TayThink / Travel / Toto --- 2010日本關西[追加中部]春の旅 | Day 3. Part 1

立山登山駅: 扇沢駅

 [Facebook朋支, 請click Here 或 "查看原文" 同 "睇相片投影" ] 

點解喺一個唔係旅遊旺季既時間，揀去一個要俾旺季價錢既團呢?

又點解唔遲唔早，要喺呢段時間黎呢個鄉下地方呢?

又點解去過一次既景點，又要再黎多次呢?

白馬酒店 | 今日得8度!?

兩年前，見到兩張既poster, 一張係喺封山前影嘅相。背景有一座山，山頂蓋住一層潔白既雪，而山腰至山腳就蓋住一大片紅葉，再加上喺蔚藍色既天空上，懸掛住一架橙色既纜車! 顏色豐富同層次分明，美不勝收!

另一張就係喺開山後影嘅。一架旅遊巴喺兩幅4層樓高既雪牆中間駛過，場面震撼萬分!


而呢個地方就係以上3條問題既答案，亦係呢兩張poster拍攝所在地 ── 立山 . 黑部。

立山 . 黑部(Tateyama Kurobe)位於人稱日本阿爾卑斯山脈既日本中部山嶽國立公園內，而立山係一個高2,450米既山，而黑部就係指呢度既黑部湖(Korobeko)同埋黑部水霸(Kurobe Dam)。 每年，逢冬天大該11月中旬至4月中旬呢度會封閉，都唔會俾任何旅遊人士前往，原因係呢度太危險啦!!

:O

照和38年(1963年) 6月 完工

未答點解冬天呢度會咁危險之前，等我先講吓呢度點解會有個水霸先。其實，日本喺50、60年代經濟大蕭條，日人就諗點樣可以 創造就業又可以用平成本既方法黎發電，從而去發展自家既工業呢?

佢地就諗到利用呢個立山黎做水力發電! 你地可能會諗咁立山嘅黑部湖一定係好大同有大量既水源，咁先可以做到水力發電嘛~  um ... 啱左一半啦! 佢地之可以做到水力發電唔係黑部湖嘅水源，而係立山嘅"雪"源!! 每逢冬天立山一帶(日本阿爾卑斯山脈)都會有好驚人嘅降雪量，咁有幾驚人!? 呢度可以落成廿幾米厚嘅雪!! 即係成6、7層樓高嘅雪!! 相信任何人上山，都應該冇幾多個可以出得番黎，呢個就係呢度危險嘅原因!!!

o_______O"

黑部水霸 (Kurobe Dam)

所以，就算黑部湖冇咁大既水源，但係立山就有大量嘅溶雪水!! 由於有咁厲害嘅落雪量，所以為左旅客既安全，立山會喺冬天嘅時候封山! 等大雪嘅季節過左，先會重新開放俾大家參觀!  但係咁厲害嘅雪，會將整個山頭同所有嘅路都完完全全覆蓋住!! 日人習慣左係惡劣嘅大自然生活，佢地又點會蠢都等幾個星期俾啲雪自然融晒先上山呢!


佢地會先利用先進既衛星導航系統(GPS)喺一大片雪地上搵番啲路出黎，跟住用巨型嘅鏟雪車鏟番條路出黎!! 而呢個每次開山嘅工程，形成左一條擁有兩邊高高雪牆嘅馬路; 造就左立山擁有第二個舉世嘅靚景 --- 立山雪の大谷!


日人將立山封為三大靈山之一，與富士山同白山齊名。我地中國人有 一句話係:「不到長城非好漢! 」而日人都有一樣類似既觀念，就係日人:「人一生必登一次立山!」


食過酒店嘅豐富早餐後，初春既立山我來也!!

