日期：2010年4月27 (二)
天氣：陰天 + 雨
景點： 大阪 難波、Loppi 机
美食： 一蘭拉麵、北極冰條 (紅豆+牛奶味)、元綠壽司 (130円均一)、蝦餅章夾魚燒、健美茶、日產士多啤梨
 |
| 超級 たま婆婆喵駅長嗰後尾枕 |
>___<"
又經過兩個鐘頭嘅車程，我地帶住又攰又餓嘅身軀終於返到大阪嘅難波駅，雖然好肚餓，但係我地反而立即去左一間 Lawson 便利店！
我地唔係去便利店醫肚，而係要為今次旅程最後一日「做準備」！
你可能會問咩野要黎到日本先準備，仲要黎到大阪先呢！？
因為，呢樣野要喺日本先可以買到，就係「トミカ博」(Tomica 展覽) 嘅飛，香港冇得買！！
>__<"
其實，日本買飛唔洗好似香港咁麻煩，你唔洗去"通你"排隊 或者上"成事"電腦售票網買完等佢寄黎。
喺日本你只要去便利店就得啦！而且，不論演唱會、展覽、博物館入場劵都可以即時買到同攞到飛！超方便！！
你可能又會問點解唔一黎到日本就買呢！？ 因為，我地先前喺山區，而且唔係間間便利店都有自助售票機。
我地試過响郊區一間 "Circle Karuwaza " (香港嘅圓形K) 度買，不過，因為只係中途補給站，停留時間極短，唔想阻住團友嘅時間，睇住個全部都係日文嘅芒，要理解點用，跟住揾埋果個 event，再買埋飛對我唔識日文嘅人黎講，真係有啲難度！
不過，依家我地自由行時間就唔洗驚阻住人啦！
當然，唔同集團嘅便利店會有唔同嘅售票系統，但係只要你知道個節目嘅編碼 (code)，你就算唔識日文都可以好容易買到飛！
好似如果你响 "圓形K"，佢地會有部叫 カルワザステーション (Karuwasa Station) 嘅多功能售票機，佢地同一間叫 PIA 嘅網上售票公司合作，如果你你想買飛，你可以預先响佢地嘅官網揾到對應嘅「Pコード」(P - CODE)，輸入返就可以買到啦！
 |
| Loppi 機 |
我地只要知道節目嘅「Ｌコード」(Ｌ - CODE)就可以又簡單咁買到飛啦！
我地喺香港已經查左「トミカ博 in OSAKA」嘅 L-CODE， 再响 YouTube 搵到一段教人點樣用 L-CODE 喺 Loppi 機買飛嘅短片，完全唔洗識日文，只要跟條短片重做一次，唔洗 2分鐘就响部機度印左張「購票單 ( application slip)」，你要 30分鐘內扲張「購票單」去收銀哥哥 / 姐姐度俾錢，佢地就會印張飛畀你，就係咁簡單！ 方便！唔洗排餐死又唔洗蝕咩行政費 / 郵費！
搞掂左張飛，我地仲未忘記我地見唔到 たま (猫の駅長) 嘅傷感，同依家真係極肚餓！
>____________<"
我地決定盡情「化悲奮為食量」！實行日人响大阪嘅口號：『大阪食い倒れ ！ (食到倒轉行！)』都係廣東話傳神啲一於「食到返肚！」 … 呵呵啊啊啊！
喺呢個三點幾嘅時間，不如黎個大阪最出名小食 – 大阪燒，心諗當個下午茶就一流！！
我地去左一間有 60年歷史大阪燒老店 – 美津の！果然出名，一個山芋燒要成 13xx円！其實，日人當佢係正餐，我地雖然都想食個豪啲又 Heavy 啲下午茶！不過，當諗到一個人要食成個山芋燒，就即刻聯想到上次去吉祥寺一個人食二粒半、拳頭咁大嘅松板牛肉球！嗰次美味但又慘痛嘅經歷！
我地立即轉軚，以免食唔落夜晚嗰餐，我地轉左去食拉麵，不過唔係琴日嗰間，而係去左道頓堀 (河) 邊嘅 一蘭天然豬骨湯拉麵専門店 (天然とんこつラーメン専門店 一蘭)！
個天落緊雨，擔住遮又揹住個背囊，行左大半日咁濟，已經超肚餓，仲要過橋再要上樓梯，入到間拉麵店都已經散散地 …
 |
| 一蘭天然豬骨湯拉麵専門店嘅「自閉位」 |
我叫左碗兩倍「秘傳醬汁」嘅，而MyV就叫左碗原味嘅，唔洗好耐，兩碗都整好啦！
我食第一啖嘅感覺係 "好味"但係有啲失望！！ 因為，有同琴晚食「一風堂」嘅感覺。
雖然，個人覺得已經好味過「一風堂」，麵質幼而韌 (我暫時都未可以係香港任何一間試到！ =.=)，湯又濃郁，不過，就係分唔到係乜味！？ (諗深一層又係喎！人地叫秘傳醬汁嘛！)
無甚驚喜同極肚餓嘅我唔洗一陣已經將碗麵食左一大半，開始嘆慢板一邊食一邊影相，雖然天氣唔好，而且已經係下午茶時間，但係啲位都坐左一大半，仲有老外留學生入黎食，再望下 MyV，唔知點解佢食得「好興高彩烈」！
心諗係咪自己味覺有問題！？
佢見我咁樣就問我：「唔夠飽呀？ 試唔試下呢碗呀？」
其實唔係唔飽，而係失望感仲未過，不過諗下都未試過佢地嘅原味，咪試下囉，飲左一啖湯！
 |
| 好濃、好濃嘅豬骨湯！ |
