Fun / Travel / Comic + Anim / Apps --- 1比1 紅彗星 ─ 渣古，出現喺東静岡駅！？

2010 / 09 / 02  最新消息！ 除左紅彗星，啱啱仲加左新機種 Raiser(ダブルオーライザー)！！ 快D去update 個 App 啦！！

1:1 ガンダム & 赤い彗星 @ 東静岡駅
img from yahoo.co.jp

六月個時話 1比1 高達 (ガンダム) 已經樹立左喺靜岡模型展覽會嘅會場，即係東静岡駅嘅駅前広場！


7月展覽已經開催，人潮不斷，熱潮依然未減！

高達 A.R. 碼

有報導指影到有 架1比1嘅紅彗星 ─ 馬沙專用渣古 (赤い彗星 ─ シャア專用ザク) 出現左喺 高達 (ガンダム) 旁邊！？

o______O"

點解咁大單野都冇人提過架呢！？


哈哈！其實，呢張相只係一個 "愛瘋" App 造出黎！不過，絕對唔係就咁 KEY 上去果隻！

個App叫做「ガンダムAR」(高達 [機動戰士] AR)！

佢係一個免費 App (要申請一個日本 iTunes Account 先)， 由 日本阿虎網開發，為左推廣佢地嘅「ガンプラ30周年記念特集」網頁。


佢地用左 A.R. (擴增實境, Augmented Reality)嘅技術，你可以將部虛擬立體嘅紅彗星放左喺高達隔離！

「ガンダムAR」(高達 [機動戰士] AR)
img from iTunes

佢地話因為唔想得高達一個咁悶，所以用A.R.黎自動建造一個虛擬立體嘅紅彗星！


要玩呢個自動製造架紅彗星，除左你要部 "愛瘋"(一定要 3GS或者 4啊！ >_<")，Install 埋佢地個App, 仲要呢個 A.R. 碼！


如果你部"愛瘋"已經裝左個 App，當你去到東静岡駅見到1比1高達時，你第一時間唔係打開個App，而係要望下個鐘！！


睇下你果時嘅時間係咪喺
10：00 am 至8：00pm！


因為，呢個App話係由時間限制，不過，估計係因為唔想穿崩多啲！ 因為，會場開放時間都係10：00 am 至8：00pm，哈哈！

1比1嘅立體紅彗星  (赤い彗星)
img from iTunes

如果時間啱，你開住佢個 App 鏡頭對住高達，拑App嘅第一項「静岡AR起動」！！



登…登…登…登…！！！


1比1嘅立體紅彗星 ─ 渣古 (赤い彗星 ─ シャアザク) 就會出現喺你部"愛瘋"嘅畫面度！！


咁你就可以同時影到兩大主角啦！！


不過，都要學日本阿虎網提醒大家，唔好長時間擺住喺度影紅彗星同高達，以免打擾其他遊人！

How to use!?
img from iTunes

咁我地呢啲冇得去静岡嘅粉絲，咁裝呢個 App咪冇用！？

:O

咁又唔係喎！ 

大家其實喺屋企都可以用高達 A.R. 碼 call 紅彗星 出黎！

擺好個高達 A.R. 碼之後，開番個 App，再拑「マーカー AR」(Marker AR) > 「シャア専用ザク」(馬沙專用渣古) …

馬沙專用虛擬立體渣古會出現响你部"愛瘋"嘅芒上！

紅彗星 ─ 渣古 (赤い彗星 ─ シャア) 出現！
img from iTunes

紅彗星 (赤い彗星) 360度出現响你面前！！

更多資料：

如何申請日本 iTunes 帳號? Here
日本阿虎網： 「ガンプラ30周年記念特集」
日本 iTunes 下載網址：「ガンダムAR」
其他利用 AR 嘅App + 玩具：Parrot AR. Drone

Raiser (ダブルオーライザー) 2010/09/02出現！

img from iTunes

Start from 2006 ...