TayThink / Travel / Toto --- 2010日本關西[追加中部]春の旅 | Day 2 . Part 2

公路休息站

 [Facebook朋支, 請click Here 或 "查看原文" 同 "睇相片投影" ] 




由上高地去山葵大王農場(大王わさび農場, だいおうわさびのうじょう)要成個鐘頭車，倦極既我地以為一上車就會好快瞓晒，但係估唔到突然車外有一樣新刺激!! 大家一齊"嘩! 嘩! 嘩!" 咁叫左出黎!!連瞓左既團友都嚇到彈晒起身!!

公路旁之櫻

呢樣野就係港人同日人喺春天都會為佢瘋狂既野 ── 櫻花，而且仲要係"滿開"嗰種!!

導遊見我地咁興奮(其實，要俾個站大家去下廁所)，就叫司機停車俾大家影下啲櫻花。雖然，只係得幾棵又生得幾高下，但係已經足以叫大家瘋狂又一窩蜜蜂咁走落車影唔停。因為，大家都知開花既季節早已經過晒，今次見到櫻花只係巧合, 絕對係bonus啊!! :D


影完相，旅遊巴好快就到左山葵(芥末)大王農場，呢度位於日本(中部)長野縣安曇野市內，農場面積有15公頃，每年出產近150噸既Wasabi (わさび)。而要種植咁大量既わさび每日都須要用到大量既活水，所以，呢度有好多既水利設施，提供每日約12萬公噸流水量用黎灌溉咁大幅既農地! 而日本巨匠(名導演)  ──  黒澤明先生就喺佢1990年既電影『夢』中用左呢度既水車小屋做拍攝場地，令到呢度聲名大噪，每年吸引120萬人次參觀呢個農場。

わさび 水田

講真係近呢幾年香港人越黎越熱愛日本野，而且越黎越講究，依家喺香港啲大型超市開始有新鮮既わさび賣，先知道佢個樣係點，以前只係知佢係一包綠色糊狀物! 而係田裡面既わさび就真係唔知乜樣啦! 今日，終於有機會見到呢啲差啲俾港人食到冇晒既植物! 不過，我地其實都只係睇到佢既葉同花，因為，佢地既種植方法就係要將佢地既根浸喺水田裡面，有啲更加會被一大塊黑布摭著，避免佢地被陽光直接曬親。

『夢』--- 水車小屋

據說而家好多食肆用或者街買到既わさび都係仿わさび!! 因為真正既わさび係好難種，價錢亦都幾貴，所以，就算喺日本都唔會間間食肆都用新鮮既わさび。




我地落車，頂左好耐既天終於都開始落雨啦! 但係仲算唔錯，到我地今日最後既景點先落得出黎~  

當大家仲睇緊塊わさび田，我地就走左去搵『夢』既水車小屋! 其實一啲都唔難搵，喺入口靠左直行就到。好彩參觀既人唔算多，我地可以慢慢欣賞同感受呢個黒澤明先生選擇既地方。除左呢度夠優雅外，我諗另一個原因就係有住"濃烈古典日本鄉村風味"! 好多日本既公公同婆婆都冒雨set晒腳架咁喺度影相。

1998年長野冬季奧運會

我地都好想好似佢地，不過時間有限影左幾張就走，返去今晚既酒店 ── 白馬東急溫泉酒店。


其實，日本既長野縣喺1998年舉行過冬季奧運會，而白馬區成功舉辦左多個高山滑雪項目，因而成為舉世聞名既滑雪場。而且，據導遊講日皇一家冬天滑雪同渡假都會選擇長野呢度，而唔係我地港人熟悉既北海道，因為長野先係日本首屈一指既滑雪渡假區。

而呢間酒店亦完全冇令我地失望，裝修華麗之餘，亦好有外國滑雪區既風味，而且，亦係我地今次旅程最靚既酒店。由於咁靚同浪漫，有唔少既年青日人喺呢間酒店舉行婚禮。
:D

我地食完個晚餐，再去浸個温泉消消今日疲累既筋骨，一躂上張床就瞓著!!

:P + o^_____^o

大石磚、木櫈同古燈罩

而聽日會係主菜時間 ── 登立山睇雪牆!!