怪唔知得 MyV 食得咁「好興高彩烈」啦！！
原來呢個原味嘅湯真係好似飲緊嘅豬骨髓一樣！好濃、好濃嘅豬骨湯！
好美味呀！好美味呀！！好美味呀！！！
真係想成個人彈起！！！！
(好似卡通片《伙頭智多星 – 味吉陽一》咁！ XD)
真係後悔點解唔食原味呀！
>__<"
所以，奉勸大家一定要先試原味先。返黎香港後，我介紹左兩個去日本旅行嘅朋友要試下一蘭拉麵，佢地試完返黎都話好味，仲封左我做《一蘭大師》添！
:O +XD
 |
| 北極アイスキャンデー (冰條) |
行左冇耐，我地見到一個用兩隻卡通企鵝做照牌嘅鋪頭 – 北極アイスキャンデー (冰條)！
佢地堪稱自己嘅冰條係大阪名物！全因為，佢地已經賣左成 65年 (昭和20年創業) 咁耐！！
鋪裡面嘅員工忙到冇停手，不過，唔係忙招呼我地呢啲街客，而係忙住 pack箱「宅急便」去其他地方！
仲好！我地可以慢慢揀食咩味！！
:P
不過，最後都係揀左兩大人氣の選：牛奶味 (ミルク) 同 紅豆味 (アズキ)，盛惠各120円！
呢個飯前甜品都算 OK，真係夠傳統，好有似細個食冰條嘅味道！
:)
我地再行多陣百貨公司，就去我地今晚嘅晚飯正餐の選 – 元祖廻る元禄寿司 (迴轉壽司)！
 |
| 元祖廻る元禄寿司 |
因為，呢間係喺昭和33年 (1958年) 响日本 (世界) 開創第一間嘅迴轉壽司店，所以，個名先可以叫做《元祖》，同香港同名嗰間完全一啲關係都冇！！
旅遊其中一樣有趣嘅野就係「體驗當地人生活」，我地當然要試下啦！
一入間鋪，就見到場面虛撼、人頭湧湧，人流進出嘅速度絕對唔比快餐店慢，真係知道咩叫做「車水馬龍」！
呢度嘅位比依家香港嘅迴轉壽司更加逼，冇香港嘅靚裝修，啲壽司碟又冇香港咁多花款，仲要條運輸帶都好似古老啲，連侍應同店長都一律係叔叔，冇一個係哥哥或妹妹仔，完全畀我有一個夠晒「歷史」嘅感覺！
而且，仲好夠地道！好夠平民添！因為，坐我地左邊係一個飲到半醉半睡嘅大叔，右邊就係一位Shop完ping，扲住一袋二袋嘅嬸嬸！
=.=
啱啱坐低嘅時候，真係有啲唔慣，不過，諗下呢啲就正係我地想要嘅「地道」囉！
而且， 侍應同店長好細心，佢地知道叔叔飲醉左，打左幾個眼色，搵左個人企係佢附近，時不時問下阿叔要唔要啲乜乜物物，確保佢唔好瞓著！
勁！呢啲咪叫做「經驗老到」同「專業」囉！
 |
| 130円均一 |
而且，侍應叔叔招呼客人都係好專業同夠中氣，每送一碟壽司上台都好大聲講句：「はい どうぞ ！(Hai dōzo！/ 請慢用！ )」
我地叫左十幾廿碟，佢就叫足十幾廿句！
講返啲主角壽司先！
係！絕對冇香港嘅花巧野，但係就真係夠晒新鮮、味美同埋「切題」！
切咩題！？夠晒「迴轉壽司」囉！
迴轉帶嘅壽司成日都係「常滿」(試過喺晚飯時段，去一間出名嘅迴轉壽司店，竟然條迴轉帶得五、六碟壽司！！)， 你總可以喺運輸帶搵到你想食嘅壽司！唔洗咩 order 紙！無論係肥美嘅「拖羅」，定係鮮甜嘅元貝，碟碟都係 130円，仲唔洗加一！！
咁先係真正嘅「廻る寿司」！
掃完一輪，嬸嬸嘅位子已經換上一對年輕男女，半醉半睡嘅叔叔仍然依舊半醉半睡，我地個肚就又增長左幾寸！
XP
佢地唔係咩高貴寿司或者日式料理！但係，絕對可以自豪地保住「元祖廻る寿司」嘅特色同呢個大名！！
 |
| 「蝦餅夾章魚燒」 |
今次真係食濟左！做唔到日人嘅『大阪食い倒れ ！ (食到倒轉行！)』，但係就真係「食到返肚！」
要返酒店，飲茶同食生果消濟！
>______<"
今日可能真係食得過左火啦！ 連臨瞓前耳邊都好似不停聽到：「はい どうぞ ！はい どうぞ ！はい どうぞ ！ ... (請慢用！ 請慢用！ 請慢用！ …)」
要快啲瞓，聽日去另一驚喜城市 – 神戶！
…待續
更多資料
- Lawson Loppi機http://www.lawson.co.jp/loppi/ghibli/english.html
- カルワザステーション (Karuwasa Station) http://karuwaza.jp/m-cksu/static/pc/kst/ticket.html
- 天然とんこつラーメン専門店 一蘭http://www.ichiran.co.jp/index.html
- 大阪名物アイスキャンデー なんば戎橋筋 北極http://www.hokkyoku.jp/
- 元祖廻る元禄寿司http://www.mawaru-genrokuzusi.co.jp/
- 大阪燒老店 – 美津のhttp://www.mizuno-osaka.com/
Day 6 相簿投影播放