TayMade / TayThink --- Tay's Blog 新"趣"！？

近黎有興趣幫自己個 Blog 加左多啲功能，等大家睇得開心啲！ 最後，加左 6 個新功能响個 Blog 度！希望大家鍾意同俾啲意見啦！ 多謝晒！

:D

1. 訂閱燃燒器 ( FeedBurner )

Be My Reader

喺右手面，你會見到一項叫 "BE TAY'S READER"嘅標題。

冇論你用嘅咩網上閱讀器 (News /RSS Feed Reader)，好似 google嘅、yahoo嘅或者係netvibes，你要 click 我自訂嘅 Icon (RSS icon) ，你就會去到訂閱燃燒器 ( FeedBurner ) 版面，你選擇你用緊嘅閱讀器，再一 click就可以免費訂閱我個 Blog，成為我嘅讀者啦！ 係咪好方便呢！？

2. 標籤雲 ( Tag Cloud )

標籤雲 ( Tag Cloud )

即係將所有我個 Blog 用過嘅 標籤 (Tag) 擺埋一齊，而以使用次數累積計算，邊個標籤响度用得越多嘅，就會越排得前，而且會個字仲會越大隻！

你 Click 邊個標籤 (Tag) 就會列出我個 Blog 所有有關果個標籤 (Tag) 嘅 post！

而我頭 3 個最常用嘅標籤 (Tag) ，就係 Fun，TayThink 同 Travel！好在仲合乎我6年前，開呢個 Blog嘅方向！

睇下我個 Blog嘅 subtitle, "are you interested, too?"
就知我呢個 Blog 就係要 post 我覺得 (TayThink) 有趣 (Fun)嘅野，同希望大家都覺得有趣！

而我其中一件我覺得最有趣嘅事當然係旅行 (Travel) 啦！所以，佢排第三！！ hehe~

而你見到我用左 N年嘅 Logo，都係 N年去過土耳其時創作出黎o架。頂漁夫帽同個裝束就係我當時遊土耳其時個 Look！


哈哈！

3. 相片幻彩箱 ( FancyBox )

相片幻彩箱 ( FancyBox )

大家以後唔洗 click 完啲相走左去新嘅一頁，要拑番 "back" 掣先返到轉頭睇埋落去！

你 click 响 post 上面嘅相，一個相片幻彩箱 ( FancyBox ) 就會出現喺同一頁度。而且，你將 mouse擺喺幅相嘅左右兩邊，你會見到有 左右箭咀 icon 出現，你click下佢就會去前一張或後一張。

而如果你個 mouse 有 wheel，你更可以轆前轆後咁睇相！

你拑 「X」 嘅 icon，個幻彩箱就會消失，去返個post 度。

你又或者拑 keyboard 嘅 "Esc" 都可以！

不過，依家用 IE 嘅朋友會見到啲掣，仍在處理中。
=.="


4. 快速分享掣 ( Share Buttons )

快速分享掣 ( Share Buttons )

响每個 Blog 嘅文章後，即係 Labels ( Tag ) 嘅旁邊你會見到一條灰色嘅 Bar，你用 mouse 指住佢，佢就會變色！

你只要 click 一下，你想分享去邊度嘅 icon，佢就會可以迅速將呢個 post 分享到你指定嘅地方！ 仲有齊 Gmail, Blogger, Twitter, Facebook 同 Buzz 嘅 分享掣 ( Share buttons ) 添 ！！



5. 快速反應掣 ( Quick Response)

快速反應掣 ( Quick Response)

因為，知道大家都好忙，所以，特登加左呢排 快速反應掣 ( Quick Response)
俾大家可以 click 下 唔同嘅形容詞去俾下意見，好似有："正爆, 超得意, 超鍾意, 型爆, 無聊, 有用, 癲嫁"！

當然，你想俾自己嘅意見， 梗係都無任歡迎，請 click "Comments" 去意見欄。


6. 快速俾 ★★★ ( Quick Rating )

快速俾 ★★★ ( Quick Rating )

你仲可以俾 ★★★★★ 我為呢個 post 嘅 評分( rating ) 添！

又係一 click，不記名俾分，極方便啦！





希望大家俾多嘅意見我，等我繼續改進啦！

o^_________^o



Start from 2006 ...

TayThink / Travel / Toto --- 2010日本關西[追加中部]春の旅 | Day 4. Part 1

前遊記： Day 3. Part 3


日期：2010年4月25 (日)
天氣：晴 (曬到盲 >_<")
標題：速遊&速賞『萬 KAI』櫻 @ 兼六園


景點： 兼六園 ( けんろくえん, Kenroku-en )、
          白川鄉（しらかわごう, Shirakawa-gou）、
           
美食：白川鄉薯餅

兼六園公園入口及商店

今日，我地會去兩個景點，一係日本三大名園 の 一嘅兼六園 ( けんろくえん， Kenroku-en )，二就係有世界民化遺產嘅白川郷( しらかわごう，Shirakawa-gou )！