多期待的時刻!!!

o^_______^o


[要睇相片投影播放 (相片共: 122張)，請到  Day 2.Part1 ]












在較大的地圖上查看山葵大王農場


在較大的地圖上查看長野縣白馬東急酒店

TayThink / Travel / Toto --- 2010日本關西[追加中部]春の旅 | Day 2 . Part 1

掛在樹上的露珠

[Facebook朋支, 請click Here 或 "查看原文" 同 "睇相片投影" ]

一早起身就體驗到日本既春天，喺濛濛細雨同霧中既溫泉酒店更加覺得佢靚，忍不住早餐都未食同埋冒住整濕部相機都要衝出去影下間酒店! :P 影完一輪相之後，我地食過有溫泉蛋既懷石早餐，好滿足咁出發去上高地!

上高地係一個位於長野縣西部梓川河上游，標高約1500米既小盆地。由於整個盆地被穗高連峰既多個高山包圍住，除左大片既樹林外，一棵棵既白樺樹就伴住灣灣曲曲既梓川河邊。而且，由高山上白得亮麗既冰雪溶化成清澈通透既河水，經過動人既梓川河流到平靜既大正池中，宏偉既燒岳活火山倒影喺大正池上，構成一幅美不勝收既圖畫。

上高地Area Info. [圖片來至 kamikochi.or.jp]

再加上日本大作家芥川龍之介既著名小說《河童》中講述上高地既河童橋(Bridge Kappabashi)，更令上高地注定成為日本著名既風景勝地。

由於呢度擁有咁美麗動人既風景，喺1928年被指定為天然紀念物的國家級風景，而1934年再被定為日本中部山嶽國立公園!

但係，我就冇期望過可以睇到之前所講既咁靚既風景啦!

溫泉蛋既懷石早餐

一來，旅遊巴由酒店出發既時候仲係落緊細雨! >__<"

二來，依家仲係初春，啲花草樹木啱啱先由冬眠既狀況生長過黎，點會有青翠既樹林睇呀!? -_______-"

不過，更加擔心既係可唔可以用最佳既欣賞方式去遊上高地都成疑!

而呢個方式就係"行"。 呢度有多條郊遊小徑，俾大家去欣賞咁靚既景色，我地由巴士下車既地方---大正池走到河童橋，差唔多要成2個幾鐘，就好似喺香港行自然教育徑咁。




不過，唔同既係香港唔會有雪，但係呢度因為位置較高所以仲有積雪未溶晒!! 未溶既雪有咩問題!? 本來大家只係要行得小心啲同埋會行得辛苦啲，不過，如果落住雨行未溶雪既山路，咁就會好危險!! 除時跣到"攤攤腰"!! O____o"

大正池與燒岳

如果，你自由行，你自己都可以搏下。但係我地家下跟團，成40人，有老有嫩，導遊為左大家既安全，點會同你搏呀~ >____<"




不過，當旅遊巴啱啱開左車冇耐，個天就開始光起黎，雖然，唔係陽光普照，但係已經冇落雨!!


真係超感恩啊!!

佈滿雪的山徑

巴士停車，大家都好雀躍咁跳落車! 仲記得一落車，吸第一啖空氣既感覺，真係要學日本人講一句 --- 太幸福啦!!

呢一啖由雪山吹落黎既空氣，係一份清、純、爽、甜的感覺!! 點解會講到甜咁誇張!? 咪就係因為有幸福既感覺囉!! 真係好耐... 好耐...好耐...都未吸過零污染既空氣啦!

喺香港自從食肆全面禁煙之後，行出街唔洗30秒就會嗅到煙味!!! 旺區既話一出地鐵唔洗5秒就會嗅到! 香港政府做禁煙呢樣野一啲都唔considerate!同 完全失敗!!

