豬扒裡面鬆軟juicy, 外面就好脆!!!
D咖哩就好香、好濃郁~~ 讚呀!!
仲要只係980円既價錢直係冇野可以彈!! o^_______^o

食飽飽後, 我地見到一間麵包店, D麵包又好似好得咁, 我地又買左幾個做早餐, 因為咁樣聽日我地可以瞓晏D又可以早D入場玩~

我地帶著幾大袋樂園同OUTLET既戰利品, 再加埋背左成日既腳架同相機, 雖然, 超倦但係就好心急同好期望呢個迪迪尼海洋既Top One show --- BraviSEAmo!! 一個水上既激光show!!! 個腳架終於可以"養兵千日, 用在一時啦!!!" 哈哈哈哈!!!

我地早半粒鐘返埋, 但係已經坐滿晒人等開show!! 好唔容易我地揀左一個有利位置!! 今次冇死啦!! 拎支腳架出黎set緊既時候, 突然有職員飛奔過黎同我地講：「 だめ！ だめ！」("Da Me! Da Me!", 唔得！唔得！ )
o____O" [呆樣出現次數: 8]

吓!!! 冇野呀!!! 影夜景唔俾人set腳架點影呀!! 好! 我地以為佢地唔俾人喺呢個有利位置度set, 咁我地去左一個前面有成半個人高既圍牆度set, 而且set到支腳架同幅圍牆一樣高啦!! 點知又有人飛奔埋黎, 又講：「 だめ！ だめ！」 o____O" [呆樣出現次數: 9]

吓!! 背左支腳架原來只係白拎!!!! @_____@"

場show已經差唔多開始啦~ 已經, 唔可以再搵第二個地方, 咁唯有盡人事利用呢個圍牆, 放部機喺上面影啦~ 激氣呀!!! >______<"


場show係好華麗同震撼, 不過, 俾人"窒著, 窒著" 真係唔係太開心~ :(

睇完個show, 我地諗著應該只係show time 既時候唔俾人影相啫! 咁我地又想set腳架影普通既景, 點知又有人撲出黎又話：「 だめ！...」 我未等佢講晒成句, 我已經自己收番隻腳架 ...

唉...真係掃興!!! 不過, 我地扲著咁多戰利品, 再加上體力已經嚴重消耗, 我地決定返酒店, 唔玩攞左Fast Pass既驚魂古塔, 聽日又要作戰 --- Tokyo Disneyland!!!!


[View More Pic & Slideshow of Day 2 Here]
[Facebook朋支, 請click Here | "查看原文" 睇其他相同slideshow啦!]


Day 2 完!

Start from 2006 ...

TayThink --- 聖誕節不知為何想去聽音樂, 更想聽些較傷感的~

上年既聖誕節去左朋友既美妙既手鈐音樂會, 今年冇去度 ... :{

今年又到聖誕節, 唔之點解又想去聽音樂, 更想聽D較傷感既~

呢排仲鐘意聽呢兩首, 香港交響樂團既小提琴手張希演繹既詩歌 --- 神的應許同細時睇日劇, 聽(睇)到會喊既"101次求婚" (你地記唔記得邊套呀? 矢吹薫小姐同星野先生呢?)裡面既主角矢吹薫小姐演奏既蕭邦 離別曲 (Chopin Etude Op 10 No.3), 我就聽朗朗演繹既版本.

[小提琴手張希演繹 --- 神的應許 | Video Here]


[朗朗演繹 --- 蕭邦 離別曲 (Chopin Etude Op 10 No.3) | Video Here]


[Facebook朋支, 如果睇唔到請 click Here or "View Original Post" | "查看原文", 也可在我個blog上俾comment]

每次聽完呢兩首歌都有眼淚湧湧出黎既感覺, 係兩首好悲傷既音樂, 我諗呢D就係叫做聖靈既感動, 要我去記念耶穌基督~

聖誕節當然要開開心心啦? 但係係咪淨係開心就夠呢!?

喺黎度我想同大家分享多一首既詩歌, 呢首係喺近日教會既浸禮上聽到既 --- 誰是主角

[誰是主角 | Video Here]



今日係平安夜, 我想喺度想同大家講句聖誕快樂!

希望神永遠給大家真正既快樂同平安!
o^______^o

Start from 2006 ...