食過早餐後，我地就由喺山中溫泉區嘅"驚喜"酒店出發，大該一個鍾頭車，就會去到我地第一站嘅兼六園！

佢貴為日本三大名園 (其他兩個喺水戶市嘅偕樂園同岡山市嘅後樂園)，佢更係三名園之首！原因可能係佢個名嘅由來！

入口處嘅白櫻花樹

由 wiki 知道"兼六"出自我國宋朝詩人李格非的《洛陽名園記》，分別指「宏大・幽邃・人力・蒼古・水泉・眺望」 ( Spaciousness & Seclusion, Artifice & Antiquity, Water-courses & Panoramas )。李格非認為名園要符合以上 6個條件，而命名兼六園嘅人，奥州白河籓主白河樂翁就一定覺得呢度符合晒啦！

不過，wiki都指出呢三個名園都唔太代表到日本，因為，佢地都冇日本傳統嘅園藝枯山水 (即係一大片白色嘅碎石，上面擺幾舊大石果隻，字面解即係「乾枯的山與水」)！辜勿論佢係咪有齊嗰 6 個條件，定係夠唔夠日式，但係真係可以用個靚字去形容佢！而且，佢地真係花盡心思、金錢同時間！起呢度嘅加賀籓籓主，佢地用左 8 代人，共 180年先起完！
真誇張！！
o_____O"

兼六園の垂櫻

導遊可能感受到我地 (我冇o架！:p) 對琴晚間酒店嗰股強烈嘅「黑面の氣」！

我地一上到車，佢就同大家講：「我有個好消息，頭先司機同行家傾過電話，話喺兼六園仲有啲櫻花，而且，白川鄉嘅櫻花仲要係『萬 KAI』！」

嘩！咁正！！

其實，日人對大自然四季嘅變化好關注，因為佢地鍾意四季行樂！佢地有網站每日報告日本各區櫻花嘅開花或者紅葉轉紅嘅情況！而前年因為佢地嘅天文台預測錯誤，佢地嘅台長差啲要引疚辭職！

真係唔講得笑！

満開嘅櫻花

而佢地嘅將個開花度分成 8個 level ：由
つぼみ (音：Tsu Bo Mi) (0%) | 開花(1~ 20%) | 開花(21~ 40%) | 開花(41~ 60%) | 開花(61~ 80%) | 満開 (81~100%) | 葉桜 | 散り始め。


『萬 KAI』(音： メン¹ カイ⁴，MEN KAI ) 就係満開 (81~100%)！

即係櫻花完全開晒嘅狀況！即係我地會見到盛放嘅櫻花！！

因為，我地唔係依家已經係四月中後旬嘅時候，所以，見到「櫻花満開」，真係要感恩啦！

大家聽到呢個消息，都即刻好興奮！

満開嘅櫻花

冇耐我地已經到兼六園，落車已經見到一棵好高嘅満開嘅白櫻花樹，入到公園已經有好多人聲，原來有棵満開嘅粉紅櫻！

大家都好興奮咁跑過去，冇論中、日、外國嘅遊客都圍著佢喪影！因為，我地逗留嘅時間唔多，見咁多人我地就先參觀其他地方先返黎！

兼六園真係好大，我地留喺度只得一個鐘，我諗我地差唔多用走嘅方式都只係行左佢嘅4分之一！！

呢度有唔同嘅水池、噴泉同亭台樓閣，又有好多唔同嘅植物，連櫻花都唔知有幾多種！

其中一棵垂櫻嘅姿態真係夠晒娥娜多姿 (真係好少用到呢個形容詞)！又有十層樓咁高、咁雄偉嘅大松樹！

行左一陣我地已經要返轉頭去影棵満開嘅粉紅櫻，佢真係好靚，一撮一撮粉紅櫻花聚埋一齊！而且，每朵都好大朵！

忍唔住要黎番張「怪俠一支"櫻"」！！哈哈！
XD

忍唔住要黎番張「怪俠一支"櫻"」! 我冇咬落去o架！

因為，行唔晒兼六園，唔知佢符唔符合晒 6個條件，不過，今日兼六園一定符合唔到其中一個，就係「幽邃」(seclusion, 清淨、與世隔絕)，因為我地喺度夠晒嘈！
一.一