我唔讚成人食煙，但係香港就唔似日本咁，日本喺某啲火車月台都會有一個吸煙室，點都會有個地方俾吸煙既人食煙。雖然，日本吸煙既人絶對唔會俾香港少，但係你喺街度絶少會嗅到煙味!! 香港政府逼晒啲食煙既人喺條街度食煙，仲逼埋唔食煙既人(即係我)食二手煙，仲要搞到大家喺條街度左閃右避咁避開啲煙，一手破壞社會和諧、製造空氣污染、影響市容同旅遊業!!

梓川河與穗高連峰

記得有次等隧巴過海既時候，見到位妙齡OL女郎、西裝友同埋裝修師父圍住一齊"打邊爐"，真係香港先會有既特色!! 激氣呀!!! >.<"


喺呢度完全忘卻香港街頭既苦況! >_____<"

大力...大力...深呼吸咁吸左冇數咁多啖咁甜既空氣! :P + o^_____^o

河童橋

你可能會話:「咪住! 香港郊野公園都時不時會有人一路行山一路食煙啦!!」

啱! 一啲都冇錯!! 就係呢啲人搞到成日山火同污染環境，我最憎呀!!! 但係，上高地呢度早已經實行左「歩行喫煙ゼロキャンペーン」(即係「零邊走邊吸煙運動」)!! 絕對唔會行行下嗅到有煙味! 所以，呢度絶對配得上日本人俾呢度既美名 --- 日本最後淨土!!

我地由大正池出發，沿住動人既梓川河逆流方向而上。雖然，已經行啲開闢好既山徑，但係由於積雪未溶，人人都要行得分外小心! 不過，都有團友成隻腳踏左入雪中，更加有啲團友跣低左! 而我對鞋既膠邊就俾啲雪逼到爆開左，一路行一路"入雪"!! o_____O" 不過，好彩未入到隻腳度!!

行左一半既路程，呢度咁清純爽甜既空氣將我本來塞住既鼻哥"完全開通"! 感覺更加好!! o^_______^o

最後，用左差唔兩個半鐘既時間，終於到左我地既目的地 ── 河童橋!

河童橋係一條長36.6米、寬3.1米的木制吊橋。由於橋懸掛係梓川河上，而前面又可以遠眺人稱日本阿爾卑斯山脈其中既穗高連峰，所以除左佢係上高地既地標外，亦被稱爲上高地最佳既風景點。有趣既係佢喺1910年建成，即係今年岩岩係佢建橋100年!喺佢過百之年同做"橋瑞"既時候遇到佢，仲要以雙腳踏喺佢身上，用呢個最佳既方式同佢賀壽!! XD

發現河童標誌

而日本會喺今年10月舉行「記念トレッキング」記念徒步遊，如果你地去記住要影多啲相，俾我睇下佢地既盛況!


咁你又會問我;「你一開始又話要去搵河童!?」


哈哈!! 河童就梗係搵唔到啦~ 不過，就見到一男一女既河童標誌(男的喺相簿內)!

一隻貌似河童既生物享受緊河童人形燒

其實河童只係一個源於中國既戰國時代，魏國 「河伯娶妻」既一個民間故事，傳到日本變成了家喻戶曉的「河童」，根本就冇河童呢種生物或者怪物。

而呢兩個一男一女既標誌又係啲乜!? 咪就係男女廁所既標誌囉!! 哈哈!!! XD

見唔到河童唯有食番個河童人形燒啦!! 我呢個食相似唔似河童呢!? 哈哈!!! :D

食過晏晝飯同欣賞完"橋瑞"後，我地吸多幾啖呢度吸極都唔夠既清純爽甜空氣，就要離開呢個淨土!




跟住出發去今日另一景點，日本巨匠黑澤明先生，拍攝【夢】既場地 ── 芥末大王農場(わさび大王)!!