News / Fun / Gadget Stuff --- G記新OS既有趣官方廣告

自己都幾鐘意睇G記既廣告, 因為都好有創意~

縱然, 佢地今次個廣告賣佢地既Broswer多過個OS (因為,佢地地都係靠網上廣告糊口的!! XD 而個OS最大既賣點係開機快! 到LOGIN畫面既時間只需7秒!!! o____O"), 但係呢個用上精密、有趣同用心的拍攝技巧, 真的不得不讚!!

O^______^O

[Video Here]


[Facebook朋支, 如果睇唔到請 click Here or "View Original Post" | "查看原文", 也可在我個blog上俾comment]

More Info about Chrome OS
Start from 2006 ...

TayThink / Travel / Toto --- 東京蜜月の旅 | Day 2 --- Part 1

係朦朦朧朧既睡夢中, 從耳邊聽到迪士尼的音樂, 仲以為發緊夢添~ 不過，一看鐘，原來已經係7點半, 又到起身既時候啦!

是日作戰地點係東京迪士尼海洋 Disney Sea!!

其實，本來今日會幾得意! 因為，我地約左阿媽同家姐佢地係SEA度見面，跟著可以一齊玩添!! 係! 我地真係想喺SEA既大門口會合!!! 哈哈!!

其實，我地結婚之後既果一日阿媽佢地一早就跟團黎左東京，原本我地既完美計劃係今日一齊玩，家姐仲安排好晒成個遊海洋既行程!! 不過，由於佢地個團臨時更改行程，佢地已經玩左迪士尼，依家(今日)係富士急，我地join唔到一齊玩lu~ 不過都冇所謂啦! 一齊玩有一齊玩既開心玩法, 自己又有自己玩既開心玩法，呢個可能就係迪士尼好玩既秘密，哈哈!! XD

我地冇book迪士尼酒店既早餐，一來覺得如果要食酒店既早餐就要慢慢嘆冇咁既時間，二來唔會平，三來冇BOOK，唔想白去同等位，四來酒店旁邊有個咁大既商場一定揾到野食o既~ :D

咁我地帶齊裝備相機同新買既腳架出去，我地會搭Disney Resort Line(酒店送既3-day 免費 pass)去SEA，途中我地經過火車站旁一間細細既咖啡店，裡面傳來陣陣既咖啡香，我地睇下個MENU都OK，咁就坐低先食左個早餐先~ 估唔到呢個三文治早餐會咁好味又醒神，因為佢地搽左一層薄薄既芥末醬! 再加上一杯唔錯既咖啡，醒晒!!! o^_____^o

由於我地係坐既位置係背著個門口, 我地食完個早餐扲轉頭見到店外完來已經人山人海，大排長龍! 估唔到呢間野原來咁受歡迎!? 哈哈!

去到火車站已經感受到日本人對迪士尼既熱情, 場面墟冚! 好彩我地喺香港已經買左飛，所以唔洗排隊買, 只係排隊入場~ 不過，都係好多人~ =.=" 如果今日係假日真係唔知會係點!?

我地早左10幾廿分鐘排列等入場，有一個負責安檢，大該4、50歲既保安叔叔，不停叫大家耐心等待好快可以入場...(我估係), 排我前面既日本o靚仔就頂唔順當張安檢枱係瞓覺枱，又瞓又玩 ... 各人都悶到要爆既時候 ...

估都估唔到...

突然間，果位保安叔叔真係要爆啦! 佢大聲講左一輪正經既日文(我仲以為佢"醒"個o靚仔, 同個個人都冇乜反應)，點知佢蹹完一輪就立即跳起舞上黎，個o靚仔當堂醒晒!! 應該話係附近既人全部都醒晒!!呢一幕身為香港人既我就立即諗起"少林足球"既豬肉佬(佢個肚腩都有幾成似o架!! 哈哈!!! XD)!!! 佢大跳一輪，最後黎一個極速720度旋轉再擺左一個爆笑黃飛鴻既POST結束佢呢PART舞!! O_____o" + :D

大家立即拍爛手掌，保安叔叔帶著微笑，90度躹躬向大家答謝!!

當我慨嘆世界難撈既同時又好敬佩呢位保安叔叔既敬業樂群既精神!! 佩服!佩服!!

經過保安叔叔既一番熱舞之後，迪士尼海洋正式開門! 未入迪士尼海洋已經有咁大驚喜，唔知跟著喺樂園裡面會唔會遇到更多更大既驚喜呢!? 好期待呀!! >______<"


Day 2 - Part I 完 ... 敬請待續 つづく!
Start from 2006 ...