我地當然趕唔切去行埋隔離好有名嘅金沢城公園，只係喺城門口影左一張到「此一遊」就匆忙上車 Lu~


之後，去另一個景點，位於岐阜県大野郡嘅白川鄉（しらかわごう）！

除左立山，白川鄉都係我地第二次黎，但係同樣都係咁鍾意！！

白川鄉薯餅

而由石川県去岐阜県，都要成個半鐘車，去到已經係中午時候，好彩今日冇其地景點所以可以留耐啲，今次我地更加有得去展望台，去鳥瞰成個白川鄉！

到左白川鄉之後，導遊想先帶我地去展望台，唔食晏住。

不過，大家又有少少肚餓，咁佢就介紹左我地去食呢度嘅薯餅 (間鋪頭係喺展望台小巴站斜對面)，我地一路排隊等去展望台嘅小巴，一路食呢個薯餅，又真係幾好食喎！
:P~~

點解要等左十幾廿分鐘都未有車架！我個薯餅食晒好耐啦！

呢度好曬呀！

=.="



…待續 






更多資料：

1. 兼六園     http://www.pref.ishikawa.jp/siro-niwa/kenrokuen/
2. 金沢城     http://www.pref.ishikawa.jp/siro-niwa/kanazawajou/
3. 之前遊記
    Tay 2010 日本關西[追加中部] 春の旅 其他遊記

TayThink / Travel / Art / Design --- 因為"湯"，所以，愛上了"瀬戸內"！？

談及國家：希臘、日本
談及地區：直島 (Naoshima) / 豊島 (Teshima) / 女木島 (Megijima) / 男木島 (Ogijima) / 小豆島 (Shodoshima) / 
                大島 (Oshima) / 犬島 (Inujima) / 高松港 (Takamatsu Port) / 宇野港 (Uno Port) / 瀬戸内海 (setouchi) 
                [日本, Japan]
談及季節：─
談及節日：瀬戸内国際芸術祭
談及話題：藝術、日本浴場



有冇試過因為一幅相，或者一本書，又或者一個網頁就想去當中提及嘅地方呢！？

好多年前，因為睇過一個台灣網頁叫做《我的心遺留在愛琴海》，由於作者影下好多好靚嘅相，就愛上左希臘，愛上佢地唔同嘅島嶼，當中最想去嘅係佢地最出名嘅 Santorini (聖托里尼)島！

《直島銭湯「Ｉ♥湯」》
img from amazon.co.jp

近排 (已經係成個月前啦！ =.=" ) 喺網上見到一本日本書，就好想去果度。講一間日本公眾浴場 (風呂)，書名叫《直島銭湯「Ｉ♥湯（あいらぶゆ）」》。

如果，你話依家好興 Design Hotel，咁我就會話呢間係 Design Bathhouse！！

其實，呢間公眾風呂位於直島，名叫錢湯 (Sento)。日文嘅「湯」唔係指我地平時飲果啲，而係指熱水！

而佢日文嘅平假名係「ゆ」，發音係 "yu"同 英文嘅 you 同音，所以，書名嘅由來就係《直島銭湯「Ｉ♥湯」》 (Sento Naoshima「Ｉ♥ you」) 啦！
改個名都咁好有心思！ 讚呀！


由於戰前嘅日本唔係咁多人响自己屋企有浴室，所以，當時公眾浴場嘅出現即刻喺民間流行起黎。而且，對於日人嚟講公眾浴場唔單係一個沖涼嘅地方，佢同時亦一個俾居民去娛樂、傾計、交流同聯誼嘅好地方。

直島銭湯
img from setouchi-artfest.jp

據呢個 project 嘅 producer ─ 福武 總一郎先生講，佢想起一間喺富藝術又被當地居民鍾意嘅公眾浴場。籍此去回饋佢地一直對當地藝術發展嘅支持，亦希望可以幫助佢地維持島上嘅活力。

而且，可以俾當地居民同遊客一起使用浴場，一面浸浴，一面交流，結合左藝術、旅遊同當地民生嘅一個浴場。

福武先生揾左响東京出生嘅藝術大師 ─ 大竹伸朗 (Shinro  Ohtake) 嚟起，浴場由外到內到由大竹伸朗大師一手包辦，佢用左剪貼簿 (scrapbook) 嘅方式去打造呢度！

直島銭湯 ─ 馬賽克風呂
img from 47news.jp

由外貌到室內設計，你會見到唔同但奇特、有趣嘅"移植" (graf)物！ 好似喺外面有舊飛機倉、船底、仲有屋頂嘅松樹，成間已經好似「哈爾移動城堡」，而室內設計都同樣有有趣又細緻嘅"移植物"，好似有一隻可能曵曵嘅象仔雕像，因為佢係由色情博物館收集番嚟o架，哈哈！