[喺呢度睇相簿投影播放 | 相片數: 122 | View Slideshow Here ]




在較大的地圖上查看上高地

TayThink / Travel / Toto --- 2010日本關西[追加中部] 春の旅 | Day 1

[Facebook朋支, 請click Here 或 "查看原文" 同 "睇片" ]

對熱愛遊日既朋友，一年四季去日本都可以有唔同既原因，秋天可以去睇紅葉、冬天可以去睇北海道雪祭、或者浸溫泉，夏天又可以去睇七彩花田，而春天大家都會諗到梗係去睇櫻花啦!

但係，今次決定春天黎日本既理由(借口)就唔係黎睇櫻花，而係要履行兩年前既承諾，要再登日本人認為一生人都要必登一次既聖山 --- 立山!!

確實，如果喺當時四月中旬至下旬到關西地區"睇櫻"已經太遲，要睇"滿開"既櫻花應該要到仙台，依家就淨番北海道啦!

雖然，日本人有個關西空港(機場)，但係唔似関東咁，日本地圖唔會有一個叫做関西地區，但係泛指関西就係指2府8縣。意思係指大阪府同京都府呢兩個府，再加上8個縣就叫做関西! 當中整個近畿地方(三重県, 滋賀県, 兵庫県, 奈良県, 和歌山県同埋京都、大阪兩府)都喺関西內，再加上喺中部既福井県，中国既鳥取県同埋四国既徳島県就係人地成成日講既関西啦!

而今次我地既行程除左會喺関西一帶，我地要去既立山就横跨左中部既長野同富山県，亦都會去埋白川鄉既所在地，中部既岐阜県! 所以，我地今次差唔多會行左1/3個日本，可謂穿州過省! o____O"

記得喺跟團旅程既最後一日，導遊喺車度同我地講笑，問各位團友記唔記得第一日"玩"過啲咩呀!?

我第一個時間大大聲答:「玩搭車!!」哈哈!! 當然，激死個導遊啦!! :p

佢立即話:「唔係! 唔係! 梗係唔係啦! 係"挽"行李先真!!」

Add caption

但係，由香港機場飛去日本既名古屋中部国際空港後，我地就要搭4個鐘既車去到今晚下榻既溫泉酒店，位於岐阜県高山市奥飛騨温泉郷平湯館。縱然，車程一啲都唔短，但係我地就係鍾意日本既郊外地方! :D

到達酒店已經係食晚飯既時間，大家嘗過酒店準備既懷石料理，休息一陣就去浸溫泉!

其實，平湯館係一間好傳統既溫泉酒店，佢地喺大正12年(1916年)創業。大家食飯同瞓覺都只會喺榻榻米(畳)上，夠晒日式。而且，呢間既溫泉水一啲都唔失禮，除左係佢地既泉水喺黎自真正天然既泉眼外，對醫治慢性消化器病，慢性便秘，糖尿病，通風同肝臓病有幫助外，佢地既泉水更加係可以直接飲用啊!! :O

我地泡完個溫泉，再飲杯濃郁既飛騨高山既高原牛奶就去瞓番覺好既! 準備聽日去今次行程既重點之一 --- 郊遊上高地搵河童!



o^_____^o





在較大的地圖上查看奥飛騨温泉郷・平湯館


[喺呢度睇相簿投影播放 | 相片數: 23 | View Slideshow Here ]

Fun / Movie --- 有趣/搞笑/無聊/恐怖網上短片

[Facebook朋支, 請click Here 或 "查看原文" 同 "睇片" ]

超カワイイ ベスト3 [超可愛 TOP3] 動物篇


curry neko [愛咖哩的貓]



中國180 + 1 個小學生創跳"大"繩世界紀錄! 日本電視台直擊, 大讚好!!


搞笑當然唔可以少左詹sir份啦! 詹Sir句句唱爆陳總


スーパー外人　Super Gaijin
[超"外"人! 從日本男子手中勇救女子! 勇救日人食"古怪"食物!! 估唔到啲老外去到日本都會癲得咁混循!! 不論首歌或條片都有啲難頂!!! >___<" ]


Start from 2006 ...