而因為大竹伸朗大師想將佢喺 60年代 (即係佢讀書時期)，浴場嘅所有記憶擺起呢度。佢由當時佢睇到嘅、聽到嘅、嗅到嘅而至當時感受嘅風氣都全部放晒入嚟，希望俾嚟呢度沖涼嘅朋友，感受到佢當時感受到嘅一切！

夜間的直島銭湯
img from amazon.co.jp

由於係分開男、女賓部，各自睇嘅野都會有啲唔同，不過，男女都會見到大量 60年代嘅照片、海報，而响浸浴嘅地方好似池底同牆身都會見到好仔細嘅馬賽克同 瓷磚畫，完全打造一個可以令你完全鬆弛享受而且全情欣賞嘅浴場。

而且，佢地煲嘅「湯」(熱水) 都係完全用 60 年代慣用嘅燃料 ─ 木材嚟煲！！

由大量有趣又細緻嘅"移植物"至到用咩燃燒煲水，都盡見大竹伸朗大師對細膩同完美嘅追求！

即使香港已經都係熱到跳舞，但係我都真係好想去一去喺直島呢個「哈爾移動浴場」 ─ 錢湯度浸番個熱水涼！

「錢湯」都係由當地旅遊機構營運，佢確實對當地嘅旅遊業增加唔少活力同經濟効益，因為除左入場費，呢度仲有好多紀念品賣，好似 T-恤、毛巾，就連浴盆都有得賣！！勁！！(可參考浴場嘅網頁最尾嗰頁)

你可能會話藝術唔應該咁商業化，但係我會話搞藝術係真係需要錢嘅，同埋要呢間浴場可以營運落去，咁呢個浴場藝術先可以活力，即係持續性。如果，只係一座荒廢左嘅浴場，咁就唔係大竹伸朗大師最初嘅設計概念 ─ 給人一個活生生啲沖涼體驗！而香港就真係好少睇到可以持續嘅藝術，而呢啲咁周詳同長遠持續嘅設計，喺香港就係真少之又少！

而佢地網頁有一個部份，仲教埋大家點樣正確使用浴場，減少文化誤解同衝突！真細心！！

跟住再去了解下直島嘅其他旅遊名勝，先知道原來十幾、廿年前，直島都只係一個簡樸嘅漁村，後來由福武美術館集團將呢度打造成一個當代藝術島！

Benesse House
img from dailyicon.net

其中一個轉捩點就係喺 1992年，佢地邀請左建築大師安藤忠雄 (Ando Tadao) 起左「貝尼斯之家」(ベネッセハウス，Benesse House) ，一間集酒店同藝術館於一身嘅藝術館 / 酒店，令直島聲名大噪！

而佢地喺 1994 年開始左 「Out of Bounds」嘅藝術頂目，令到藝術品不再局限左喺藝術館內，發展出「地點指定藝術品」(site-specified works )，接而有「Art House Project」將當地嘅舊屋改建成唔同嘅藝術屋，讓藝術品與直島嘅自然同古傳統共生…

Benesse House - Ovalimg from dailyicon.net

之後，安藤忠雄更建左另一間型格美術館 ─ 地中美術館 (ChiChu Art Museum) ，聽講當中只有 3 件藝術品，但係好多人都話值得去，其中有一個由美國地景藝術家瑪莉亞（Walter De Maria) 創作 ─ 《Time/Timeless/No Time》，仲擺左我最鍾意嘅印象派畫家 ─ 莫內 (Claude Monet) 嘅《睡蓮 Water Lilies》系列嘅形象派畫！同時 Benesse House 都不停發展，之後再建左藝術公園同沙灘，有完善同各式各樣嘅餐廳同酒吧！

草間彌生 黃南瓜
img from yayoi-kusama.jp

直島嘅藝術發展吸引左法、美、日唔同嘅藝術家黎呢度做創作，而且，佢地嘅創作並唔係局限左係藝術館內，而係佈滿喺島上不同嘅戶外地方。 當中可能令大家最有印象嘅竟係由日本怪婆婆之稱嘅草間彌生 (Yayoi Kusama)嘅赤、黃南瓜！


大家喺宮浦港碼頭一上岸就會見到「赤南瓜」黎歡迎你！而坐落喺海濱嘅「黃南瓜」更係直島嘅地標！


而呢股藝術嘅香氣冇淨係停留左响直島，而係由直島散發出去其他喺瀨戶內海各個嘅小島上。 


而原來佢地依家啱啱舉行緊一個藝術節  ─ 「瀬戸内国際芸術祭 2010」！

鈴木康広 ─「拉鍊之船」(ファスナーの船)
img from axisjiku.com

而且，今年已經係第 6 年舉行啦！當中有不少嘅藝術創作我都好鍾意，好似喺女木島 (Megijima) 由鈴木康広創作嘅「拉鍊之船」(ファスナーの船)、「不在 の存在」、海鷗停車場 (カモメの駐車場) ，仲喺豊島 (Teshima) 嘅廚房島 (Shima Kitchen, 島キッチン)、與紫菜一起動搖。(Swaying with Laver，ノリとたゆたう。 ) ，男木島 (Ogijima) 嘅男木島の魂 (Ogijima’s Soul)，宇野港 (Uno Port) 嘅宇野黑鯛 (宇野のチヌ)…

其實，之前唔少香港同台灣嘅傳媒都有介紹過呢個藝術節。不過，可能就係自己唔夠藝術感同藝術意識，所以，冇留意到！更加有台灣旅行社推出為期 21日嘅藝術節專題遊！！


雖然，好難將瀨戶內海同希臘黎比較，佢地各有唔同嘅特色。


但係，佢地各個唔同嘅島嶼都係我好想去探望嘅地方，幾時可以去享受歐陸遊閒風情？或者幾時可以去吸收一下藝術香氣？幾時可以曬個日光浴？幾時可以浸個「湯」！？


o^_______^o



瀬戸内国際芸術祭2010　開会式 「Memorial Rebirth」 ART SETOUCHI 2010



作品#34 ─ 「ファスナーの船」(拉鍊之船) @ 女木島



作品#38 ─ 「不在の存在」レアンドロ・エルリッヒ @ 女木島



其他旅遊及參考資料


直島銭湯
開放時間：下午2:00 – 晚上9:00 (平日) ，上午10:00 – 晚上9:00(星期六及日)
費用： ¥500，直島居民 ¥300，15歲以下 ¥200
地址：香川縣香川郡直島町2252-2
網址：www.naoshimasento.jp


Benesse House Museum
地址：香川縣香川郡直島町琴彈地
開放時間：上午8:00–晚上9:00
門票：¥1,000，15歲以下免費 
網址：www.naoshima-is.co.jp


Benesse House
地址：香川縣香川郡直島町琴彈地
房租： ¥20,000起，包早及晚餐及Art House Project 門票
網址：www.naoshima-is.co.jp/#/house/hotel/rates_en
交通： 從宮浦港乘酒店穿梭巴士直達，需時約20分鐘。


地中美術館
地址：香川郡直島町3449-1號
開放時間：夏季（3月1日至9月30日）上午10:00 – 下午6:00、
                冬季（10月1日至2月28或29日）上午  10:00–下午5:00 （逢周一及12月30日至翌年1月2日  休館）
門票：¥2,000（約HK$180），15歲以下免費
網址： www.chichu.jp
交通： 每小時有1–2班巴士從宮之浦碼頭經過Benesse House到 地中美術館，需時約20分鐘。




瀬戸内国際芸術祭

會場：瀨戶內海 の7個島嶼＋高松港
時期：2010年7月19日 - 2010年10月31日
門票：成人¥5,000、中學生¥3,000，中學生以下免費

官網：setouchi-artfest.jp/

交通： 從大阪關西國際機場入境，轉搭JR電車或機場巴士前往高松市 (四國香川縣)。
          JR電車約需3小時30分鐘；機場巴士約需3小時35分鐘。

當地交通：由高松市高松港搭乘交通船前往直島，船程約1小時，島上有環島巴士及計程車

瀬戸内国際芸術祭応援サイト (瀬戸内国際芸術祭支援網)
網址：www.setouchi-art.jp

香川県互聯網放送局

網址： http://www.youtube.com/user/PrefKagawa#p/

大竹伸朗如何製作銭湯瓷磚壁畫

網址： http://www.inax.co.jp/company/news/2009/070_culture_0826_463.html

瀬戸内国際芸術祭 iPhone App【ArtSetouchi】
網址：http://itunes.apple.com/jp/app/artsetouchi/id381685651?mt=8


Art @ 瀬戸内海


在較大的地圖上查看Art @ 瀬戸内海












Start from 2006 ...